ତେଲକୋଇ, ୦୬/୦୮ : ଝିଅକୁ ସ୍କୁଲ ଛାଡ଼ିବାକୁ ଯାଉଥିବା ବେଳେ ବେଳେ ଦୁର୍ଘଟଣା। ବାଇକ୍କୁ ଧକ୍କା ଦେଲା ଟ୍ରକ୍। ଗୋଟିଏ ପରିବାରର ବାପା, ମା' ଓ ନାବାଳିକା ଝିଅର ମୃତ୍ୟୁ। ବୁଧବାର ସକାଳ ପ୍ରାୟ ୫ଟା ବେଳେ କେନ୍ଦୁଝର ଜିଲ୍ଲା ତେଲକୋଇ ୪୯ନଂ ଜାତୀୟ ରାଜପଥ ଜଗମୋହନପୁର ଛକରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି। ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନାନୁଯାୟୀ, ବୁଧବାର ସକାଳେ ଦେବଗଡ଼ ଜିଲ୍ଲା ବାରକୋଟ ଥାନା ବାହାଡାପଶି ଗାଁର ଟଙ୍କ ପାତ୍ର ଓ ତାଙ୍କ ସ୍ତ୍ରୀ ବାଇକ୍ ଯୋଗେ ଝିଅକୁ କାଞ୍ଜିପାଣି ସ୍ଥିତ ଆଶ୍ରମ ସ୍କୁଲରେ ଛାଡ଼ିବାକୁ ଯାଉଥିବା ବେଳେ ଦୁର୍ଘଟଣା ଘଟିଛି। ୪୯ନଂ ଜାତୀୟ ରାଜପଥ ଜଗମୋହନପୁର ଛକରେ ଏକ ଟ୍ରକ୍ ସେମାନଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ବାପା, ମା ଓ ଝିଅର ମୃତ୍ୟୁ ଘଟିଛି। ଉତ୍ୟକ୍ତ ଲୋକେ ଜାତୀୟ ରାଜପଥକୁ ଅବରୋଧ କରିବା ସହ ଶବକୁ ଉଠାଇବାକୁ ଦେଉନାହାନ୍ତି। ପୁଲିସ ଘଟଣା ସ୍ଥଳରେ ପହଁଚି ଲୋକଙ୍କୁ ବୁଝାସୁଝା କରିବା ପରେ ୫ ରୁ ୬ ଘଣ୍ଟା ବିଳମ୍ବରେ ରାସ୍ତା ଅବରୋଧ ହଟିଛି। ଟ୍ରକଟି ଦୁର୍ଘଟଣା ଘଟାଇ ପଳାଇ ଯାଉଥିବା ବେଳେ ରୁଗୁଡିହ ଟୋଲଗେଟ୍ ନିକଟରୁ ଧରାପଡ଼ିଛି। ଡ୍ରାଇଭର ଫେରାର ହୋଇଯାଇଛି। ବାରମ୍ବାର ଦୁର୍ଘଟଣା ଘଟୁଥିବାରୁ ଜଗମୋହନପୁର ବଜାରର ଉଭୟ ପାର୍ଶ୍ଵରେ ହମ୍ପସ ନିର୍ମାଣ ସହିତ ରାସ୍ତାରେ ଲାଇଟ୍ ବ୍ୟବସ୍ଥା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି।
