ଧରାକୋଟ, ୨୯|୫(ଆପ୍ର): ସରକାରୀ କାମକୁ ନେଇ ଗାଁ କଙ୍ଗାରୁ କୋର୍ଟରେ ୧୦ ଦଳିତ ପରିବାକୁ ସଜା l ତିନି ମାସ ହେଲା ଗାଁ ଲୋକଙ୍କ ଦ୍ୱାରା ସାମାଜିକ ବାସନ୍ଦ, ନିଆଁ ପାଣି ବନ୍ଦ l ବାସନ୍ଦ ପରିବାର ଲୋକଙ୍କ ସହ କଥା ହେଲେ ପଡୁଛି ୫ ହାଜର ୫୧ ଟଙ୍କା ଜରିମାନା l ଏମିତି ଏକ ଅମାନୁଷିକ ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଧରାକୋଟ ବ୍ଲକ ବଡଗଡ ଥାନା ଅନ୍ତର୍ଗତ ବରଡ଼ାବିଲି ପଞ୍ଚାୟତ ପ୍ରତାପପୁର ଗ୍ରାମରେ। 

ସୁଚନା ମୁତାବକ, ଏହି ଗ୍ରାମରେ ମୋଟ ୩ ଶହ ପରିବାର ବସବାସ କରୁଥିବା  ବେଳେ ଗ୍ରାମରେ ଦଶଟି ଦଳିତ ପରିବାର ବସବାସ କରୁଛନ୍ତି l ଗତ କିଛି ବର୍ଷତଳେ ପଞ୍ଚାୟତ ତରଫରୁ ଦଳିତ ସାହିରେ ୧ ଲକ୍ଷ ୭୦ ହାଜର ଟଙ୍କାର ବ୍ୟୟ ଅଟକଳ ମୂଲ୍ୟର ଏକ କଲ୍ୟାଣୀ ମଣ୍ଡପ ନିର୍ମାଣ ପାଇଁ  କାର୍ଯ୍ୟାଦେଶ ଆସିଥିଲା l  କିନ୍ତୁ ପୂର୍ବତନ ସରପଞ୍ଚଙ୍କ ସମେତ କିଛି ଗ୍ରାମବାସି ଏହି ପ୍ରକଳ୍ପର ଘୋର ବିରୋଧ କରି ଆସୁଥିଲେ l ତେବେ ଗ୍ରାମବାସୀଙ୍କ ବିରୋଧ ସତ୍ତ୍ୱେ ଦଳିତ ପରିବାର ମାନେ ନିଜର ସୁବିଧାକୁ ଦୁଷ୍ଟିରେ ରଖି ଏବେ କଲ୍ୟାଣୀ ମଣ୍ଡପଟିକୁ ନିର୍ମାଣ କରୁଥିବାରୁ ଏହାକୁ ବିରୋଧ କରି ତିନିମାସ ତଳେ ପୂର୍ବତନ ସରପଞ୍ଚଙ୍କ ଇସାରାରେ ଗ୍ରାମରେ ଏକ ବୈଠକ କରାଯାଇଥିଲା l ଆଉ ସେହି କଙ୍ଗାରୁ କୋର୍ଟରେ ଗ୍ରାମର ୧୦ ଦଳିତ ପରିବାକୁ ସାମାଜିକ ବାସନ୍ଦ  କରଯାଇଥିବା ବେଳେ ଦିର୍ଘ ତିନି ମାସ ହେଲା ନିଆଁ ପାଣି ସବୁରେ ତାଙ୍କ ପାଇଁ କଟକଣା ଲାଗିଛି l ଯାହାକୁ ନେଇ ତିନି ମାସ ଧରି ଅନେକ ସମସ୍ୟା ଭୋଗୁଥିବା କହିଛନ୍ତି ସାମାଜିକ ବାସନ୍ଦର ସ୍ବୀକାର ହୋଇଥିବା ଦଳିତ ପରିବାର l 

କେବଳ ସାମାଜିକ ବାସନ୍ଦ କି ନିଆଁ ପାଣି ବନ୍ଦ ତାହା ନୁହେଁ ଯଦି କେହି ବାସନ୍ଦ ପରିବାର ସହ କଥା ହୁଏ ତେବେ ତାଙ୍କ ଉପରେ ୫ ହଜାର ୫୧ ଟଙ୍କା ଜରିମନାର ଲଗାଇବା ପାଇଁ ମଧ୍ୟ ନିୟମ କରାଯାଇଛି l ଦିର୍ଘ ତିନି ମାସ ହେଲା ଦଶ ବାସନ୍ଦ ପରିବାରକୁ ମନ୍ଦିରକୁ ଯିବାକୁ ମନା ହେଇଛି l ଏମିତି କି ବିଲ ବାଡି ଚାଷ ଜମିରେ ପାଣି ଛାଡ଼ିବାକୁ ମଧ୍ୟ ବାରଣ କରାଯାଇଛି l  ପୂର୍ବତନ ସରପଂଚଙ୍କ ନିର୍ଦେଶରେ ଏ ସବୁ ହେଉ ଥିବା ବେଳେ ଗାଁରେ ବାରମ୍ବାର କଙ୍ଗାରୁ କୋର୍ଟ କରି ସାମାଜିକ ବାସନ୍ଦ ପରିବାରକୁ ଗାଁ ବୈଠକକୁ ଡାକି ଆକ୍ରମଣ କରିବାକୁ ପ୍ରୟାସ କରାଯାଇଥିବା ନେଇ ବାସନ୍ଦ ପରିବାର ଲୋକେ ପୋଲିସକୁ ଜଣାଇଛନ୍ତି l

ପୂର୍ବରୁ ସାମାଜିକ ବାସନ୍ଦ ପ୍ରଥାକୁ ନେଇ ୧୦ ବାସନ୍ଦ ପରିବାର ବଡଗଡ ଥାନାରେ ଲିଖିତ ଅଭିଯୋଗ କରିଥିବା ବେଳେ ଘଟଣାକୁ ନେଇ ଆସ୍କା ଏସ.ଡିପି.ଓ ଏବଂ ଗଂଜାମ ଏସପି ଦ୍ୱାରସ୍ଥ ହୋଇଛନ୍ତି I ଅନ୍ୟ ପକ୍ଷରେ ବାସନ୍ଦ ହୋଇଥିବା ୧୦ ପରିବାର ପୂର୍ବତନ ସରପଞ୍ଚଙ୍କୁ ଏସବୁର ଦୋଷ ଦେଉଥିବା ବେଳେ ପୂର୍ବତନ ସରପଞ୍ଚ ଏହାକୁ ଖଣ୍ଡନ କରିଛନ୍ତି I ସେ କହିଛନ୍ତି ସମାଜରେ ଚଳିବାର ସମସ୍ତଙ୍କ ଅଧିକାର ଅଛି ଏଠି କେହି କାହାକୁ  ବାସନ୍ଦ କରିନାହାନ୍ତି I ଯଦି ସେମିତି କିଛି ହୋଇଛି ତାହାର ତଦନ୍ତ କରାଯାଉ l ଅପର ପକ୍ଷରେ ଭଞ୍ଜନଗର ଉପଜିଲ୍ଲାପାଳ ଘଟଣାକୁ ନେଇ ପ୍ରତିକ୍ରିୟା ଦେଇ କହିଛନ୍ତି ସାମାଜିକ ବାସନ୍ଦ ପ୍ରଥା ଆଦୌ ଠିକ୍ ନୁହଁ l ସ୍ଥାନୀୟ ବିଡିଓ ଓ ତହସିଲଦାରଙ୍କ ସହ କଥାହେବି l ସେ ଘଟଣାକୁ ନେଇ ତଦନ୍ତ କରିବେ l ଯଦି ସେମିତି କିଛି ବାସନ୍ଦ କଥା ଅଛି ତାହେଲେ ତୁରନ୍ତ ତାହାର ସମାଧାନ କରାଯିବ l 

 ଆଜି କାଲି କୋର୍ଟ କଚେରି ଓ ନ୍ୟାୟକ ବ୍ୟବସ୍ଥା ରହିଥିବା ସ୍ଵତେ ଅନେକ ଗ୍ରାମାଞ୍ଚଳରେ ଛୋଟ ବଡ ଘଟଣାକୁ ନେଇ ଏପରି କଙ୍ଗାରୁ କୋର୍ଟ ରେ ଦଣ୍ଡ ବିଧାନ କରିବା ଓ ସାମାଜିକ ବାସନ୍ଦ କରିବା ନିଆଁ ପାଣି ବନ୍ଦ ପରି ପ୍ରଥା ଏବେବି ଦେଖିବାକୁ ମିଳୁଛି l ଲୋକ ମାନଙ୍କୁ କିଭଳି ସେସବୁ ରୁ ଦୂରେଇ ରଖିବା ଓ ତା ଉପରେ  ଲୋକଙ୍କୁ ସଚେତନ କରିବାର ଆବଶ୍ୟକତା ମଧ୍ୟ ରହିଛି l