ନୂଆଦିଲ୍ଲୀ,୨୭/୦୭:ଆମେରିକାର ମିଶିଗନରେ ଅଘଟଣ। ୱାଲମାର୍ଟକୁ ସପିଂ ପାଇଁ ଯାଇଥିବା ଲୋକଙ୍କ ଉପରେ ଅତର୍କିତ ଛୁରାମାଡ଼ । ଫଳରେ ୧୧ ଜଣ ଆହତ ହୋଇଥିବା ବେଳେ ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ହଠାତ୍ ଛୁରାମାଡ଼ ଯୋଗୁଁ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ସେପଟେ ପୁଲିସ ସହିତ ୱାଲମାର୍ଟ ସୁରକ୍ଷା କର୍ମୀମାନେ ଅଭିଯୁକ୍ତକୁ କାବୁ କରି ଗିରଫ କରି ଘଟଣାର ତଦନ୍ତ ଜାରି ରଖିଛି ।
ଏଏନଆଇ ରିପୋର୍ଟ ଅନୁଯାୟୀ, ଏହି ଘଟଣାଟି ୨୬ ଜୁଲାଇରେ ଭାରତୀୟ ସମୟ ସନ୍ଧ୍ୟା ୫ ଟାରେ ହୋଇଥିଲା । ମିଶିଗନର ଟ୍ରାଭର୍ସ ସିଟିର କ୍ରସିଂ ସର୍କଲ ରୋଡରେ ଥିବା ୱାଲମାର୍ଟ ସୁପରସେଣ୍ଟରରେ ଏହି ଘଟଣା ଘଟିଥିଲା। ଏହି ଆକ୍ରମଣରେ ଅତି କମରେ ୧୧ଜଣ ଆହତ ହୋଇଥିଲେ, ଯେଉଁଥିରୁ ୩ ଜଣ ଗୁରୁତର ଆହତ ହୋଇଥିଲେ । ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ଫାର୍ମାସି କାଉଣ୍ଟର ନିକଟରେ ଆକ୍ରମଣ ହୋଇଥିଲା ଏବଂ ଆହତମାନଙ୍କ ମଧ୍ୟରୁ ଅଧିକାଂଶ ବୃଦ୍ଧ। ଆକ୍ରମଣକାରୀ ପ୍ରଥମେ ଦୋକାନ ଭିତରେ ପଶି ଛୁରୀରେ ଆକ୍ରମଣ କରିଥିଲେ ଯାହା ଫଳରେ ଦୋକାନୀ ଏବଂ ଲୋକମାନେ ଜୀବନ ବଞ୍ଚାଇବାକୁ ଦୌଡ଼ିଥିଲେ। ମିଶିଗନ ଷ୍ଟେଟ୍ ପୁଲିସ କହିଛି ଯେ ଅଭିଯୁକ୍ତକୁ ଗିରଫ କରାଯାଇଛି। ଗ୍ରାଣ୍ଡ ଟ୍ରାଭର୍ସ କାଉଣ୍ଟି ସେରିଫ୍ ଅଫିସ୍ ଆକ୍ରମଣର ତଦନ୍ତ କରୁଛି। ଏଫବିଆଇର ଡେପୁଟି ଡାଇରେକ୍ଟର ଡାନ୍ ବୋଙ୍ଗିନୋ ଏକ ଟ୍ୱିଟ୍ ମାଧ୍ୟମରେ ଘୋଷଣା କରିଛନ୍ତି ଯେ, ଏଫବିଆଇ ଗ୍ରାଣ୍ଡ ଟ୍ରାଭର୍ସ କାଉଣ୍ଟି ସେରିଫ୍ ଅଫିସ୍ କୁ ତଦନ୍ତରେ ସହାୟତା କରିବ। ୱାଲମାର୍ଟର କର୍ପୋରେଟ୍ ମୁଖପାତ୍ର ଜୋ ପେନିଂଟନ୍ କହିଛନ୍ତି ଯେ, କମ୍ପାନୀ ତଦନ୍ତରେ ପୁଲିସକୁ ଯଥାସମ୍ଭବ ସହଯୋଗ କରିବ। ଅନ୍ୟପକ୍ଷରେ, ଏହି ଘଟଣା ପରେ ସୋସିଆଲ ମିଡିଆରେ ୟୁଜର୍ସଙ୍କ ପ୍ରତିକ୍ରିୟା ଆସିଛି।
