ମୁମ୍ବାଇ: ସବୁ ମ୍ୟାଚ୍ରେ ବଡ଼ ସ୍କୋର କରିବାକୁ ୨୩ କୋଟି ୭୫ ଲକ୍ଷ ଟଙ୍କା ମିଳିନାହିଁ ବୋଲି କହିଛନ୍ତି କୋଲକାତା ନାଇଟ ରାଇଡର୍ସର ଉପଅଧିନାୟକ ଭେଙ୍କଟେଶ ଆୟର । କେବଳ ରନ୍ ପାଇଁ ନୁହେଁ ବରଂ ଦଳକୁ ପ୍ରଭାବଶାଳୀ ଅବଦାନ ଉପରେ ଲକ୍ଷ୍ୟ ରଖିଛି ବୋଲି ସେ କହିଛନ୍ତି । ଆଇପିଏଲ ମୋଗା ନିଲାମୀରେ ଆୟରଙ୍କୁ କେକେଆର ରାଇଟ ଟୁ ମ୍ୟାଚ୍ (RTM) କାର୍ଡ ବ୍ୟବହାର କରି ରିଟେନ୍ କରିଥିଲା । ଏହା ପରେ ସେ ଦଳର ସବୁଠାରୁ ମହଙ୍ଗା ଏବଂ ଆଇପିଏଲରେ ତୃତୀୟ ସବୁଠାରୁ ମହଙ୍ଗା ଖେଳାଳି ହୋଇଥିଲେ ।
ଚଳିତ ଆଇପିଏଲ ସିଜିନର ପ୍ରଥମ ଦୁଇଟି ମ୍ୟାଚ୍ରେ ତାଙ୍କର ପ୍ରଦର୍ଶନ ଭଲ ନଥିଲା । ସେ କେବଳ ୯ ରନ୍ କରିଥିଲେ। ଏହା ପରେ ତାଙ୍କୁ କେକେଆର କାହିଁକି ଏତେ ଟଙ୍କା ଦେଇ ରିଟେନ୍ କରିଥିଲା ବୋଲି ପ୍ରଶ୍ନ ଉଠିଛି । ସନରାଇଜର୍ସ ହାଇଦ୍ରାବାଦ ବିପକ୍ଷରେ ୨୯ ବଲ୍ରୁ ୬୦ ରନର ବିସ୍ଫୋରକ ଇନିଂସ ଖେଳିବା ପରେ ଭେଙ୍କଟେଶ ସମାଲୋଚକଙ୍କୁ ମୁହଁତୋଡ ଜବାବ ଦେଇଛନ୍ତି । ସେ କହିଛନ୍ତି, ସବୁଠାରୁ ମହଙ୍ଗା ଖେଳାଳି ହେବାର ଅର୍ଥ ନୁହେଁ ଯେ ମୋତେ ପ୍ରତ୍ୟେକ ମ୍ୟାଚ୍ରେ ରନ୍ କରିବାକୁ ପଡିବ।
ତାଙ୍କ ଉପରେ ଚାପ ଅଛି କି ନାହିଁ ପ୍ରଶ୍ନରେ ଭେଙ୍କଟେଶ କହିଛନ୍ତି, ‘ଥରେ IPL ଆରମ୍ଭ ହେଲେ, ତୁମେ ୨୦ ଲକ୍ଷ ପାଉଛ କି ୨ ୦ କୋଟି ପାଉଛ ତାହା ଗୁରୁତ୍ୱପୂର୍ଣ୍ଣ ନୁହେଁ। ଜଣେ ଦଳୀୟ ଖେଳାଳି ଭାବରେ ମୋର ଲକ୍ଷ୍ୟ ହେଉଛି ଦଳର ବିଜୟରେ ଯୋଗଦାନ ଦେବା । ଅନେକ ସମୟରେ ଏପରି ଜଟିଳ ପରିସ୍ଥିତି ଉପୁଜେ ଯେଉଁଠାରେ ମୋର କାମ ହେଉଛି କିଛି ଓଭର ଖେଳି ଦଳକୁ ସ୍ଥିରତା ପ୍ରଦାନ କରିବା । ଯଦିଓ ମୁଁ ଏହା କରି ରନ କରିପାରି ନଥିଲି, ତଥାପି ମୁଁ ଦଳ ପାଇଁ କାମ କରିଥିଲି।’
ଆରସିବି ଏବଂ ମୁମ୍ବାଇ ବିପକ୍ଷରେ କେକେଆର ପ୍ରଦର୍ଶନକୁ ନେଇ ଦଳର ମଧ୍ୟକ୍ରମ ସମାଲୋଚନାର ଶିକାର ହୋଇଥିଲା । ଏହାକୁ ନେଇ ଭେଙ୍କଟେଶ କହିଛନ୍ତି, କେକେଆର ‘କାଲକୁଲେଟେଡ୍ ଆଗ୍ରେସନ୍’ ଉପରେ ଭରସା କରେ । ଆକ୍ରମଣାତ୍ମକ ଢ଼ଙ୍ଗରେ ଖେଳିବାର ଅର୍ଥ ନୁହେଁ ସବୁ ବଲ୍ରେ ଛକା ମାରିବା । କେତେବେଳେ ୨୫୦ ରନ୍ କରିବୁ ପୁଣି କେତେବେଳେ ୭୦ ରନ୍ରେ ଅଲଆଉଟ୍ ହେବା ଭଳି ଦଳ ହେବାକୁ ଆମେ ଚାହୁଁନୁ ।’ ଆଗାମୀ ମ୍ୟାଚ୍ରେ କେକେଆର, ସିଏସକେ ବିପକ୍ଷରେ ଖେଳିବ । ଏହି ମ୍ୟାଚ୍ରେ ଭେଙ୍କଟେସଙ୍କ ପ୍ରଦର୍ଶନ ଉପରେ ଖେଳପ୍ରେମୀଙ୍କ ନଜର ରହିବ ।
