ଭୋଗରାଇ,୨୧।୮(ଆ.ପ୍ର): ଶାଶୁଘରର ନିର୍ଯ୍ୟାତନା ଅସହ୍ୟ ହେବାରୁ ଗୋଟିଏ ଦିନରେ ଦୁଇ ଜଣ ବୋହୂ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ସେଥିମଧ୍ୟରୁ ଗୋଟିଏ ଘଟଣାରେ ବୋହୂର ବାପଘର ଓ ଶାଶୂଘର ଲୋକଙ୍କ ମଧ୍ୟରେ ଆପୋଷ ସମାଧାନ ହୋଇଛି। ଅନ୍ୟ ଏକ ଘଟଣାରେ ବାପଘର ଲୋକଙ୍କ ପକ୍ଷରୁ ଝିଅକୁ ହତ୍ୟା କରାଯାଇ ପରେ ଆତ୍ମହତ୍ୟା ରୂପ ଦେଇଥିବା ଥାନାରେ ଅଭିଯୋଗ ହୋଇଛି ।
୧୫ବର୍ଷ ପୂର୍ବେ ଜଳେଶ୍ଵର ଥାନା ଶାଳୀକୋଠା ଗ୍ରାମର ଅଜୟ କୁମାର ଜେନା ତାଙ୍କ ଝିଅ ସୁମିତ୍ରା ଜେନା (୩୫)ଙ୍କୁ ଭୋଗରାଇ ଥାନା ନିମାତପୁର ଗ୍ରାମର ଶ୍ୟାମସୁନ୍ଦର ଜେନାଙ୍କ ପୁଅ ସୁକୁମାର ଜେନାଙ୍କୁ ବୈଦିକ ରୀତିରେ ବିବାହ କରାଇଥିଲେ । ତାଙ୍କର ୨ଜଣ ପୁତ୍ର ସନ୍ତାନ ରହିଛନ୍ତି । ଗୁରୁବାର ଦ୍ୱିପ୍ରହର ସମୟରେ ଘରେ କେହି ନଥିବା ବେଳେ ସୁମିତ୍ରା ନିଜ ଶୋଇବା ଘରେ ବେକରେ ଲୁଗା ଗୁଡେଇ ଆତ୍ମହତ୍ୟା କରିଥିଲେ । ପରିବାର ଲୋକେ ଜାଣିପାରି ତାଙ୍କୁ ସଙ୍ଗେ ସଙ୍ଗେ ସ୍ଥାନୀୟ ଜଳେଶ୍ଵରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଯାଇଥିଲେ ସୁଦ୍ଧା ଡ଼ାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଅପରପକ୍ଷରେ ଭୋଗରାଇ ପୁଲିସ ଅପମୃତ୍ୟୁ ମାମଲା ରୁଜ୍ଜୁ କରି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି ।
ସେହିପରି ଭୋଗରାଇ ଥାନା ନାରାୟଣ ମହାନ୍ତି ପଡ଼ିଆ ଗ୍ରାମର ବ୍ରଜଗୋପାଳ କରଙ୍କ ଝିଅ ମୌସୁମୀ କର (୧୯) ଙ୍କୁ ଆଜକୁ ପ୍ରାୟ ୫ମାସ ପୂର୍ବେ କଖଡା ପଞ୍ଚାୟତର ହାଟସରିଷା ଗ୍ରାମର ଅଶ୍ୱିନୀ କୁମାର ସାମଲଙ୍କ ପୁଅ ବିଜୟ କୁମାର ସାମଲଙ୍କୁ ପ୍ରେମ ବିବାହ କରିଥିଲେ। ତାଙ୍କ ଝୁଲନ୍ତା ମୃତଦେହ ଶୋଇବା ଘରୁ ଉଦ୍ଧାର କରାଯାଇଛି । ଶାଶୁଘର ଲୋକେ ବୋହୂ ଆତ୍ମହତ୍ୟା କରିଛି ବୋଲି କହୁଥିବା ବେଳେ ବାପଘର ଲୋକେ ତାଙ୍କ ଝିଅକୁ ଶାଶୁଘର ଲୋକେ ଯୌତୁକ ନିର୍ଯ୍ୟାତନା ଦେଇ ହତ୍ୟା କରିବା ପରେ ଏହାକୁ ଆତ୍ମହତ୍ୟା ରୂପ ଦେଉଥିବା ଅଭିଯୋଗ କରିଛନ୍ତି । ଏବାବଦରେ ମୌସୁମୀର ବାପା ବ୍ରଜଗୋପାଳ ତାଙ୍କ ଝିଅକୁ ଯୌତୁକ ନିର୍ଯ୍ୟାତନା ଦେଇ ହତ୍ୟା କରିଛନ୍ତି ବୋଲି ଭୋଗରାଇ ଥାନାରେ ଲିଖିତ ଅଭିଯୋଗ କରିଛନ୍ତି। ଭୋଗରାଇ ଥାନା ପକ୍ଷରୁ ଏକ ମାମଲା ରୁଜ୍ଜୁ କରାଯାଇ ତଦନ୍ତ କରାଯାଉଛି।
