ନୂଆଦିଲ୍ଲୀ: କେଦାରନାଥ ମନ୍ଦିରରେ ଅଣହିନ୍ଦୁଙ୍କ ପ୍ରବେଶକୁ ପ୍ରତିବନ୍ଧିତ କରିବା ପାଇଁ ଉତ୍ତରାଖଣ୍ଡର ବିଜେପି ନେତ୍ରୀ ଆଶା ନୌଟିୟାଲଙ୍କ ମନ୍ତବ୍ୟ ବିବାଦ ସୃଷ୍ଟି କରିଛି । କେଦାରନାଥ ବିଧାୟକ ଅଭିଯୋଗ କରିଛନ୍ତି ଯେ, କିଛି ଅଣହିନ୍ଦୁ ବ୍ୟକ୍ତି ଧାର୍ମିକ ସ୍ଥଳର ପବିତ୍ରତାକୁ କ୍ଷତି ପହଞ୍ଚାଇବାକୁ ଚେଷ୍ଟା କରୁଛନ୍ତି । ଏହାର ଜାବବରେ ଉତ୍ତରାଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହରିଶ ରାୱତ କହିଛନ୍ତି ଯେ, ବିଜେପି ନେତାମାନେ ଚାଞ୍ଚଲ୍ୟକର ମନ୍ତବ୍ୟ ଦେବାର ଅଭ୍ୟାସ ରଖିଛନ୍ତି। କିଛି ଅଣହିନ୍ଦୁ ତତ୍ତ୍ୱ କେଦାରନାଥ ଧାମର ପବିତ୍ରତାକୁ କ୍ଷତି ପହଞ୍ଚାଇବାକୁ ଚେଷ୍ଟା କରୁଛନ୍ତି ବୋଲି ନୌଟିୟାଲ କହିଛନ୍ତି ।
କିଛି ବ୍ୟକ୍ତି ଏହି ଅଞ୍ଚଳରେ ମାଂସ, ମାଛ ଏବଂ ମଦ୍ୟପାନ କରୁଥିଲେ କି ନାହିଁ ପ୍ରଶ୍ନରେ ସେ କହିଛନ୍ତି ଯେ, ଉପଯୁକ୍ତ ତଦନ୍ତ ପରେ ହିଁ ଏହା ଜଣାପଡ଼ିବ। ଯଦି କିଛି ଲୋକ କେଦାରନାଥ ଧାମର ପ୍ରତିଛବିକୁ ଖରାପ କରୁଛନ୍ତି, ତେବେ ସେମାନଙ୍କର ପ୍ରବେଶକୁ ନିଷେଧ କରାଯିବା ଉଚିତ । ସେମାନେ ନିଶ୍ଚିତ ଭାବରେ ଅଣହିନ୍ଦୁ ଯେଉଁମାନେ ବାହାରୁ ଆସି କେଦାରନାଥ ଧାମକୁ ଖରାପ କରିବା ପାଇଁ ଏପରି କାର୍ଯ୍ୟକଳାପରେ ସାମିଲ ହୁଅନ୍ତି । ସେ କହିଛନ୍ତି ଯେ, ଏହି ବିଷୟରେ ମନ୍ତ୍ରୀ ସୌରଭ ବହୁଗୁଣା ସ୍ଥାନୀୟ କର୍ତ୍ତୃପକ୍ଷ ଏବଂ ବାସିନ୍ଦାଙ୍କ ସହିତ ଏକ ବୈଠକ କରିଥିଲେ । ବୈଠକ ସମୟରେ, କିଛି ଅଂଶଗ୍ରହଣକାରୀ ପରାମର୍ଶ ଦେଇଥିଲେ ଯେ କିଛି ଅଣହିନ୍ଦୁ ବ୍ୟକ୍ତି କେଦାରନାଥ ମନ୍ଦିରର ପ୍ରତିଷ୍ଠାକୁ ଖରାପ କରିବାକୁ ଚେଷ୍ଟା କରୁଛନ୍ତି । ଏପରି ବ୍ୟକ୍ତିମାନଙ୍କୁ ଚିହ୍ନଟ କରି ମନ୍ଦିର ପ୍ରବେଶରୁ ବାରଣ କରାଯିବା ଉଚିତ ବୋଲି ପ୍ରସ୍ତାବ ଦିଆଯାଇଥିଲା ।
ନୌଟିୟାଲଙ୍କ ମନ୍ତବ୍ୟ ଉପରେ ପ୍ରତିକ୍ରିୟା ଦେଇ କଂଗ୍ରେସ ନେତା ଏବଂ ପୂର୍ବତନ ମୁଖ୍ୟମନ୍ତ୍ରୀ ହରିଶ ରାୱତ କହିଛନ୍ତି, ‘ଚିନ୍ତାଜନକ ମନ୍ତବ୍ୟ ଦେବା ବିଜେପି ନେତାମାନଙ୍କର ଏକ ଅଭ୍ୟାସ । ଉତ୍ତରାଖଣ୍ଡ ଏକ ଦେବଭୂମି ଏବଂ ଆପଣ କେତେଦିନ ପର୍ଯ୍ୟନ୍ତ ସବୁକିଛି ଧର୍ମ ସହିତ ଯୋଡ଼ିବେ ? ସେମାନେ ଏପରି କରୁଛନ୍ତି କାରଣ ସେମାନଙ୍କ ପାଖରେ ଲୋକମାନଙ୍କୁ କହିବା ପାଇଁ କିଛି ନାହିଁ।’
ଏପ୍ରିଲ ୩୦ ତାରିଖରେ ଅକ୍ଷୟ ତୃତୀୟା ଅବସରରେ ଚାରିଧାମ ଯାତ୍ରା ଆରମ୍ଭ ହେବାର କାର୍ଯ୍ୟକ୍ରମ ରହିଛି । ଏହି ଦିନ ଗଙ୍ଗୋତ୍ରୀ ଏବଂ ଯମୁନୋତ୍ରୀ ଧାମର ଦ୍ୱାର ଖୋଲାଯିବ । ମେ ୨ ତାରିଖରେ କେଦାରନାଥ ଧାମ ଏବଂ ମେ ୪ ତାରିଖରେ ବଦ୍ରିନାଥ ଧାମର ଦ୍ୱାର ଖୋଲିବ ।
