ନୂଆଦିଲ୍ଲୀ: ତୁର୍କୀଏ ଏୟାର ଲାଇନ୍ସ ସାଂଘାତିକ ତ୍ରୁଟି କରୁଛି । ଏଥିପାଇଁ ତୁର୍କୀଏ ଏୟାର ଲାଇନ୍ସକୁ ଭାରତର ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) କଡ଼ା ଚେତାବନୀ ଦେଇଛି । ଏହା ସୁରକ୍ଷା ମାନଦଣ୍ଡର ଉଲ୍ଲଂଘନ କରିଥିବା ନେଇ ପ୍ରମାଣ ପାଇଛି ଡିଜିସିଏ । ମେ’ ୨୯ରୁ ଜୁନ୍‌ ୨, ୨୦୨୫ ମଧ୍ୟରେ ଦିଲ୍ଲୀ, ହାଇଦ୍ରାବାଦ, ଚେନ୍ନାଇ ଏବଂ ବେଙ୍ଗାଲୁରୁ ବିମାନବନ୍ଦରରେ ତୁର୍କୀଏ ଏୟାର ଲାଇନ୍ସର ଯାତ୍ରୀ ଏବଂ ମାଲବାହୀ ବିମାନର ସୁରକ୍ଷା ସମ୍ବନ୍ଧୀୟ ଯାଞ୍ଚ ପରେ ଡିଜିସିଏ କାର୍ଯ୍ୟାନୁଷ୍ଠାନ ଗ୍ରହଣ କରିଛି । 

ତଦନ୍ତ ସମୟରେ ଜଣାପଡିଛି ଯେ, ଅନୁମତି ବିନା ତୁର୍କୀ ଏୟାର ଲାଇନ୍ସର ଏକ କାର୍ଗୋ ବିମାନରେ ବିପଦ ଜନକ ବିସ୍ଫୋରକ ପରିବହନ କରାଯାଉଥିଲା । ଭାରତୀୟ ନିୟମ ଅନୁଯାୟୀ ଏହା ନିଷିଦ୍ଧ। ବିମାନ ରକ୍ଷଣାବେକ୍ଷଣ ଇଞ୍ଜିନିୟର (AME) ଙ୍କ ଅନୁପସ୍ଥିତିରେ କେବଳ ଟେକ୍ନିସିଆନଙ୍କ ଦ୍ୱାରା ବିମାନ ଆଗମନ ପ୍ରକ୍ରିୟା କରାଯାଇଥିଲା । ଯାହା ସୁରକ୍ଷା ପ୍ରୋଟୋକଲର ଉଲ୍ଲଂଘନ। ତଦନ୍ତରୁ ଏହା ମଧ୍ୟ ଜଣାପଡିଛି ଯେ, ଏୟାର ଲାଇନ୍ସ ଏବଂ ଏହାର ଗ୍ରାଉଣ୍ଡ ହ୍ୟାଣ୍ଡଲିଂ ଏଜେଣ୍ଟ (GHA) ମଧ୍ୟରେ କୌଣସି ଚୁକ୍ତିନାମା ନଥିଲା । ହାଇଦ୍ରାବାଦ ଏବଂ ବେଙ୍ଗାଲୁରୁର ସେଲେବି ଗ୍ରାଉଣ୍ଡ ହ୍ୟାଣ୍ଡଲିଂ ଏଜେନ୍ସି ଆନୁଷ୍ଠାନିକ ହସ୍ତାନ୍ତର ବିନା ସିଢ଼ି, ଟ୍ରଲି, ଷ୍ଟେପ୍ ସିଢ଼ି ଏବଂ ଗ୍ରାଉଣ୍ଡ ପାୱାର ୟୁନିଟ୍ (GPU) ଭଳି ଉପକରଣ ବ୍ୟବହାର କରିଥିଲା, ଯାହା ସୁରକ୍ଷା ଉପରେ ଗମ୍ଭୀର ପ୍ରଶ୍ନ ଉଠାଇଥିଲା। 

ସୁରକ୍ଷା ମାନଦଣ୍ଡର ନିରନ୍ତର ଅନୁପାଳନ ସୁନିଶ୍ଚିତ କରିବା ପାଇଁ ଆବଶ୍ୟକ ହେଲେ "ଫଲୋ ଅପ ନୀରିକ୍ଷଣ" ମଧ୍ୟ କରାଯିବ ବୋଲି ଡିଜିସିଏ କହିଛି। ମନ୍ତ୍ରଣାଳୟ ଏକ ସରକାରୀ ବିବୃତ୍ତିରେ କହିଛି ଯେ, ଭାରତୀୟ ବାୟୁମଣ୍ଡଳରେ ସମସ୍ତ ବିଦେଶୀ ଅପରେଟରଙ୍କ ସୁରକ୍ଷା ଏବଂ ନିୟାମକ ଅନୁପାଳନ ସୁନିଶ୍ଚିତ କରିବାକୁ DGCA ପ୍ରତିବଦ୍ଧ। ତୁର୍କୀଏ ଏୟାର ଲାଇନ୍ସକୁ ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନ (ICAO) ମାନଦଣ୍ଡ ଏବଂ DGCA ନିୟମାବଳୀକୁ ସମ୍ପୂର୍ଣ୍ଣ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି ।