ବାଲେଶ୍ୱର,୨୪ା୩(ଆ.ପ୍ର): ସରକାରୀ ଚାକିରିରେ ସ୍ୱଚ୍ଛତା ଆଣିବା ପାଇଁ ବଦଳି ନିୟମ ରହିଛି । ଚତୁର୍ଥଶ୍ରେଣୀରୁ ଉପରିସ୍ଥ କର୍ମଚାରୀ କିମ୍ବା ଅଧିକାରୀଙ୍କୁ ଏହି ନିୟମ ଆଧାରରେ ପ୍ରତି ତିନିବର୍ଷ ଅନ୍ତରରେ ବଦଳି କରଯାଉଛି । କିନ୍ତୁ ବାଲେଶ୍ୱରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ଉଦାହରଣ ଭାବେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କାର୍ଯ୍ୟାଳୟକୁ ନିଆଯାଇପାରେ । ସେଠାରେ ଦୀର୍ଘ ବର୍ଷ ଧରି ଅନେକ କର୍ମଚାରୀ କାର୍ଯ୍ୟ କରୁଛନ୍ତି । ଏହା ସତ୍ତେ୍ୱ ସେମାନଙ୍କ ବଦଳି ଅନ୍ୟତ୍ର ହେଉନି । ସେମାନଙ୍କ ମଧ୍ୟରୁ କିଛି କର୍ମଚାରୀଙ୍କ କାର୍ଯ୍ୟକଳାପକୁ ନେଇ ବିଭିନ୍ନ ସମୟରେ ଅଭିଯୋଗ ଆସୁଛି । ଏହାକୁ ନେଇ ଅସନ୍ତୋଷର ଦାନା ମଧ୍ୟ ବାନ୍ଧୁଛି । ଦୀର୍ଘଦିନ ଧରି ଜଣେ ବ୍ୟକ୍ତି କୌଣସି ଗୋଟିଏ ପଦବିରେ ରହିଲେ ସ୍ୱେଚ୍ଛାଚାରିତା ବୃଦ୍ଧିପାଏ । ଫଳରେ ସାଧାରଣ ଲୋକଙ୍କୁ ସରକାରୀ ସେବା ଠିକ୍ ଭାବେ ମିଳେନି । ସରକାରଙ୍କ ଆଭିମୁଖ୍ୟ ମଧ୍ୟ ପୂରଣ ହୁଏନି । ଏଭଳି ବିଭିନ୍ନ ଦିଗକୁ ଦୃଷ୍ଟିରେ ରଖି ରାଜ୍ୟ ସରକାର ୧୯୯୧ ବଦଳି ନିୟମ କରିଛନ୍ତି ।
ଏହି ନିୟମରେ ସମସ୍ତ ସରକାରୀ କର୍ମଚାରୀଙ୍କ ବଦଳି ହେଉଛି । ମାତ୍ର ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ ଏହା କାମ କରୁନି । ଏହି କାର୍ଯ୍ୟାଳୟରେ କର୍ମଚାରୀମାନେ ୨୦ ବର୍ଷ ଧରି ଚୌକି ମାଡ଼ି ବସିଛନ୍ତି । ବିଭିନ୍ନ ସମସ୍ୟାର ସମାଧାନ ନେଇ ପ୍ରତିଦିନି ଜିଲ୍ଲାର ସବୁ ଅଞ୍ଚଳରୁ ଲୋକ ଆସୁଛନ୍ତି । ସେଠାରେ ଥିବା କିଛି ବାବୁ ମାନମାନିର ଶିକାର ହେବା ସହ ବାରମ୍ବାର ନିରାଶ ହୋଇ ଫେରୁଥିବା କିଛି ଲୋକ ଅଭିଯୋଗ କରିଛନ୍ତି । ବାରମ୍ବାର ଏଭଳି ଅଭିଯୋଗ ଆସିବା ପରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କାର୍ଯ୍ୟାଳୟରେ କାର୍ଯ୍ୟରତ କେତେଜଣ କର୍ମଚାରୀ ୩ରୁ ଊଦ୍ଧ୍ୱର୍ ବର୍ଷ ହେବ କାର୍ଯ୍ୟ କରୁଛନ୍ତି³ ସେନେଇ ସୂଚନା ଅଧିକାର ଆଇନ(ଆରଟିଆଇ)ରେ ତଥ୍ୟ ଲୋଡ଼ାଯଇଥିଲା । ଏଥିରେ ସମସ୍ତଙ୍କୁ ଚମକାଇ ଦେବା ଭଳି ତଥ୍ୟ ମିଳିଛି । ଏହି କାର୍ଯ୍ୟାଳୟରେ ୧୯ଜଣ କର୍ମଚାରୀ ଅଛନ୍ତି³ ଯେଉଁମାନେ ଗୋଟିଏ କାର୍ଯ୍ୟାଳୟରେ ଦୀର୍ଘ ବର୍ଷ ଧରି କାର୍ଯ୍ୟ କରୁଛନ୍ତି । ତଥ୍ୟ ମୁତାବକ, ସେହି କାର୍ଯ୍ୟାଳୟରେ ଜଣେ ଅଧିକାରୀଙ୍କ ସମେତ ଅନ୍ୟ ସମସ୍ତେ ଜୁନିଅର ଆସିଷ୍ଟାଣ୍ଟ, ସିନିଅର ଆସିଷ୍ଟାଣ୍ଟ ଅଛନ୍ତି । ସେମାନେ ସବୁ ବିଭିନ୍ନ ବିଭାଗରେ କାର୍ଯ୍ୟ କରୁଛନ୍ତି ।
ଏହି ଅଧିକାରୀଙ୍କ ସମେତ ଅନ୍ୟ ଦୁଇଜଣ ବରିଷ୍ଠ ସହଯୋଗୀ ଅଛନ୍ତି³ ଯେଉଁମାନେ କି ୨୦ ବର୍ଷ ଧରି ଗୋଟିଏ ସ୍ଥାନରେ କାର୍ଯ୍ୟ କରିଆସୁଛନ୍ତି । ୨ଜଣ ୧୭ ବର୍ଷ, ଜଣେ ୧୨ ବର୍ଷ, ୨ଜଣ ୭ ବର୍ଷ, ୩ ଜଣ ୫ ବର୍ଷ, ୨ଜଣ ୧୫ ବର୍ଷ, ଜଣେ ୪ ବର୍ଷ ର୍, ଜଣେ ୧୮ ବର୍ଷ, ଜଣେ ୩ ବର୍ଷ, ୨ ଜଣ ୯ବର୍ଷ ଧରି ଏହି କାର୍ଯ୍ୟାଳୟରେ କାର୍ଯ୍ୟ କରିଆସୁଛନ୍ତି । ଏନେଇ ବାରମ୍ବାର ଅଭିଯୋଗ ଆସିବା ସତ୍ତେ୍ୱ ସେମାନଙ୍କ ବଦଳି ଅନ୍ୟତ୍ର ନ ହେବା ସମସ୍ତଙ୍କୁ ଚକିତ କରିଛି । ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ ଏହି ସମସ୍ୟା ନେଇ ସହର କିଛି ବୁଦ୍ଧିଜୀବୀଙ୍କ ସହ ଆଲୋଚନା କରାଯାଇଥିଲା । ସେମାନଙ୍କ କହିବା କଥା ଜିଲ୍ଲାପାଳଙ୍କ ନଜରରେ ଏହି କାର୍ଯ୍ୟାଳୟ ଅଛି । ଏହା ସତ୍ତେ୍ୱ ସେଠାରେ କର୍ମଚାରୀମାନେ ଦୀର୍ଘଦିନ ଧରି ଗୋଟିଏ କାର୍ଯ୍ୟାଳୟରେ ଚୌକି ମାଡ଼ ବସିବା ଘଟଣା ତାଙ୍କ ନଜରକୁ ନ ଆସିବା ସମସ୍ତଙ୍କୁ ଚକିତ କରିଛି । ଏସମସ୍ତ କର୍ମଚାରୀଙ୍କୁ ଅନ୍ୟତ୍ର ବଦଳି କରିବା ସହ ସେଠାରେ ନୂଆ କର୍ମଚାରୀଙ୍କୁ ନିଯୁକ୍ତି ଦେଲେ ଲୋକ ନିଶ୍ଚିତ ଭଲ ସେବା ପାଇପାରନ୍ତେ ବୋଲି ସେମାନେ ମତ ଦେଇଛନ୍ତି । ଏନେଇ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଗୋପିନାଥ ପରିଡ଼ାଙ୍କ ସହ ଆଲୋଚନା କରାଯଇଥିଲା । ବଦଳି ସମୟ ଆସିଲେ ଯାଇ ବଦଳି ହେବ । ମଝିରେ ବଦଳି ହୋଇପାରିବନି ବୋଲି ସେ କହିଥିଲେ ।
