ବ୍ରହ୍ମପୁର, ୨୮/୦୫: ବରିଷ୍ଠ ଚିକିତ୍ସକ ଡା ପୂର୍ଣ୍ଣଚନ୍ଦ୍ର ସାହୁ(ପିସି ସାହୁ)ଙ୍କ ୯୫ ବର୍ଷ ବୟସରେ ଗଜପତି ନଗର ସ୍ଥିତ ବାସ ଭବନରେ ଦେହାନ୍ତ ହୋଇଛି । ବ୍ରହ୍ମପୁର ସହରର ଜଣେ ସୁନାମଧନ୍ୟ ମେଡିସିନ ବିଭାଗର ଡାକ୍ତର ଭାବେ ସେ ବେଶ୍ ପରିଚିତ ଥିଲେ। ବୁଧବାର ଭୋର ସମୟରେ ତାଙ୍କର ମୃତ୍ୟୁ ହୋଇଛି । ଡା ପୂର୍ଣ୍ଣଚନ୍ଦ୍ର ସାହୁଙ୍କ ବାସ ଭବନରେ ବ୍ରହ୍ମପୁର ମେୟର ସଂଘମିତ୍ରା ଦଳେଇ, ପୂର୍ବତନ ସାଂସଦ ଚନ୍ଦ୍ର ଶେଖର ସାହୁ, ପୂର୍ବତନ ବିଧାୟକ ଡା ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ବିକ୍ରମ କୁମାର ପଣ୍ଡାଙ୍କ ସମେତ ବହୁ ନେତୃବୃନ୍ଦ, ଡାକ୍ତର ଓ ବୁଦ୍ଧିଜୀବୀ ଗଜପତିନଗର ବାସଭବନରେ ତାଙ୍କର ଶେଷ ଦର୍ଶନ କରିଛନ୍ତି । ସେହିପରି ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା, ବ୍ରହ୍ମପୁର ସାଂସଦ ଡ ପ୍ରଦୀପ ପାଣିଗ୍ରାହୀ, ବ୍ରହ୍ମପୁର ବିଧାୟକ କେ ଅନିଲ କୁମାର ଶୋକ ଜଣାଇଛନ୍ତି।
ଡା ପୂର୍ଣ୍ଣଚନ୍ଦ୍ର ସାହୁ ଏସସିବି ମେଡିକାଲ କଲେଜରୁ ଡାକ୍ତରୀ ଶିକ୍ଷା ଲାଭ କରିବା ପରେ ଦୀର୍ଘ ୫୦ ବର୍ଷ ଧରି ବ୍ରହ୍ମପୁରରେ ରୋଗୀ ସେବା ଯୋଗାଇ ଆସୁଥିଲେ। ବ୍ରହ୍ମପୁର ଏମକେସିଜି କଲେଜରେ ମେଡିସିନ ବିଭାଗର ପ୍ରଫେସର ଭାବେ କାର୍ଯ୍ୟ କରି ଅବସର ଗ୍ରହଣ କରିଥିଲେ । ଇଣ୍ଡିଆନ ମେଡ଼ିକାଲ ଆସୋସିଏସନର ସଭାପତି ଭାବେ ମଧ୍ୟ ସେ କାର୍ଯ୍ୟ ତୁଲାଇଛନ୍ତି । ସହରର ପ୍ରତ୍ୟେକ ସାମାଜିକ ଓ ସାଂସ୍କୃତିକ କାର୍ଯ୍ୟକ୍ରମଠାରୁ ଆରମ୍ଭ କରି ବୁଦ୍ଧିଜୀବୀ ସମ୍ମିଳନୀରେ ତାଙ୍କୁ ଆଗ ଧାଡିରେ ଦେଖିବାକୁ ମିଳୁଥିଲା। ତାଙ୍କ ବିୟୋଗରେ ବ୍ରହ୍ମପୁର ସହରରେ ଶୋକର ଛାୟା ଖେଳିଯାଇଛି ।
