ନୂଆଦିଲ୍ଲୀ ୨୭/୦୭: ବିଶ୍ୱର ସବୁଠୁ ବୟସ୍କ ରାଷ୍ଟ୍ରପତି ଯିଏକି ବିଗତ ୪୩ ବର୍ଷ ହେଲା ଏହି ପଦବୀରେ ରହିଛନ୍ତି। ଏବେ ୯୨ ବର୍ଷ ବୟସରେ ୮ମ ଥର ରାଷ୍ଟ୍ରପତି ହେବାକୁ ପ୍ରସ୍ତୁତି ଚଳାଇଛନ୍ତି । ସେ ହେଉଛନ୍ତି କ୍ୟାମେରୁନ୍ର ରାଷ୍ଟ୍ରପତି ପଲ୍ ବିୟା । ୧୯୮୨ ମସିହାରେ ପଲ୍ ପ୍ରଥମ ଥର ଏହି ମଧ୍ୟ ଆଫ୍ରିକୀୟ ଦେଶର ରାଷ୍ଟ୍ରପତି ଭାବେ ଶାସନ ଭାର ବହନ କରିଥିଲେ । ସେବେଠୁ ସେ ନିର୍ବାଚନ ହାରିନାହାନ୍ତି । ବିଶ୍ୱର ସବୁଠୁ ବୟସ୍କ ରାଷ୍ଟ୍ରାଧ୍ୟକ୍ଷ ଭାବେ କ୍ୟାମେରୁନ ରାଷ୍ଟ୍ରପତି ପଲ୍ ଆସନ୍ତା ଅକ୍ଟୋବରରେ ପୁନଃ ନିର୍ବାଚନ ଲଢ଼ିବାକୁ ଦାବି କରିଛନ୍ତି । ଏହା ଜରିଆରେ ତାଙ୍କ ଶାସନ ଆଗକୁ ମଧ୍ୟ ଜାରି ରହିବ ।
୯୨ ବର୍ଷୀୟ ପଲ୍ କହନ୍ତି, ସେ ଆଗାମି ୭ ବର୍ଷ ପର୍ଯ୍ୟନ୍ତ ଅର୍ଥାତ୍ ହାରାହାରି ୧୦୦ ବର୍ଷ ବୟସ ପର୍ଯ୍ୟନ୍ତ ରାଷ୍ଟ୍ରପତି ପଦରେ ରହିପାରିବେ । ପଲ୍ ସୋସିଆଲ ମିଡିଆ ପ୍ଲାଟ୍ଫର୍ମ ଏକ୍ସରେ ଘୋଷଣା କରିଛନ୍ତି, ଚଳିତ ବର୍ଷ ଅକ୍ଟୋବରରେ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ସେ ପ୍ରାର୍ଥୀ ହେବେ । ସେ କହିଛନ୍ତି, ୧୦ କ୍ୟାମେରୁନ୍ କ୍ଷେତ୍ର ଓ ପ୍ରବାସୀ ସମୁଦାୟରୁ ଅନେକ ଆଗ୍ରହପୂର୍ଣ୍ଣ ଆହ୍ୱାନ ପରେ ସେ ନିର୍ବାଚନ ଲଢ଼ିବାକୁ ନିଷ୍ପତ୍ତି ନେଇଛନ୍ତି । ଦୀର୍ଘ ୪ ଦଶନ୍ଧିର ଶାସନରେ ପଲ୍ଙ୍କୁ ଠକେଇ, ଜାଲିଆତି, ଭ୍ରଷ୍ଟାଚାର, କୁଶାସନ ଓ ଅସୁରକ୍ଷା ଭଳି ମୁଦ୍ଦାକୁ ନେଇ ସମାଲୋଚନାର ସାମ୍ନା କରିବାକୁ ପଡ଼ିଛି । ୨୦୦୮ରେ ଲୋକତାନ୍ତ୍ରିକ ପତନ ଯୋଗୁ କାର୍ଯ୍ୟକାଳ ସୀମା ସମାପ୍ତ କରି ଦିଆଯାଇଥିଲା । ଫଳରେ ତାଙ୍କୁ ଲତାତାର ପୁନଃ ନିର୍ବାଚିତ ହେବାର ସୁଯୋଗ ମିଳିଲା ।
ପଲ୍ଙ୍କ ସ୍ୱାସ୍ଥ୍ୟ ଓ ଶାସନ କରିବାର କ୍ଷମତାକୁ ନେଇ ମଧ୍ୟ ଚିନ୍ତା ବ୍ୟକ୍ତି କରାଯାଉଛି । ଗତ ବର୍ଷ ୬ ସପ୍ତାହ ଧରି ଜନତାଙ୍କ ନଜରରୁ ସେ ରହସ୍ୟମୟୀ ଢଙ୍ଗରେ ଦୂରେଇ ରହିଥିଲେ । ଏହା ପରେ ତାଙ୍କ ସ୍ୱାସ୍ଥ୍ୟ ଉପରେ ଖୁବ୍ ଚର୍ଚ୍ଚା ହେଲା, ଯାହା ଉପରେ ଅଧିକାରୀମାନେ ପ୍ରତିବନ୍ଧକ ଲଗାଇଥିଲେ । ପଲ୍ ଦୀର୍ଘ ସମୟ ଧରି ବିଦେଶରେ ରହିବା ପାଇଁ ମଧ୍ୟ ଚର୍ଚ୍ଚାରେ ରହିଛନ୍ତି । ୨୦୧୮ରେ ଦୀର୍ଘ ଦୁଇ ବର୍ଷରୁ ଅଧିକ ସମୟ ପରେ ପ୍ରଥମ ଥର ସେ କ୍ୟାବିନେଟ୍ ବୈଠକ କରିଥିଲେ । ସଂଗଠିତ ଅପରାଧ ଓ ଭ୍ରଷ୍ଟାଚାର ରିପୋର୍ଟିଂ ପ୍ରୋଜେକ୍ଟ ଦ୍ୱାରା ସମର୍ଥିତ ଏକ ଯାଞ୍ଚ୍ରୁ ଜଣାପଡ଼ିଥିଲା, ପଲ୍ ୨୦୦୬ରୁ ୨୦୦୯ ମଧ୍ୟରେ ବର୍ଷର ଏକ ତୃତୀୟାଂଶ ସମୟ ବିଦେଶରେ ବିତାଇଥିଲେ ।
