ଭୁବନେଶ୍ୱର, ୦୪/୦୮: ମହିଳାମାନେ ରାତିରେ ବିଭିନ୍ନ ଘରୋଇ ପ୍ରତିଷ୍ଠାନ କିମ୍ବା ବ୍ୟବସାୟିକ କେନ୍ଦ୍ରରେ କାର୍ଯ୍ୟ କରିପାରିବେ । ରାଜ୍ୟରେ ମହିଳାଙ୍କୁ ସ୍ୱାବଲମ୍ବୀ କରିବା ଏବଂ ସେମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଶ୍ରମ ବିଭାଗ ପକ୍ଷରୁ ବ୍ୟବସାୟିକ ପ୍ରତିଷ୍ଠାନ ଆଇନ-୧୯୫୬ରେ କେତେକ ପରିବର୍ତ୍ତନ କରିଛନ୍ତି ।
ରାତିରେ କାମ କରିବାକୁ ଇଚ୍ଛୁକ ମହିଳା କର୍ମଚାରୀଙ୍କ ସମ୍ମତି ଲିଖିତ ଭାବରେ ନିଆଯିବ । ଉକ୍ତ ସଂସ୍ଥାରେ ରାତିରେ ଅତି କମ୍ରେ ୩ଜଣ ମହିଳା କର୍ମଚାରୀ ରହିବେ । ସେଥିପାଇଁ ମହିଳା କର୍ମଚାରୀମାନଙ୍କୁ ସେମାନଙ୍କ ବାସସ୍ଥାନରୁ ନେବା ଆଣିବା କରିବା ପାଇଁ GPS ଟ୍ରାକିଂ ସିଷ୍ଟମ ସହିତ ପରିବହନ ସୁବିଧା ଯୋଗାଇ ଦିଆଯିବ । ସମ୍ପୃକ୍ତ ସଂସ୍ଥା ରାତ୍ରିରେ ନେବା ଆଣିବା ପାଇଁ ରହିଥିବା ପ୍ରତ୍ୟେକ ଡ୍ରାଇଭରଙ୍କ ବାୟୋଡାଟା ପୁଲିସ ଯାଞ୍ଚ କରିବ । ନିଯୁକ୍ତିଦାତା ମହିଳା କର୍ମଚାରୀମାନଙ୍କୁ ନିଯୁକ୍ତି ଦିଆଯାଇଥିବା କାର୍ଯ୍ୟସ୍ଥଳରେ ଶୌଚାଳୟ ଏବଂ ପାନୀୟ ଜଳ ସୁବିଧା ଯୋଗାଇବେ । ଏହା ସହ ସମସ୍ତ ସ୍ଥାନରେ ସିସିଟିଭି ଏବଂ ଲାଇଟ୍ ସୁବିଧା ସହ ରାସ୍ତା ବ୍ୟବସ୍ଥା ରହିବ ।
ସମ୍ପୃକ୍ତ ସଂସ୍ଥା ମହିଳାମାନଙ୍କ ପାଇଁ ଟୋଲ୍-ଫ୍ରି ହେଲ୍ପଲାଇନ୍ ନମ୍ବର (୧୮୧), ଲେବର୍ ଏବଂ ESI ବିଭାଗ ହେଲ୍ପଲାଇନ୍ ନମ୍ବର ୧୮୦୦୩୪୫୬୭୦୩ ପରିବହନ ପାଇଁ ବ୍ୟବହୃତ ଯାନବାହନ ଭିତରେ ପ୍ରମୁଖ ଏବଂ ସ୍ପଷ୍ଟ ଭାବରେ ପ୍ରଦର୍ଶିତ କରିବ । ନିଯୁକ୍ତିଦାତା ନିଶ୍ଚିତ କରିବେ ଯେ, ଯେଦି ଜଣେ ମହିଳା କର୍ମଚାରୀଙ୍କ ନିଜର ସିଫ୍ଟ ଦିନରୁ ରାତିକୁ ପରିବର୍ତ୍ତନ କରୁଛନ୍ତି ତେବେ ଦୁଇ ଦିନର ସିଫ୍ଟରେ ଅତି କମ୍ରେ ୮ ଘଣ୍ଟାର ବ୍ୟବଧାନ ରହିବା ଆବଶ୍ୟକ ।
କର୍ମକ୍ଷେତ୍ରରେ ମହିଳାମାନଙ୍କ ପାଇଁ ଯୌନ ନିର୍ଯାତନା (ନିବାରଣ, ନିଷେଧ ଏବଂ ପ୍ରତିକାର) ଆଇନ, ୨୦୧୩ (୨୦୨୩ ର ୧୪) ପାଳନ କରାଯିବ । ରାତିରେ ମହିଳା କର୍ମଚାରୀଙ୍କୁ ନିୟୋଜିତ କରୁଥିବା ଯେକୌଣସି ନିଯୁକ୍ତିଦାତା, ବିଭାଗର ନିର୍ଦ୍ଦିଷ୍ଟ ପୋର୍ଟାଲରେ ନିର୍ଦ୍ଧାରିତ ପ୍ରୋଫର୍ମାରେ ଏକ ସେଲ୍ଫ ସାର୍ଟିଫିକେଟ୍ର ସଫ୍ଟ କପି ଦାଖଲ କରିବେ । ଯାହା ଦର୍ଶାଇବ ଯେ, ସେ ଏହି ବିଜ୍ଞପ୍ତିରେ ଉଲ୍ଲେଖ କରାଯାଇଥିବା ସମସ୍ତ ସୁବିଧା ଯୋଗାଇ ଦେଇଛନ୍ତି ଏବଂ ମହିଳା କର୍ମଚାରୀଙ୍କ ସୁରକ୍ଷା ଓ ମର୍ଯ୍ୟାଦା ପ୍ରତି ଯତ୍ନବାନ ଅଛନ୍ତି ।
ଏଥିରେ ଏହା ମଧ୍ୟ ଉଲ୍ଲେଖ ରହିଛି ଯେ, କୌଣସି ଯୁବକଙ୍କୁ ରାତିରେ କର୍ମଚାରୀ ଭାବରେ କାମ କରିବାକୁ ଅନୁମତି ଦିଆଯିବ ନାହିଁ । ଯଦି କୌଣସି ସଂସ୍ଥା ଉପରୋକ୍ତ ସର୍ତ୍ତାବଳୀ ପାଳନ କରିବାରେ ବିଫଳ ହୁଏ, ତେବେ ସେ ଓଡ଼ିଶା ଦୋକାନ ଏବଂ ବ୍ୟବସାୟିକ ପ୍ରତିଷ୍ଠାନ ଆଇନ, ୧୯୫୬ ର ଧାରା ୩୫ ଅନୁଯାୟୀ ଦଣ୍ଡ ପାଇଁ ଦାୟୀ ରହିବେ।
