ନୂଆଦିଲ୍ଲୀ : ଅଜାଣତରେ ଅନ୍ତରାଷ୍ଟ୍ରୀୟ ସୀମା ପାର କରି ପାକିସ୍ତାନରେ ପହଞ୍ଚି ଥିବା ବିଏସଏଫ୍ର ଯବାନ ପୂର୍ଣ୍ଣବ ସାହୁଙ୍କ ପତ୍ନୀ ନିଜ ସ୍ୱାମୀଙ୍କ ବିଷୟରେ ଜାଣିବା ପାଇଁ ପଞ୍ଜାବର ଫିରୋଜପୁର ଅଭିମୁଖେ ପ୍ରସ୍ଥାନ କରିଛନ୍ତି। ମିଡ଼ିଆ ସହ କଥାବାର୍ତ୍ତା ବେଳେ ରଜନୀ କହିଛନ୍ତି , ଯଦି ବିଏସଏଫ୍ର ଅଧିକାରୀଙ୍କ ସହ କଥାବାର୍ତ୍ତା ବେଳେ ତାଙ୍କୁ କୌଣସି ସନ୍ତୋଷଜନକ ତଥ୍ୟ ନମିଳେ, ତ ସେ କେନ୍ଦ୍ରୀୟ ଗୃହ ମନ୍ତ୍ରଣାଳୟ ଓ ଅନ୍ୟ ସରକାରୀ ଅଧିକାରୀଙ୍କୁ ନିଜ ସ୍ୱାମୀଙ୍କ ଫେରିବା ପାଇଁ ଅନୁରୋଧ କରିବା ପାଇଁ ସେଠାରୁ (ଫିରୋଜପୁର) ଦିଲ୍ଲୀ ଯିବେ।
ପଶ୍ଚିମବଙ୍ଗର ହୁଗୁଳି ଜିଲ୍ଲାରେ ରହୁଥିବା ପୂର୍ଣ୍ଣବ ସାହୁ ବିଏସଏଫ୍ ୧୮୨ତମ ବାଟାଲିୟନରେ ଫିରୋଜପୁର ସୀମାରେ ମୁତୟନ ଥିଲେ। ୫ ଦିନ ପୂର୍ବେ ସେ ଅଜାଣତରେ ପାକିସ୍ତାନୀ ସୀମାକୁ ଚାଲି ଯାଇଥିଲେ। ଅଧିକାରୀଙ୍କ ମୁତାବିକ, ଏହି ଘଟଣା ସେହି ସମୟରେ ଘଟିଛି, ଯେବେ ପୂର୍ଣ୍ଣବ ସାହୁ ସୀମା ପାଖରେ ଚାଷୀଙ୍କର ଏକ ଗ୍ରୁପ୍କୁ ସୁରକ୍ଷା ଦେବା ପାଇଁ ତାଙ୍କ ସହ ଥିଲେ। ଏହି ସମୟରେ ସାହୁ ଏକ ଗଛ ତଳେ ବିଶ୍ରାମ ନେବାକୁ ଚାଲିଗଲେ ଏବଂ ଅଜାଣତରେ ପାକିସ୍ତାନୀ ସୀମା କ୍ଷେତ୍ରରେ ପହଞ୍ଚି ଗଲେ, ଏହାପରେ ତୁରନ୍ତ ତାଙ୍କୁ ପାକିସ୍ତାନୀ ରେଞ୍ଜର ମାନେ ହେପାଜତକୁ ନେଇଗଲା।
ଅଧିକାରୀମାନେ ଗୁରୁବାର କହିଥିଲେ ଯେ ,ସାହୁଙ୍କର ମୁକ୍ତି ନେଇ ଚର୍ଚ୍ଚା କରିବା ପାଇଁ ଭାରତୀୟ ଓ ପାକିସ୍ତାନୀ ସୈନିକଙ୍କ ମଧ୍ୟରେ ଫ୍ଲାଗ୍ ମିଟିଂ ହୋଇ ଥିଲା। କିନ୍ତୁ ତାଙ୍କର ପରିବାରକୁ ଅଧିକ ସୂଚନା ଦିଆଯାଇ ନାହିଁ। ଅନ୍ୟପଟେ ଯବାନଙ୍କ ଗର୍ଭବତୀ ପତ୍ନୀ କହିଛନ୍ତି ଯେ, ତାଙ୍କର ପୁଅ ଓ ୩ଜଣ ସଂପର୍କୀୟ ଚଣ୍ଡିଗଡ଼ ପାଇଁ ଉଡ଼ାଣ ଭରିବେ ଏବଂ ଏହପରେ ସେ ସ୍ୱାମୀଙ୍କ ବିଷୟରେ ଜାଣିବା ପାଇଁ ଭାରତ-ପାକ୍ ସୀମାର ଥିବା ଫିରୋଜପୁର ଯିବେ।
ରଜନୀ ରବିବାର ଗଣମାଧ୍ୟମକୁ କହିଛନ୍ତି, ମୁଁ ଖବର ଶୁଣିବା ପର ଠାରୁ ଖୁ୍ବ୍ ଦୁଃଖରେ ଥିଲି। ଆଜି ୫ମ ଦିନ ଓ ତାଙ୍କର ଫେରିବା ବିଷୟରେ କୌଣସି ସୂଚନା ନାହିଁ। ବିଏସଏଫ୍ର ଅଧିକାରୀ ଘରକୁ ଆସି ଥିଲେ। ସେମାନେ ମୋତେ ଚିନ୍ତା ନକରିବାକୁ କହିଥିଲେ , କିନ୍ତୁ ଏହା କେମିତି ହୋଇ ପାରିବ। ମୁଁ କାଲି ଚଣ୍ଡିଗଡ ପାଇଁ ବିମାନ ଟିକେଟ୍ ଆଣି ସାରିଛି। ସେଠାରୁ ମୁଁ ଫିରୋଜପୁର ଯିବି। ମୋ ପୁଅ ଓ ଆଉ ତିନିଜଣ ସଂପର୍କୀୟ ମୋ ସହ ଯିବେ।
