ଭୁବନେଶ୍ୱର,୩୧/୦୫: ସଚେତନତା ଚାଲିଛି । କଟକଣା ପାଇଁ ନିୟମ ଆସୁଛି । ଜରିମାନା ଆଦାୟ ହେଉଛି । ହେଲେ ସବୁ ପରେ ବି ସ୍ଥିତି ସେମିତି । ତମାଖୁ ବିକ୍ରି ବେଧଡ଼କ ଚାଲିଛି । ସହରରୁ ଗାଁ, ଛୋଟ ପିଲାଙ୍କ ଠାରୁ ନେଇ ବୟସ୍କଙ୍କ ପର୍ଯ୍ୟନ୍ତ ସମସ୍ତେ ଏବେ ତମାଖୁର ମାୟା ଜାଲରେ । ତମାଖୁ ସେବନ ଦ୍ୱାରା ମାରାତ୍ମକ ରୋଗର ଚେତାବନୀକୁ ବି ଖାତର ନାହିଁ । ବିଶ୍ୱ ତମାଖୁ ବର୍ଜନ ଦିବସରେ ଏକ ତମାଖୁ ମୁକ୍ତ ସମାଜ ଗଠନ ଉପରେ ଗୁରୁତ୍ୱାରୋପ କରାଯାଇଛି ।
ଚିକିତ୍ସାଳୟ, ଶିକ୍ଷାନୁଷ୍ଠାନ ହେଉନି ତମାଖୁମୁକ୍ତ
ଶିକ୍ଷାନୁଷ୍ଠାନକୁ ତମାଖୁମୁକ୍ତ କରାଯିବ । ସେଥିପାଇଁ ନିୟମ ଆସିଲା, ସ୍କୁଲ, କଲେଜ, ବିଶ୍ୱବିଦ୍ୟାଳୟ ଭଳି ଶିକ୍ଷାନୁଷ୍ଠାନର ୧୦୦ମିଟର ପରିଧି ମଧ୍ୟରେ କୌଣସି ତମାଖୁ ସଂପର୍କିତ ସାମଗ୍ରୀ ବିକ୍ରି ହେବନି । କୋଟ୍ପା-ଆଇନ୍ ଓ ୟୁଜିସିର ଗାଇଡ୍ଲାଇନ୍ ମଧ୍ୟ ସମାନ କଥା କହିଛି । ହେଲେ ସବୁଠି ଏହାର ବ୍ୟତିକ୍ରମ ଦେଖିବାକୁ ମିଳୁଛି ।
ଉତ୍କଳ ବିଶ୍ୱବିଦ୍ୟାଳୟ, ରମାଦେବୀ ମହିଳା ବିଶ୍ୱବିଦ୍ୟାଳୟଠୁ ନେଇ ରାଜଧାନୀ କଲେଜ, ମହର୍ଷି, ବିଜୁ ପଟ୍ଟନାୟକ, ବିଜେବି କଲେଜର ଚାରି ପାଖରେ ମାଳମାଳ ଦୋକାନ ଅଛି । ସ୍କୁଲ କ୍ଷେତ୍ରରେ ମଧ୍ୟ ସମାନ ସ୍ଥିତି । ପୁଲିସ, ବିଏମସି ଓ ସ୍ୱାସ୍ଥ୍ୟ ବିଭାଗ ଏସବୁକୁ ଦେଖି ନଦେଖିବା ଭଳି ହେଉଛନ୍ତି । କେବଳ ଶିକ୍ଷାନୁଷ୍ଠାନ ନୁହେଁ, ଚିକିତ୍ସାଳୟ, ରେଳ ଷ୍ଟେସନ, ସରକାରୀ ଅଫିସରେ ମଧ୍ୟ ସର୍ବସମ୍ମୁଖରେ ତମାଖୁ ସେବନ କରାଯାଉଛି । ସର୍ବସାଧାରଣ ସ୍ଥାନରେ ଏସବୁ ବେଆଇନ ଘୋଷିତ ହୋଇଥିଲେ ହେଁ କେହି ଏହାକୁ ମାନୁନାହାନ୍ତି । ତେବେ ଜାତୀୟ ତମାଖୁ ନିୟନ୍ତ୍ରଣ କାର୍ଯ୍ୟକ୍ରମ ଅଧୀନରେ ପ୍ରତିବର୍ଷ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଉଛି । ହେଲେ ବର୍ଷକୁ ବର୍ଷ ଏହା ଧିମେଇ ଯାଉଛି ।
୨୦୨୩-୨୪ରେ ସରକାରଙ୍କ ପକ୍ଷରୁ ୩୬୧୦ଟି ତମାଖୁ ମୁକ୍ତ ଶିକ୍ଷାନୁଷ୍ଠାନ କାର୍ଯ୍ୟକ୍ରମ ହୋଇଥିଲା । ହେଲେ ୨୦୨୪-୨୫ରେ ଏହି ସଂଖ୍ୟା ମାତ୍ର ୨୩୨୭ରେ ସୀମିତ ରହିଛି । ସେହିପରି ୨୦୨୩- ୨୪ରେ ୬୭୦ଟି ସ୍ଥାନରେ ଏନଫୋର୍ସମେଣ୍ଟ ଧରପଗଡ଼ କରିଥିବା ବେଳେ ୨୦୨୪-୨୫ରେ ୪୭୯ଟି ସ୍ଥାନରେ ଧରପଗଡ଼ ହୋଇଛି । ୨୩- ୨୪ରେ ୮୧୬୪ଜଣ ଆଇନ ଉଲ୍ଲଂଘନକାରୀଙ୍କ ଠାରୁ ୧୩ଲକ୍ଷ ୨୮ ହଜାର ୧୫୩ଟଙ୍କା ଜରିମାନା ଆଦାୟ ହୋଇଛି ।
ତମାଖୁ ବିରତି କେନ୍ଦ୍ର ସଂପର୍କରେ ଅଜ୍ଞ
ଲୋକମାନେ ତମାଖୁ ଛାଡିବେ । ସେମାନଙ୍କୁ କାଉନସେଲିଂ କରାଯିବ । ସେଥିପାଇଁ ସ୍ୱାସ୍ଥ୍ୟ ବିଭାଗ ଓ ଜାତୀୟ ସ୍ୱାସ୍ଥ୍ୟ ମିଶନର ମିଳିତ ସହଯୋଗରେ ରାଜ୍ୟର ସମସ୍ତ ଜିଲ୍ଲା ମୁଖ୍ୟ ଚିକିତ୍ସାଳୟ, କ୍ୟାପିଟାଲ ହସ୍ପିଟାଲ, ରାଉରକେଲାର ଆରଜିଏଚ୍ରେ ତମାଖୁ ବିରତି କେନ୍ଦ୍ର ପ୍ରତିଷ୍ଠା କରାଯାଇଛି । ଏହି କେନ୍ଦ୍ରରେ ଦନ୍ତ ବିଭାଗର ଡାକ୍ତରଙ୍କୁ ନୋଡାଲ ଅଫିସର ଭାବେ ଦାୟିତ୍ୱ ମିଳିଛି । ସେମାନେ ପ୍ରତ୍ୟେକ ତମାଖୁ ସେବନକାରୀଙ୍କ କାଉନସେଲିଂ କରିବା ସହ ସେମାନେ କିପରି ତମାଖୁ ଛାଡ଼ିବେ ସେନେଇ କାର୍ଯ୍ୟ କରିବେ । ହେଲେ ଏଭଳି ଏକ କେନ୍ଦ୍ର ଅଛି ବୋଲି ଲୋକେ ଆଜି ପର୍ଯ୍ୟନ୍ତ ଜାଣିନାହାନ୍ତି । ଏଦିଗରେ ସଚେତନ ମଧ୍ୟ ହେଉନି । ସ୍ୱାସ୍ଥ୍ୟ ବିଭାଗର ତଥ୍ୟ କହୁଛି, ୨୦୨୩- ୨୪ରେ ରାଜ୍ୟରେ ମୋଟ ୮୪ହଜାର୮୬୩ଜଣ ବ୍ୟକ୍ତିଙ୍କ କାଉନସେଲିଂ ହୋଇଥିବା ବେଳେ ୨୦୨୪-୨୫ରେ ଏହି ସଂଖ୍ୟା ଖସିଛି । ଗତବର୍ଷ ମାତ୍ର ୭୩ହଜାର୭୬୩ଜଣଙ୍କ କାଉନସେଲିଂ କରାଯାଇଛି । ୧୦% ତମାଖୁ ଛାଡ଼ିପାରିଛନ୍ତି ।
