ଦାରିଙ୍ଗବାଡି,୨/୮ : ପୋକ ସାଲୁବାଲୁ ଚାଉଳରୁ ଭାତ ପ୍ରସ୍ତୁତ କରି କୋମଳମତି ଶିଶୁଙ୍କୁ ଖାଇବାକୁ ଦେଉଛନ୍ତି ଅଙ୍ଗନବାଡ଼ି ଦିଦି । ଏଭଳି କି ଶିଶୁଙ୍କୁ ଗୋଟିଏ ଅଣ୍ଡା ଜାଗାରେ ଫାଳେ ଅଣ୍ଡା ଦେବା ସହ ପିଲାଙ୍କୁ ଅଙ୍ଗନବାଡ଼ିରେ ଆଡ଼ମିଶନ କରିବାକୁ ମନା କରୁଛନ୍ତି । ଗର୍ଭବତୀ ମହିଳାଙ୍କ ରେଜିଷ୍ଟ୍ରେସନ ମଧ୍ୟ ସଠିକ୍ ଭାବେ କରୁନାହାନ୍ତି କର୍ମୀ । ଫଳରେ ଶନିବାର ଅଙ୍ଗନବାଡ଼ି କେନ୍ଦ୍ରରେ ଦେଖାଦେଇଥିଲା ଅପ୍ରୀତିକର ପରିସ୍ଥିତି । ମହିଳାମାନେ ଉତ୍ୟକ୍ତ ହୋଇ ଅଙ୍ଗନବାଡ଼ି କେନ୍ଦ୍ରରେ ତାଲା ପକାଇ ଥିବା ଦେଖିବାକୁ ମିଳିଛି । ଦାରିଙ୍ଗବାଡି ପଞ୍ଚାୟତ ମାହାଡଗାଣ୍ଡା ଅଙ୍ଗନବାଡ଼ି-୨ ରେ ଦେଖିବାକୁ ମିଳିଛି କିଛି ଏଭଳି ଦୃଶ୍ୟ ।
ଏହି ଅଙ୍ଗନବାଡ଼ି କେନ୍ଦ୍ରରେ ଅଙ୍ଗନବାଡ଼ି କର୍ମୀ ଶିବାଜିନି ପ୍ରଧାନ ମନମାନି କରୁଥିବା ମହିଳାମାନେ ଅଭିଯୋଗ କରିଛନ୍ତି । ଶିଶୁଙ୍କୁ ପୋକ ସାଲୁବାଲୁ ଚାଉଳରେ ପ୍ରସ୍ତୁତ ଅସ୍ୱାସ୍ଥ୍ୟକର ଭାବେ ଭାତ ଦେଉଛନ୍ତି । ପିଲାଙ୍କୁ ଗୋଟିଏ ଅଣ୍ଡା ସ୍ଥାନରେ ଫାଳେ ଆଉ ଯିଏ ବିଳମ୍ବରେ ଆସୁଚି ତାକୁ ଅଣ୍ଡା ଆଦୌ ଦେଉ ନାହାନ୍ତି । ଏଭଳି କି ଗର୍ଭବତୀ ମହିଳାଙ୍କ ରେଜିଷ୍ଟ୍ରେସନ ସଠିକ୍ ଭାବେ କରୁ ନ ଥିବା ମହିଳାମାନେ ଅଭିଯୋଗ କରିଛନ୍ତି । ପ୍ରସୂତି ଓ ଗର୍ଭବତୀ ମହିଳାଙ୍କ ପାଇଁ ଯାହା ଖାଦ୍ୟ ଆସୁଛି ସେ ସବୁ ଖାଦ୍ୟକୁ ହଡ଼ପ କରୁଛନ୍ତି ଅଙ୍ଗନବାଡ଼ି କର୍ମୀ । ଫଳରେ କୁପୋଷଣର ସ୍ବୀକାର ହେଉଛନ୍ତି ଶିଶୁ । ଏଭଳି ଭାବେ ଦୀପ ତଳ ଅନ୍ଧାର ଭଳି ସିଡିପିଓ କାର୍ଯ୍ୟାଳୟଠାରୁ ମାତ୍ର ୨୦୦ମିଟର ଦୂରରେ ରହିଥିବା ଅଙ୍ଗନବାଡ଼ିର ଅବସ୍ଥା ଯଦି ଏମିତି ଉପାନ୍ତ ଅଞ୍ଚଳରେ ରହିଥିବା ଅଙ୍ଗନବାଡ଼ିର ଅବସ୍ଥା କେମିତି ଥିବ ତାହା ଜଳ ଜଳ ହୋଇ ଜଣାପଡ଼ୁଛି ।
କର୍ମୀଙ୍କ ମନମାନିରେ ଅତିଷ୍ଟ ହୋଇ ମହିଳାମାନେ ଉତ୍ୟକ୍ତ ହୋଇ ଅଙ୍ଗନବାଡ଼ି ସହ ଯୁକ୍ତିତର୍କ କରିଥିଲେ । ବାରମ୍ବାର ଅଭିଯୋଗ ପରେ ବି ଅଙ୍ଗନବାଡ଼ି କର୍ମୀ ସୁଧୁରୁ ନ ଥିବା ମହିଳାମାନେ ଅଭିଯୋଗ କରିଥିଲେ । ଅଙ୍ଗନବାଡ଼ି କର୍ମୀ ନିଜର ମନମାନି ଅଧିକ କରିବା ଯୋଗୁଁ ଶନିବାର ବାଧ୍ୟ ହୋଇ ମହିଳାମାନେ କେନ୍ଦ୍ରରେ ତାଲା ପକାଇଛନ୍ତି। ଯେଉଁ ପର୍ଯ୍ୟନ୍ତ ସମସ୍ୟାର ସମାଧାନ ନ ହୋଇଛି ସେ ପର୍ଯ୍ୟନ୍ତ ତାଲା ଖୋଲିବ ନାହିଁ ବୋଲି ମହିଳାମାନେ ଜିଦରେ ଅଟଳ ରହିଥିଲେ । ଅଙ୍ଗନବାଡ଼ି କର୍ମୀ ସିବାଜିନି ପ୍ରଧାନଙ୍କୁ ପଚାରିବାରୁ ସେ ଅଭିଯୋଗ ଭିତ୍ତିହୀନ ବୋଲି କହିଥିଲେ । ସିଡିପିଓ ସନ୍ଧ୍ୟାରାଣୀ ପଣ୍ଡାଙ୍କୁ ପଚାରିବାରୁ ସେ କହିଲେ ଯାଞ୍ଚ କମିଟି ଯାଞ୍ଚ କରିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ ।
