ମୁନିଗୁଡ଼ା,୧୯/୦୧: ଜଙ୍ଗଲକୁ ଜାଳେଣି କାଠ ଆଣିବାକୁ ଯାଇଥିବା ବେଳେ ଆକ୍ରମଣ କଲା ଦନ୍ତା । ଯୁବକଙ୍କୁ ଗୁରୁତର ଅବସ୍ଥାରେ ପ୍ରଥମେ ବିଷମ କଟକ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଏବଂ ପରେ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଯୁବକ ଜଣକ ଝୁଲା ଗ୍ରାମର ଜିମ୍ବୁରୁ କୁମ୍ବୁରିକା ବୋଲି ଜଣାପଡ଼ିଛି । ରାୟଗଡା ଜିଲ୍ଲା ମୁନିଗୁଡା ରେଞ୍ଜ ଅଧିନସ୍ଥ ଦୂର୍ଗୀ ବନଖଣ୍ଡ ଅଧୀନରେ ଥିବା ମାରିଡି ଝୁଲା ଗ୍ରାମରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଯୁବକ ଜଣକ ଜଙ୍ଗଲକୁ ଜାଳେଣି କାଠ ଆଣିବାକୁ ଯାଇଥିବା ସମୟରେ ଦନ୍ତା ହାତୀ ସହ ମୁହାଁମୁହିଁ ହୋଇଥିଲେ । ଦନ୍ତା ହାତୀଟି ଯୁବକକୁ ଉଠାଇ କଚାଡି ଫିଙ୍ଗି ଦେବା ଫଳରେ ଯୁବକ ଜଣକ କିଛି ଦୂରରେ ଥିବା ଏକ ବୁଦା ଭିତରେ ଆହତ ଅବସ୍ଥାରେ ପଡି ରହିଥିଲେ । ଅଧିକ ସମୟ ପର୍ଯ୍ୟନ୍ତ ଯୁବକ ଜଣକ ଘରକୁ ନ ଫେରିବାରୁ ପରିବାର ଲୋକେ ଓ ଗ୍ରାମବାସୀ ମିଳିତ ଭାବେ ଖୋଜା ଖୋଜି କରିଥିଲେ । ହେଲେ ତାଙ୍କର କୌଣସି ପତ୍ତା ମିଳି ନଥିଲା । ପରେ ରବିବାର ସକାଳେ ଯୁବକକୁ ସ୍ଥାନୀୟ ଜଙ୍ଗଲ ଭିତର ଏକ ବୁଦା ଭିତରେ ଆହତ ଅବସ୍ଥାରେ ଉଦ୍ଧାର କରି ଗାଁକୁ ଆଣିଥିଲେ ଲୋକେ । ଏହା ଦେଖି ତୁରନ୍ତ ବନ ବିଭାଗର ଅଧିକାରୀଙ୍କୁ ଖବର ଦେଇଥିଲେ । ଖବର ପାଇ ମୁନିଗୁଡା ବନାଞ୍ଚଳ ଅଧିକାରୀଙ୍କ ସମେତ ଅନ୍ୟାନ୍ୟ କର୍ମଚାରୀ ଗ୍ରାମରେ ପହଞ୍ଚି ଆହତ ଯୁବକକୁ ପ୍ରଥମେ ବିଷମ କଟକ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ଯୁବକର ଗୋଡ ଭାଙ୍ଗିଯାଇଥିବାରୁ ଉନ୍ନତ ଚିକିତ୍ସା ନିମନ୍ତେ ତାକୁ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ତେବେ ଗତ କିଛି ଦିନ ହେବ ଏହି ଅଞ୍ଚଳରେ ଏକ ୮ଟିକିଆ ହାତି ପଲ ଗାଁ ମୁହାଁ ହେଉଥିବା ବେଳେ ବନବିଭାଗ ଏହି ହାତୀ ମାନଙ୍କ ଗତିବିଧି ଉପରେ ନଜର ରଖିଛି । ହେଲେ ଏହି ହାତୀ ପଲ କେତେ ବେଳେ କେଉଁ ଅଡେ ଯାଉଛି, ତାର ସଠିକ୍ ଠିକଣା ରହୁନାହିଁ । ଏହି ହାତୀ ପଲରୁ ଗୋଟିଏ ଦନ୍ତା ଫିଟି ଯାଇ ଗାଁ ମୁହାଁ ହୋଇଥିବା ଜଣାପଡିଛି।
