ଭୁବନେଶ୍ୱର,୧୧/୧୨: ଷଷ୍ଠ ରାଜ୍ୟସ୍ତରୀୟ ପୁସ୍ତକ ମହୋତ୍ସବର ୫ମ ଦିନରେ ପେନ୍ ଇନ୍ ବୁକ୍ସ ପକ୍ଷରୁ ପୁସ୍ତକ ଉନ୍ମୋଚନ ପର୍ବ ଅନୁଷ୍ଠିତ ହୋଇଯାଇଛି । ବରିଷ୍ଠ ସାମ୍ବାଦିକ ଉପେନ୍ଦ୍ର ପ୍ରସାଦ ମହଲାଙ୍କ ଦ୍ୱାରା ଲିଖିତ ‘ଇନୋଭେଟିଭ୍ ନ୍ୟୁଜ୍ମେକର୍ସ ବ୍ଲୁପ୍ରିଣ୍ଟ୍ ଫର ସକ୍ସେସ୍’ ପୁସ୍ତକ ପାଠକାର୍ପିତ ହୋଇଯାଇଛି । ମୁଖ୍ୟ ଅତିଥି ଭାବେ ପ୍ରମେୟ ଓ ନ୍ୟୁଜ୭ ଗ୍ରୁପ ଏଡିଟର୍ ଗୋପାଳକୃଷ୍ଣ ମହାପାତ୍ର ଯୋଗଦେଇ ପୁସ୍ତକ ଉନ୍ମୋଚନ କରିଥିଲେ । ସେ କହିଥିଲେ, ସାହିତ୍ୟ ଓ ସାମ୍ବାଦିକତା ପରସ୍ପର ପରିପୂରକ । ଜଣେ ସାମ୍ବାଦିକ ନିଜର ଶବ୍ଦ ଚାତୁରୀ ମାଧ୍ୟମରେ ଭଲ ସାହିତ୍ୟ ଲେଖିପାରିବ । ସେହିପରି ଖବରକାଗଜ କେବେ ବନ୍ଦ ହେବନାହିଁ । ଏହା ବନ୍ଦ ହେବା ଅସମ୍ଭବ । ଯେତେ ପ୍ରତିଯୋଗିତାପୂର୍ଣ୍ଣ ପରିବେଶ ଆସିବ ଖବରକାଗଜ ସେତେ ସୁଦୃଢ଼ ହେବ । ଏହାର ମାନ ସେତେ ବୃଦ୍ଧି ପାଇବ । କାରଣ ଖବରକାଗଜର ସମକକ୍ଷ କେହି ହୋଇପାରିବେ ନାହିଁ ।
ଶ୍ରୀ ମହାପାତ୍ର ଆହୁରି କହିଥିଲେ, ଏହି ପୁସ୍ତକ ସାମ୍ବିଦକତାର ସବୁ ଦିଗକୁ ସ୍ପର୍ଶ କରିପାରିଛି । ଏଭଳି ପୁସ୍ତକ ସମ୍ଭବତଃ କେହି ଲେଖିନାହାନ୍ତି । ଇଲେକ୍ଟ୍ରୋନିକ୍ସ ମିଡିଆ, ସୋସିଆଲ ମିଡିଆ ଏବଂ ପ୍ରିଣ୍ଟ ମିଡିଆ ଭଳି ଅନେକ ବିଭବକୁ ଆଧାର କରି ଏହି ପୁସ୍ତକ ଲେଖାଯାଇଛି । ନୂଆପିଢ଼ିର ସାମ୍ବାଦିକତା କରୁଥିବା ଛାତ୍ରଛାତ୍ରୀଙ୍କ ପାଇଁ ପୁସ୍ତକଟି ବହୁତ ଉପାଦେୟ ହେବ । ମୁଖ୍ୟବକ୍ତା ଭାବେ ଲେଖକ ଭୀମ ପୃଷ୍ଟି ଯୋଗଦେଇ ସାମ୍ବାଦିକତା କିଭଳି ଲେଖିବା ଲାଗି ତାଙ୍କୁ ପ୍ରେରଣା ଦେଇଥିଲା ତାହା ଉପରେ ଆଲୋଚନା କରିଥିଲେ । ସୋସିଆଲ ମିଡିଆ ଯୁଗରେ ପ୍ରିଣ୍ଟ ମିଡିଆ ମୁଣ୍ଡ ଟେକି ଛିଡ଼ା ହୋଇଛି । ପ୍ରିଣ୍ଟ ମିଡିଆ ଖବର ପଢ଼ିଲେ ମଣିଷ ମସ୍ତିଷ୍କ ପ୍ରଭାବିତ ହେବ । କିଛି ନୂଆ କରିବା ଲାଗି ଚିନ୍ତା ସୃଷ୍ଟି ହେବ । ସାମ୍ବାଦିକ ଲେଖକ ସ୍ୱାଧୀନ ମତ ଦେଲେ ବାସ୍ତବକଥା ସାହିତ୍ୟରେ ପ୍ରତିଫଳିତ ହେବ ବୋଲି ସେ କହିଥିଲେ । ଉନ୍ମୋଚିତ ପୁସ୍ତକର ଲେଖକ ଶ୍ରୀ ମହଲା ଏହାର ବିଷୟବସ୍ତୁ ଉପରେ ଆଲୋଚନା କରିଥିଲେ । ଏହି ପୁସ୍ତକ ଥିଓରି ଏବଂ ପ୍ରାକ୍ଟିକାଲ ବିଷୟ ଉପରେ ଆଧାରିତ । ଶ୍ରୀ ମହଲା ଲେଖକୀୟ ଅନୁଭୂତି ପ୍ରଦାନ କରି କହିଥିଲେ, ସାମ୍ବାଦିକତା ସତ୍ୟ, ଦୃଢ଼ ଏବଂ ନିରପେକ୍ଷ ନହେଲେ ଗଣତନ୍ତ୍ର ତିଷ୍ଠିପାରିବ ନାହିଁ । ଏହି ପୁସ୍ତକ ସାମ୍ବାଦିକ, ସାମ୍ବାଦିକତା ପଢ଼ୁଥିବା ଛାତ୍ରଛାତ୍ରୀ, ବୁଦ୍ଧିଜୀବୀ, ଲେଖକଙ୍କୁ ସାମ୍ବାଦିକତାର ବିଭିନ୍ନ ଦିଗ ବିଷୟରେ ସଚେତନତା କରାଇବ ।
ପେନ୍ ଇନ୍ ବୁକ୍ସର ନିର୍ଦ୍ଦେଶକ ଶୁଭ୍ରାଂଶୁ ପଣ୍ଡା କାର୍ଯ୍ୟକ୍ରମରେ ଅଧ୍ୟକ୍ଷତା କରି କହିଥିଲେ, ଏହି ପୁସ୍ତକ ସମସ୍ତଙ୍କ ପାଇଁ ଗୁରୁତ୍ୱପୂର୍ଣ୍ଣ । ବିଭିନ୍ନ ବିଭାଗରେ ଶହ ଶହ ପୁସ୍ତକ ଲେଖାଯାଉଛି । କିନ୍ତୁ ନିଜ କର୍ମକ୍ଷେତ୍ରରେ ସାଉଣ୍ଟିଥିବା ଅଭିଜ୍ଞତା ବିଷୟରେ ପୁସ୍ତକ ଲେଖିବା ଲୋକ ବହୁତ କମ୍ । ଏଭଳି ପୁସ୍ତକ ଅଧିକରୁ ଅଧିକ ଛପା ଯିବା ଜରୁରି । ଏହି ପୁସ୍ତକ ଠିକ୍ ସେହି ଭଳି ଅଭିଜ୍ଞତାକୁ ନେଇ ଲେଖା ହୋଇଛି । କାର୍ଯ୍ୟକ୍ରମ ପରିଚାଳନା କରିଥିଲେ କବି ପବିତ୍ର ମୋହନ କର । ପୁସ୍ତକ ମେଳାରେ ପ୍ରମେୟ ପକ୍ଷରୁ କୁଇଜ୍ ପ୍ରତିଯୋଗିତା ପୁସ୍ତକ ମେଳାରେ ପ୍ରମେୟ ଷ୍ଟଲ ପକ୍ଷରୁ ଆରମ୍ଭ ହେବାକୁ ଯାଉଛି କୁଇଜ୍ ପ୍ରତିଯୋଗିତା । ଏହା ବୁଧବାରଠାରୁ ଆରମ୍ଭ ହୋଇ ଆସନ୍ତା ୧୭ ତାରିଖ ପର୍ଯ୍ୟନ୍ତ ଚାଲିବ । ସନ୍ଧ୍ୟା ୭ଟାରୁ ଆରମ୍ଭ ହେବ ପ୍ରତିଯୋଗିତା । ଠିକ୍ ଉତ୍ତର ଦେଉଥିବା ପାଠକମାନଙ୍କୁ ମିଳିବ ଆକର୍ଷଣୀୟ ପୁରସ୍କାର ମିଳିବ ବୋଲି ସୂଚନା ଦିଆଯାଇଛି ।
