କଟକ/ବୟାଳିଶମୌଜା,୧୪/୧୨: କଟକ ସହର ଉପକଣ୍ଠ କନ୍ଦରପୁର ପାଖ ଇଲାକାରେ ଏକ ବୀଭତ୍ସ ହତ୍ୟାକାଣ୍ଡ ଘଟିଛି । ଜଣେ ମହିଳାଙ୍କ ବେକକୁ କାଟି, ମୁହଁକୁ ଏକାଧିକବାର ହାଣି ପରମହଂସ ନିକଟ କାଠଯୋଡ଼ି ପଠାରେ ଫିଙ୍ଗି ଦିଆଯାଇଛି । ମହିଳାଙ୍କ ପରିଚୟ ସ୍ପଷ୍ଟ ହୋଇନି । ସନ୍ଧାନୀ କୁକୁର, ସାଇଣ୍ଟିଫିକ୍ ଟିମ୍ ସହଯୋଗରେ କନ୍ଦରପୁର ଥାନା ପୁଲିସ ତଦନ୍ତ କରୁଛି । ଘଟଣାସ୍ଥଳରୁ ଏକ ଚାପଡ଼, ହଳେ ପ୍ୟାଣ୍ଟ୍-ସାର୍ଟ, ଗୋଟିଏ ଗାମୁଛା ଓ କିଛି ଧୂପକାଠି ମିଳିଛି । ମହିଳାଙ୍କ ମୁହଁକୁ ଏଭଳି ଢଙ୍ଗରେ ହଣାଯାଇଛି ଯେ, ହଠାତ୍ ଚିହ୍ନଟ କରିବା ସହଜ ହେବନି । ପରିଚୟ ଖୋଜିବା ପାଇଁ ପୁଲିସ ରାଜ୍ୟ ତମାମ୍ ଥାନାକୁ ମହିଳାଙ୍କ ଫଟୋ ପଠାଇଛି ।
ଶୁକ୍ରବାର ସକାଳ ପ୍ରାୟ ୭ଟା ହେବ । ପରମହଂସ ଗ୍ରାମର କିଛି ଲୋକ ନଦୀ ବନ୍ଧରେ ଯାଉଥିବା ବେଳେ ପଠାରେ ଜଣେ ମହିଳା ପଡ଼ିଥିବା ଦେଖିବାକୁ ପାଇଥିଲେ । ପାଖକୁ ଯାଇ ଦେଖିଲା ବେଳକୁ ମହିଳାଙ୍କ ଶରୀରରେ କ୍ଷତଚିହ୍ନ ଅଛି । ସେତେବେଳକୁ ତାଙ୍କର ମୃତ୍ୟୁ ହୋଇଯାଇଥିଲା । ମହିଳାଙ୍କ ବୟସ ପ୍ରାୟ ୩୫ରୁ ୪୦ ବର୍ଷ ହେବ । ମୃତଦେହ ପାଖରୁ ଏକ ଚାପଡ଼ ମିଳିଥିଲା । କିଛି ଦୂରରେ ରକ୍ତଭିଜା ହଳେ ପ୍ୟାଣ୍ଟ୍-ସାର୍ଟ ଓ ଗୋଟିଏ ଗାମୁଛା ପଡ଼ିଥିବା ପୁଲିସ ଦେଖିବାକୁ ପାଇଥିଲା । ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ଆସିବା ପରେ ସୁରାକ୍ ଯୋଗାଡ଼ କରାଯାଇଥିଲା । ମହିଳାଙ୍କ ବେକକୁ ପୂରା କାଟି ଦିଆଯାଇଛି । ମୁହଁକୁ ପ୍ରାୟ ୪ରୁ ୫ ଥର ହଣାଯାଇଛି । ମହିଳାଙ୍କ ଶରୀରରୁ ବାହାରିଥିବା ରକ୍ତରେ ପାଖ ଅଞ୍ଚଳ ପୂରା ଭିଜିଯାଇଥାଏ । ତାଙ୍କ ଡାହାଣ ହାତରେ ଏକ ଗାମୁଛା ଗୁଡ଼ାଯାଇଥାଏ । ପରିଚୟ ସ୍ପଷ୍ଟ ହେଲା ଭଳି କୌଣସି ଜିନିଷ ମୃତଦେହ ପାଖରୁ ମିଳିନି ।
ତେବେ ମହିଳାଙ୍କ ଡାହାଣ ହାତରେ ଓଡ଼ିଆରେ ଓମ୍ ବାବା ବଳିଆ ଲେଖା ଥିବା ବେଳେ ଡାହାଣ ହାତରେ ଇଂରାଜୀରେ ‘ପିତା-କେ.ପି.ଏସ୍.ଏମ୍’ ଲେଖା ଅଛି । ଯୋଜନାବଦ୍ଧ ଭାବେ ଏହି ହତ୍ୟାକାଣ୍ଡ ହୋଇଥିବା ପୁଲିସ ସନ୍ଦେହ କରୁଛି । ସନ୍ଧାନୀ କୁକୁର ହତ୍ୟାକାଣ୍ଡ ସ୍ଥଳରୁ କିଛି ଦୂର ଯାଇ ବନ୍ଧ ଉପରେ ଚଢ଼ି ପୁଣି ଫେରିଆସିଛି । ଅଞ୍ଚଳଟି ଏକ ଖୋଲା ଖରିବୁଦାରେ ଭରପୂର ଇଲାକା ହୋଇଥିବାରୁ କୁକୁର ମଧ୍ୟ କିଛି ସୁରାକ ଦେଇପାରିନି । ମହିଳାଙ୍କ ପରିଚୟ ଜାଣିବା ପାଇଁ ପୁଲିସ ବିଭିନ୍ନ ଥାନାକୁ ଫଟୋ ପଠାଇବା ସହିତ ଗଣମାଧ୍ୟମର ସହଯୋଗ ଲୋଡ଼ିଛନ୍ତି ଡିସିପି ଜଗମୋହନ ମୀନା । ଘଟଣାର ତଦନ୍ତ ପାଇଁ ସ୍ପେସାଲ୍ ସ୍କ୍ୱାଡ୍ ଓ କନ୍ଦରପୁର ଥାନା ପୁଲିସ ବିଭିନ୍ନ ସ୍ଥାନର ସିସିଟିଭି ଫୁଟେଜ୍ ସଂଗ୍ରହ କରିଛି । ହତ୍ୟାକାଣ୍ଡ ପଛରେ ପାରିବାରିକ କଳି ବା ପ୍ରଚଣ୍ଡ ଘୃଣା ଭଳି କାରଣ ଥିବା ପୁଲିସ ଅନୁମାନ କରୁଛି ।
