ନୂଆଦିଲ୍ଲୀ, ୦୨/୦୭ : କିଏ ହେବେ ଦଲାଇ ଲାମାଙ୍କ ଉତ୍ତରାଧିକାରୀ। ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇଲେ ନିଜେ ବୌଦ୍ଧ ଧର୍ମଗୁରୁ ତେନଜିନ ଗ୍ୟାତ୍ସୋ। ୧୫ତମ ଉତ୍ତରାଧିକାରୀ ଚୟନକୁ ନେଇ ଦେଲେ ବଡ଼ ବୟାନ। କହିଲେ ତାଙ୍କ ମୃତ୍ୟୁ ପରେ ହେବ ଉତ୍ତରାଧିକାରୀଙ୍କ ନାମ ଘୋଷଣା। ତିବ୍ବତୀ ବୌଦ୍ଧ ପରମ୍ପରା ଅନୁସାରେ ହେବ ଚୟନ ପ୍ରକ୍ରିୟା। ଏଥିରେ ଚୀନର ରହିବନି କୌଣସି ଭୂମିକା। ଗାଡେନ ଫୋଡରଙ୍ଗ ଟ୍ରଷ୍ଟକୁ ଦେଲେ ଦାୟିତ୍ଵ।
ଦଲାଇ ଲାମା ସ୍ପଷ୍ଟ କରିଛନ୍ତି ଯେ, ଭବିଷ୍ୟତରେ ବି ଦଲାଇ ଲାମା ସଂସ୍ଥା ଜାରି ରହିବ। ପରବର୍ତ୍ତୀ ଦଲାଇ ଲାମାଙ୍କ ଚୟନ କେବଳ ଗାଡେନ ଫୋଡରଙ୍ଗ ଟ୍ରଷ୍ଟର ଆଧିକାର ରହିବ। ଏଥିରେ ଅନ୍ୟ କୌଣସି ବ୍ୟକ୍ତି, ସଙ୍ଗଠନ କିମ୍ଵା ସରକାର ହସ୍ତକ୍ଷେପ କରିବେ ନାହିଁ। ଚୟନ ପ୍ରକ୍ରିୟାରେ ଚୀନର ମଧ୍ୟ କୌଣସି ଭୂମିକା ନାହିଁ। ଏହି ସମୟରେ ସେ ୨୦୧୧ର ଏକ ପ୍ରତିଜ୍ଞା ବିଷୟରେ ମନେ ପକାଇଛନ୍ତି।
ଜୁଲାଇ ୬ରେ ଦଲାଇ ଲାମାଙ୍କ ୯୦ ବର୍ଷ ବୟସରେ ପାଦ ଥାପିବେ। ସେ ତାଙ୍କର ଏକ ପୁସ୍ତକ ଭଏସ୍ ଫର ଦ ଭଏସଲେସ୍ରେ ଲେଖିଛନ୍ତି ଯେ, ତାଙ୍କର ପରବର୍ତ୍ତୀ ଅବତାର ଚୀନ ବାହାରେ, ସ୍ଵତନ୍ତ୍ର ଦୁନିଆରେ ହେବ। ସମ୍ଭବତଃ ଭାରତ କିମ୍ଵା ଅନ୍ୟ କୌଣସି ଦେଶରେ ହୋଇପାରେ। ଯେଉଁଠାରେ ତିବ୍ବତୀ ବୌଦ୍ଧ ଧର୍ମର ସ୍ଵତନ୍ତ୍ରତା ରହିବ। ସେ କହିଛନ୍ତି ଯେ, ପୁନର୍ଜନ୍ମର ଉଦ୍ଦେଶ୍ୟ ମୋ କାମକୁ ଆଗକୁ ନେବା। ଏଥିପାଇଁ ନୂଆ ଦଲାଇ ଲାମା ଏକ ସ୍ଵତନ୍ତ୍ର ବିଶ୍ଵରେ ଜନ୍ମ ନେବେ। ଯାହାଦ୍ଵାରା ସେ ତିବ୍ବତୀ ବୌଦ୍ଧ ଧର୍ମର ନେତୃତ୍ଵ ଏବଂ ତିବ୍ବତୀ ଲୋକଙ୍କ ଆକାଂକ୍ଷାର ପ୍ରତୀକ ହୋଇପାରିବେ।
ଚୀନ ଦଲାଇ ଲାମାଙ୍କ ଏହି ବୟାନଙ୍କୁ ଖାରଜ କରିଛି। ଚୀନର ବୈଦେଶିକ ମନ୍ତ୍ରାଳୟର ପ୍ରବକ୍ତା ମାଓ ନିଙ୍ଗ କହିଛନ୍ତି ଯେ, ଦଲାଇ ଲାମା ଜଣେ ରାଜନୈତିକ ନିର୍ବାସିତ ବ୍ୟକ୍ତି। ତାଙ୍କୁ ତିବ୍ବତୀ ଲୋକଙ୍କ ପ୍ରତିନିଧିତ୍ଵ କରିବାର କୌଣସି ଅଧିକାର ନାହିଁ। ଉତ୍ତରାଧିକାରୀ ଚୟନ ପ୍ରକ୍ରିୟା ଚୀନ ଆଇନ ଏବଂ ପରମ୍ପରା ଅନୁସାରେ ହେବା ଉଚିତ୍।
