ନୂଆଦିଲ୍ଲୀ,୧୫।୬: ଅହମ୍ମଦାବାଦରେ ବିମାନ ଦୁର୍ଘଟଣାରେ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କର ମୃତ୍ୟୁ ହୋଇଥିଲା। ଏବେ ତାଙ୍କର ଡିଏନଏ ମ୍ୟାଚ୍ ହୋଇଥିବା ଜଣାପଡିଛି। ଗୁଜୁରାଟର ଗୃହ ରାଷ୍ଟ୍ରମନ୍ତ୍ରୀ ହର୍ଷ ସାଂଘଭି ଡିଏନଏ ମେଳ ଖାଇବାର ସୁନିଶ୍ଚିତ କରିଛନ୍ତି। ସେ ଗାନ୍ଧୀନଗରରେ ଗଣମାଧ୍ୟମ ପ୍ରତିନିଧିମାନଙ୍କୁ ସୂଚନା ଦେଇଛନ୍ତି। ସେ କହିଛନ୍ତି, ପୂର୍ବତନ ମୁଖ୍ୟମନ୍ତ୍ରୀଙ୍କ ୧୨ ଜୁନ୍ରେ ବିମାନ ଦୁର୍ଘଟଣାରେ ମୃତ୍ୟୁ ହୋଇଥିଲା। ଆଜି ସକାଳ ପ୍ରାୟ ୧୧ଟା ୧୦ ମିନିଟ୍ରେ ତାଙ୍କର ଡିଏନ୍ଏ ମ୍ୟାଚ୍ ହୋଇଛି। ଏବେ ତାଙ୍କ ପାର୍ଥିବ ଶରୀର ପରିବାର ଲୋକଙ୍କୁ ହସ୍ତାନ୍ତର କରାଯିବ। ଗୁଜୁରାଟ ସ୍ୱାସ୍ଥ୍ୟମନ୍ତ୍ରୀ ଋଷିକେଶ ପଟେଲ କହିଛନ୍ତି, ରୂପାନୀଙ୍କ ପରିବାରକୁ ଏ ବିଷୟରେ ସୂଚନା ଦିଆଯାଇଛି। ତାଙ୍କ ପରିବାର ସଦସ୍ୟମାନେ ଖୁବ୍ଶୀଘ୍ର ଏଠାରେ ପହଞ୍ଚିବେ। ତାଙ୍କ ମୃତଦେହ ହସ୍ପିଟାଲରୁ ରାଜକୋଟ ଅଣାଯିବ। ଏହାପରେ ରୂପାନୀଙ୍କ ଶେଷକୃତ୍ୟର ପ୍ରକ୍ରିୟା ଆରମ୍ଭ ହେବ।
ଉଲ୍ଲେଖନୀୟ ଯେ, ଗୁଜରାଟରୁ ଲଣ୍ଡନ ଯାଉଥିବା ଏୟାର ଇଣ୍ଡିଆର ବିମାନ AI-171 ଗତ ଗୁରୁବାର ଦୁର୍ଘଟଣାଗ୍ରସ୍ତ ହୋଇଥିଲା। ସେହି ବିମାନରେ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀ ମଧ୍ୟ ଯାତ୍ରା କରୁଥିଲେ, ତାଙ୍କର ମଧ୍ୟ ବିମାନ ଦୁର୍ଘଟଣାରେ ମୃତ୍ୟୁ ହୋଇଥିଲା। ଏପର୍ଯ୍ୟନ୍ତ ଏହି ଦୁର୍ଘଟଣାରେ ୨୭୪ ଜଣଙ୍କ ମୃତ୍ୟୁ ନିଶ୍ଚିତ ହୋଇଛି। କିନ୍ତୁ ଏପର୍ଯ୍ୟନ୍ତ କେବଳ ୩୧ ଜଣଙ୍କ ମୃତଦେହ ଚିହ୍ନଟ ହୋଇଛି ଏବଂ ୧୯ ଜଣଙ୍କ ମୃତଦେହ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି। ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ମୃତକମାନଙ୍କୁ ଚିହ୍ନଟ କରିବା ପାଇଁ ଡିଏନଏ ନମୁନା ସଂଗ୍ରହ କରାଯାଉଛି। ଡିଏନଏ ପରୀକ୍ଷା ପରେ ହିଁ ମୃତଦେହଗୁଡ଼ିକୁ ସମ୍ପର୍କୀୟମାନଙ୍କୁ ହସ୍ତାନ୍ତର କରାଯିବ।
ବିମାନରେ ମୋଟ ୨୪୨ ଜଣ ଥିଲେ, ଯେଉଁଥିରେ ୨୩୦ ଜଣ ଯାତ୍ରୀ ଏବଂ ୧୨ ଜଣ କ୍ରୁ ସଦସ୍ୟ ଥିଲେ। ବିମାନରେ ଥିବା ୨୪୨ ଜଣଙ୍କ ମଧ୍ୟରୁ ୨୪୧ ଜଣଙ୍କର ମୃତ୍ୟୁ ହୋଇଥିଲା, କେବଳ ଜଣେ ଯାତ୍ରୀ, ରମେଶ ବିଶ୍ବାସକୁମାର(ଜଣେ ବ୍ରିଟିଶ ନାଗରିକ) ଏମର୍ଜନ୍ସି ଏଗଜିଟ୍ ଡୋର ପାଖରେ ସିଟ୍ ୧୧ଏରେ ବସିଥିଲେ, ସେ ବଞ୍ଚି ଯାଇଥିଲେ।
