ମନମୁଣ୍ଡା,୨/୮ : ବର୍ତ୍ତମାନ ଖରିଫ ଚାଷ ସମୟ । ସାରର ବହୁତ ଆବଶ୍ୟକତା ରହିଛି । ଏହାକୁ ଦୃଷ୍ଟିରେ ରଖି ଅନେକ ବିକ୍ରେତାମାନେ ସାରକୁ ଗୋଦାମରେ ଗଚ୍ଛିତ ରଖି ଅଭାବ ଥିବା ଦର୍ଶାଇ ଚଢ଼ା ଦରରେ ସାର ବିକ୍ରୟ କରୁଥିବା ବିଭିନ୍ନ ସମୟରେ ଅଭିଯୋଗ ଶୁଣିବାକୁ ମିଳୁଛି । ଠିକ୍ ସମୟରେ ବିଲରେ ସାର ନ ଦେଲେ ଫସଲ ନଷ୍ଟ ହେବାର ଆଶଙ୍କା କରି ନିରୀହ ଚାଷୀମାନେ ଚଢ଼ା ଦରରେ ସାର କ୍ରୟ କରିବାକୁ ବାଧ୍ୟ ହେଉଥିବା ଜାଣିବାକୁ ମିଳିଛି । କିନ୍ତୁ ବର୍ତ୍ତମାନ ସମୟରେ ମନମୁଣ୍ଡା ଥାନା ଅଞ୍ଚଳରେ ଭେଜାଲ ତଥା ମାଟି, ଗୋଡ଼ି ମିଶ୍ରିତ ନକଲି ସାର ବିକ୍ରୟ ହେଉଥିବା ଜାଣିବାକୁ ମିଳିଛି । ଏପରି ଏକ ଘଟଣା ଆଜି ଏହି ଥାନା ମନୁପାଲି ପଞ୍ଚାୟତରେ ହୋଇଥିବା ଥାନାରେ ଅଭିଯୋଗ ହୋଇଛି।
ସୂଚନା ଅନୁସାରେ, କିଛି ଦିନ ହେବ ଏକ ବୋଲେରୋ ପିକ ଅପ ଗାଡ଼ିରେ ହିନ୍ଦୀ ଭାଷାରେ କହୁଥିବା କେତେକ ଲୋକ ମନମୁଣ୍ଡା ଥାନା ଅଞ୍ଚଳରେ ' ଉତ୍ତମ କିଶାନ ' ସାର ଏବଂ ' ପଟାସ ' ବଜାର ମୂଲ୍ୟ ଠାରୁ କମ୍ ଦରରେ ବିକ୍ରି କରୁଥିବା ଦେଖି ଅନେକ ଚାଷୀ ଲୋଭରେ ପଡ଼ି ତାହା କ୍ରୟ କରିଥିଲେ। ଅନ୍ୟ ଚାଷୀମାନଙ୍କ ପରି ମନୁପାଲି ଗ୍ରାମର ଶ୍ୟାମ ସୁନ୍ଦର ମଲ୍ଲିକ ଏବଂ ପୁଡୁଗପଥର ଗ୍ରାମର ବୀରମିତ୍ର ଭୋଇ ଶୁକ୍ରବାର ଉକ୍ତ ଗାଡ଼ି ବାଲାଠାରୁ ୭ବସ୍ତା ଉତ୍ତମ କିଶାନ ସାର ଏବଂ ୨ବସ୍ତା କିଣିଥିଲେ ।
