ନୂଆଦିଲ୍ଲୀ: ତୁର୍କୀ ଆକାଶରେ ଭୟଙ୍କର ଦୁର୍ଘଟଣା । ଦୁଇଟି ସେନା ହେଲିକପ୍ଟର ମୁହାଁମୁହିଁ ଧକ୍କା ହୋଇଥିବା ଜଣାପଡ଼ିଛି । ଏହି ଦୁର୍ଘଟଣାରେ ଗୋଟିଏ ହେଲିକପ୍ଟରରେ ଥିବା ୫ ଜଣ ଯବାନଙ୍କ ଜୀବନ ଯାଇଥିବା ବେଳେ ଅନ୍ୟ ହେଲିକପ୍ଟରକୁ ସୁରକ୍ଷିତ ଭାବେ ଲ୍ୟାଣ୍ଡ କରାଯାଇଛି । ସ୍ଥାନୀୟ ଗଣମାଧ୍ୟମ ଏନଟିଭି ଅନୁସାରେ, ଦୁର୍ଘଟଣାରେ ଅନ୍ୟ ଜଣେ ଯବାନ ଗୁରୁତର ହୋଇଛନ୍ତି ।
ସେଠାକାର ଗଭର୍ଣ୍ଣର ଅବଦୁଲ୍ଲା ଇରିନଙ୍କ କହିବା ଅନୁଯାୟୀ, ନିୟମିତ ପ୍ରଶିକ୍ଷଣ ଉଡ଼ାଣ ସମୟରେ ଏହି ଦୁର୍ଘଟଣା ଘଟିଛି । ମୃତକଙ୍କ ମଧ୍ୟରେ ଜଣେ ବ୍ରିଗେଡିୟର ଜେନେରାଲ୍ ମଧ୍ୟ ସାମିଲ ଅଛନ୍ତି । ସେ ବିମାନ ସ୍କୁଲର ପ୍ରଭାରୀ ଥିଲେ । ତେବେ ମଝି ଅକାଶରେ ଦୁଇ ହେଲିକପ୍ଟର ମୁହାଁମୁହିଁ ହେବା ପଛର କାରଣ ସଂପର୍କରେ ଜଣାପଡ଼ି ନାହିଁ । ଗଭର୍ଣ୍ଣର ଇରିନ୍ଙ୍କ ଅନୁସାରେ, ଘଟଣା ସଂପର୍କରେ ତଦନ୍ତ ଆରମ୍ଭ ହୋଇଯାଇଛି ।
ତୁର୍କୀର ପ୍ରତିରକ୍ଷା ମନ୍ତ୍ରୀ ମଧ୍ୟ ଏହି ଦୁର୍ଘଟଣା ସଂପର୍କରେ ସୂଚନା ଦେଇ କହିଛନ୍ତି, ୫ ଜଣ ଯବାନଙ୍କ ଦୁଃଖଦ ମୃତ୍ୟୁ ଘଟିଛି ଏବଂ ଜଣେ ଗୁରୁତର ହୋଇଛନ୍ତି । ସୂଚନା ଅନୁସାରେ, ତୁର୍କୀ ସେନାର ଦୁଇ UH-1 ପ୍ରିଶିକ୍ଷଣ ହେଲିକପ୍ଟର ମୁହାଁମୁହିଁ ଧକ୍କା ହୋଇଥିଲା । ଏନେଇ ଋଷ ଗଣମାଧ୍ୟମରେ ଏକ ଭିଡିଓ ମଧ୍ୟ ସାମ୍ନାକୁ ଆସିଛି । ଏହି ଭିଡିଓରେ, ପାହାଡ଼ିଆ ଅଞ୍ଚଳ ଧୂଆଁମୟ ହୋଇଥିବା ବେଳେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିବା ଦେଖିବାକୁ ମିଳିଛି ।
