ନୂଆଦିଲ୍ଲୀ: ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାକୁ ନେଇ ଦେଶରେ ଚର୍ଚ୍ଚା ଆଲୋଚନା ଜାରି ରହିଛି । ଏହାରି ମଧ୍ୟରେ ଆଜି (ରବିବାର)ଗାଜିଆବାଦର ହିଣ୍ଡନ ବିମାନବନ୍ଦରରେ ଆଉ ଏକ ଏୟାର ଇଣ୍ଡିଆ ବିମାନରେ ଦେଖା ଦେଇଛି ଯାନ୍ତ୍ରୀକ ତ୍ରୁଟି । ଏପରିକି କୋଲକାତା ଯିବାକୁ ଥିବା ଏୟାର ଇଣ୍ଡିଆର ବିମାନ ନମ୍ବର IX 1511ର ଉଡ଼ାଣ ବାତିଲ କରାଯାଇଛି। ସୂଚନା ଅନୁଯାୟୀ, ଏହି ବିମାନଟି ଗାଜିଆବାଦରୁ କୋଲକାତା ଉଡ଼ାଣ କରିବାର ଥିଲା। ଯାନ୍ତ୍ରିକ ତ୍ରୁଟି ଯୋଗୁଁ ବିମାନଟି ଗୋଟିଏ ଘଣ୍ଟା ରନୱେରେ ଫସି ରହିଥିଲା। 

 ଯାତ୍ରୀମାନଙ୍କ ମଧ୍ୟରେ ଆତଙ୍କ ଏବଂ ଦ୍ବନ୍ଦ୍ବ ଦେଖା ଦେଇଥିଲା। ଏୟାର ଇଣ୍ଡିଆ ପକ୍ଷରୁ କୌଣସି ସରକାରୀ ସୂଚନା ଜାରି କରାଯାଇ ନାହିଁ। ବିମାନବନ୍ଦର ଅଧିକାରୀମାନେ କହିଛନ୍ତି ଯେ, ବିମାନଟି ଉଡ଼ାଣ ପାଇଁ ପ୍ରସ୍ତୁତ ହେଉଥିଲା। ତା’ପରେ ହଠାତ୍ ଏକ ଯାନ୍ତ୍ରିକ ତ୍ରୁଟି ଜଣାପଡିଲା। ଏହା ପରେ, ସୁରକ୍ଷା କାରଣରୁ ଉଡ଼ାଣକୁ ସ୍ଥଗିତ ରଖାଯାଇଥିଲା। ସେ କହିଛନ୍ତି ଯେ, ଇଞ୍ଜିନିୟରମାନେ ସମସ୍ୟାର ସମାଧାନ ପାଇଁ କାମ କରୁଥିବା ସମୟରେ ବିମାନଟିକୁ ପ୍ରାୟ ଏକ ଘଣ୍ଟା ପର୍ଯ୍ୟନ୍ତ ରନୱେରେ ରଖାଯାଇଥିଲା। 

ଏହା ପୂର୍ବରୁ ଜୁନ୍ ୧୨ ରେ ଏୟାର ଇଣ୍ଡିଆର AI-171 ବିମାନଟି ଅହମ୍ମଦାବାଦରେ ଏକ ଦୁର୍ଘଟଣାର ସମ୍ମୁଖୀନ ହୋଇଥିଲା। ଉଡ଼ାଣ ଆରମ୍ଭ ହେବାର କିଛି ସେକେଣ୍ଡ ପରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାର କାରଣ ସଂପର୍କରେ ତଦନ୍ତ କରାଯାଉଛି । 

 ଏହି ଦୁର୍ଘଟଣାରେ ପ୍ରାୟ ୨୭୫ ଜଣଙ୍କର ମୃତ୍ୟୁ ହୋଇଥିଲା। ଏହି ବିମାନରେ ୨୪୨ ଜଣ ଥିଲେ। ଏଥିମଧ୍ୟରୁ ୨୪୧ ଜଣଙ୍କର ମୃତ୍ୟୁ ହୋଇଥିଲା ବେଳେ ଜଣେ ବଞ୍ଚି ଯାଇଥିଲେ। ସେ ୧୧A ନମ୍ବର ସିଟ୍‌ରେ ବସିଥିଲେ। ଏହା ବ୍ୟତୀତ ମେଡିକାଲ୍ ହଷ୍ଟେଲ ପରିସରରେ ମଧ୍ୟ ୨୦ ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା।