ନୂଆଦିଲ୍ଲୀ: ପାକିସ୍ତାନରେ ଦିନକୁ ଦିନ ଉପୁଜୁଥିବା ବିଶୃଙ୍ଖଳିତ ପରିସ୍ଥିତିକୁ ଅନୁଧ୍ୟାନ କରି ଆମେରିକା ସତର୍କ ହୋଇପଡିଛି । ଏଠାରେ ଥିବା ଆମେରିକୀୟ ଦୂତାବାସ ଏକ ସୁରକ୍ଷା ଆଲର୍ଟ ଜାରି କରିଛି । ଏହାର ନାଗରିକ ମାନଙ୍କୁ ଉତ୍ତର-ପଶ୍ଚିମ  ପାକିସ୍ତାନର ଖୈବର ପଖତୁନଖଓ୍ବା ପ୍ରଦେଶର ରାଜଧାନୀ ପେଶୱାରକୁ ଡିସେମ୍ବର ୧୬ ପର୍ଯ୍ୟନ୍ତ ପରିଦର୍ଶନ ନକରିବାକୁ ପରାମର୍ଶ ଦେଇଛି । ସୁରକ୍ଷା କାରଣରୁ ପରିଦର୍ଶନ ନକରିବାକୁ ଏଥିରେ କୁହାଯାଇଛି । ସେରେନା ହୋଟେଲ ପେଶାଓ୍ବାର ପାଇଁ ବିପଦ ବୋଲି ଆମେରିକା କହିଛି । ଆମେରିକାର ଦୂତାବାସ କର୍ମଚାରୀଙ୍କୁ ପେଶୱାରର ଏହି ହୋଟେଲ ପରିଦର୍ଶନ ନକରିବାକୁ ଏବଂ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି।

ଆମେରିକାର ଦୂତାବାସ ବିବୃତ୍ତିରେ କୁହାଯାଇଛି ଯେ, ଏହି ସମୟ ମଧ୍ୟରେ ହୋଟେଲ ଏବଂ ଏହାର ଆଖପାଖ ଅଞ୍ଚଳରୁ ଦୂରେଇ ରହିବା ଏବଂ ପରିଦର୍ଶନ ଯୋଜନାକୁ ପୁନର୍ବିଚାର କରିବା ପାଇଁ ସେମାନଙ୍କୁ ପରାମର୍ଶ ଦିଆଯାଇଛି।

ସୂଚନାଥାଉକି, ଜେଲରେ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ମୁକ୍ତି ଦାବିରେ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ଦଳ ବିରୋଧ ପ୍ରଦର୍ଶନ କରିଛି । ଏହି ସମୟ ମଧ୍ୟରେ ଅନେକ ବିକ୍ଷୋଭକାରୀଙ୍କୁ ହତ୍ୟା କରାଯାଇଛି ଏବଂ ଏହାକୁ ଲୁଚାଇବାକୁ ଉଦ୍ୟମ ହେବାର ଖବର ପାଇବା ପରେ ଜଣେ ଭାରତୀୟ-ଆମେରିକୀୟ ସାଂସଦ ପାକିସ୍ତାନର ବରିଷ୍ଠ ଅଧିକାରୀଙ୍କ ଭିସା ଉପରେ ପ୍ରତିବନ୍ଧକ ଲଗାଇବା ଏବଂ ସେମାନଙ୍କ ସମ୍ପତ୍ତି ଜବତ କରିବାକୁ ଦାବି କରିଛନ୍ତି।

ଭାରତୀୟ-ଆମେରିକୀୟ କଂଗ୍ରେସ କର୍ମୀ ରୋ ଖାନ୍ନା କହିଛନ୍ତି ଯେ ଶାନ୍ତିପୂର୍ଣ୍ଣ ପ୍ରଦର୍ଶନକାରୀଙ୍କ ହତ୍ୟାକାଣ୍ଡକୁ ଲୁଚାଇବା ପାଇଁ ପାକିସ୍ତାନୀ ସେନା ମୁଖ୍ୟ ଅସୀମ ମୁନିଙ୍କ ପ୍ରଶାସନର ଉଦ୍ୟମ ମୋତେ ଆଶ୍ଚର୍ଯ୍ୟ କରିଛି ।