ଆଡିଲେଡ,୦୬/୧୨: ୧୦ଦିନର ବ୍ୟବଧାନ ପରେ ଭାରତ ଓ ଅଷ୍ଟ୍ରେଲିଆ ଦଳ ପୁଣିଥରେ ମଇଦାନକୁ ଲଢ଼େଇ ପାଇଁ ଓହ୍ଲାଇବେ । ଏଥର ପରିସ୍ଥିତି ଭିନ୍ନ । ଫ୍ଲଡ୍ ଲାଇଟ୍ ତଳେ ଖେଳାଯିବ ମ୍ୟାଚ୍ । ଶକ୍ତ ତଥା ଚିକଣିଆ ଗୋଲାପି ବଲ୍ରେ ଅଗ୍ନି ବର୍ଷା କରିବାକୁ ଉଭୟ ଦଳର ପେସ୍ ବାହିନୀ ପ୍ରସ୍ତୁତ । ପିଚ୍ରେ ମଧ୍ୟ ସବୁଜ ଘାସର ପରସ୍ତ । ଯେଉଁଠି ବଲ୍ ପଡ଼ିବା ମାତ୍ରେ ତୀବ୍ର ବେଗରେ ଦିଗ ବଦଳାଇବ । ବ୍ୟାଟ ଲଗାଇବାକୁ ଭୟ କରିବେ ବ୍ୟାଟର । ଭାରତୀୟ ସମୟରେ ଶୁକ୍ରବାର ସକାଳ ସାଢ଼େ ୯ଟାରେ ବର୍ଡର-ଗାଭାସ୍କର ଟ୍ରଫିର ଦ୍ବିତୀୟ ମ୍ୟାଚ୍ ଖେଳାଯିବ ୫୦,୦୦୦ରୁ ଊଦ୍ଧ୍ୱର୍ ଦର୍ଶକଙ୍କ କୋଳାହଳରେ ଷ୍ଟାଡ଼ିୟମ୍ କମ୍ପିବ । ଆଗାମୀ ୫ଦିନର ସଂଘର୍ଷ କ୍ରିକେଟ୍ ପ୍ରେମୀଙ୍କ ନିଦ ହଜାଇଦେବ ।
ନଜରରେ ରୋହିତ
ଅଷ୍ଟ୍ରେଲିଆରେ ରୋହିତ ପ୍ରଥମ କରି ପିଙ୍କ୍ ବଲ୍ ଟେଷ୍ଟ ଖେଳିବାକୁ ଯାଉଛନ୍ତି । ଗତ ୨୦୨୦ରେ ଅନୁଷ୍ଠିତ ପିଙ୍କ ବଲ୍ ଟେଷ୍ଟ ବେଳକୁ ସେ ଫିଟ୍ ହୋଇ ନଥିଲେ । କେବଳ ସେତିକି ନୁହେଁ, ୫ବର୍ଷ ପରେ ରୋହିତ ପୁଣି ଥରେ ମଧ୍ୟ କ୍ରମରେ ଖେଳିବାକୁ ନିଷ୍ପତ୍ତି ନେଇଛନ୍ତି । ଏପର୍ଯ୍ୟନ୍ତ ତାଙ୍କ ବ୍ୟାଟିଂ ସ୍ଥାନ ମଧ୍ୟ ନିଶ୍ଚିତ ହୋଇନାହିଁ । ତେଣୁ ତାଙ୍କ ପ୍ରଦର୍ଶନ ଦେଖିବାକୁ କ୍ରିକେଟ୍ ପ୍ରେମୀ ଉତ୍ସୁକତାର ସହ ଅପେକ୍ଷା କରି ରହିଛନ୍ତି ।
ଅପରିବର୍ତ୍ତିତ ରହିବ ବୋଲିଂ ବିଭାଗ
ବ୍ୟାଟିଂ ବିଭାଗରେ ପରିବର୍ତ୍ତନ ନିଶ୍ଚିତ ରହିଛି । ହେଲେ ବୋଲିଂ ବିଭାଗ ଅପରିବର୍ତ୍ତିତ ରହିବ । ଆଡିଲେଡ୍ରେ ରବି ଚନ୍ଦ୍ରନ ଅଶ୍ୱିନଙ୍କ ପ୍ରଦର୍ଶନ ଉନ୍ନତ ରହିଛି । ତଥାପି ୱାସିଂଟନ ସୁନ୍ଦର ତାଙ୍କ ସ୍ଥାନରେ ଖେଳିବେ । ଉଭୟ ରବିନ୍ଦ୍ର ଜାଡେଜା ଓ ଅଶ୍ୱିନଙ୍କ ତୁଳନାରେ ସୁନ୍ଦରଙ୍କ ବ୍ୟାଟିଂ ଟେକନିକ୍ ଉନ୍ନତ । ପର୍ଥରେ ପଦାର୍ପଣ କରିଥିବା ନୀତିଶ କୁମାର ରେଡ୍ଡୀ ମଧ୍ୟ ଏକାଦଶରେ ସ୍ଥାନ ବଜାୟ ରଖିବେ । ସେ ପ୍ରଥମ ଟେଷ୍ଟ ସହ ୨ଦିନିଆ ଅଭ୍ୟାସ ମ୍ୟାଚ୍ରେ ମଧ୍ୟ ଉନ୍ନତ ପ୍ରଦର୍ଶନ କରିଥିଲେ ।
ଅଷ୍ଟ୍ରେଲିଆର ବୁମରା ଚିନ୍ତା
ଆଡିଲେଡ୍ରେ ଅନୁଷ୍ଠିତ ସମସ୍ତ ୭ଟି ଯାକ ଦିବା ରାତ୍ର ଟେଷ୍ଟରେ ଅଷ୍ଟ୍ରେଲିଆ ବିଜୟୀ ହୋଇଛି । ପୂର୍ବ ରେକର୍ଡ ଦଳର ମନୋବଳ ଦୃଢ କରିପାରି ନାହିଁ । କାରଣ ଅଷ୍ଟ୍ରେଲିଆ ଶିବିରରେ ଆତଙ୍କ ଖେଳାଇଛନ୍ତି ବୁମରା । ପର୍ଥରେ ବୁମରାଙ୍କ ଘାତକ ବୋଲିଂର ମୁକାବିଲା କରିବାରେ ଅଷ୍ଟ୍ରେଲିଆ ଦଳ ବିଫଳ ହୋଇଥିଲା । ପିଙ୍କ ବଲ୍ରେ ତାଙ୍କ ସୁଇଂକୁ ପରଖିବା ସହଜ ହେବ ନାହିଁ ବୋଲି ଅଷ୍ଟ୍ରେଲିଆ ଅନୁଭବ କରିସାରିଛି ।
ନିଶ୍ଚିତ କଲେ ରୋହିତ, ରାହୁଲ ଓପନ
କରିବେ ପର୍ଥ ଭଳି ଆଡିଲେଡ୍ରେ ମଧ୍ୟ କେଏଲ ରାହୁଲ ଓପନ କରିବେ ବୋଲି ଆଜି ଅଧିନାୟକ ରୋହିତ ଶର୍ମା ନିଶ୍ଚିତ କରିଦେଇଛନ୍ତି । ସେ କହିଛନ୍ତି, ପ୍ରଥମ ଟେଷ୍ଟ ସମୟରେ ମୁଁ ଘରେ ମୋ ନବଜାତ ପୁତ୍ରକୁ ଧରି ଖେଳ ଦେଖୁଥିଲି । ରାହୁଲଙ୍କ ବ୍ୟାଟିଂ ମୋତେ ବେଶ ପ୍ରଭାବିତ କରିଥିଲା । ସେ ଲୟ ଫେରିପାଇଛନ୍ତି । ତେଣୁ ଏହି ଓପନିଂ ଯୋଡି ପରିବର୍ତ୍ତନ କରିବାର ଆବଶ୍ୟକତା ନାହିଁ । ରାହୁଲ ଓପନ କରିବାର ଅର୍ଥ ରୋହିତ ମଧ୍ୟ କ୍ରମରେ ବ୍ୟାଟିଂ କରିବେ । ସେ ହୁଏତ ୫ କିମ୍ବା ୬ନଂ ସ୍ଥାନରେ ବ୍ୟାଟିଂ କରିପାରନ୍ତି । ଭାରତୀୟ ଦଳ ବ୍ୟାଟିଂ କରିବା ବେଳେ ଯାଇ ସ୍ପଷ୍ଟ ଚିତ୍ର ମିଳି ପାରିବ ।
ରେକର୍ଡ: ବୁମରା ଏହି ଟେଷ୍ଟରେ ଆଉ ମାତ୍ର ଗୋଟିଏ ୱିକେଟ୍ ନେଲେ ପ୍ରଥମ ବୋଲର ଭାବେ ୨୦୨୪ ବର୍ଷରେ ୫୦ୱିକେଟ୍ ପୂରଣ କରିବେ । ବିରାଟ କୋହଲି ଏହି ଗ୍ରାଉଣ୍ଡ୍ରେ ୩ଟି ଟେଷ୍ଟ ଶତକ ଅର୍ଜନ କରିଛନ୍ତି । ଏହି ଟେଷ୍ଟ ଜରିଆରେ ସେ ଆଡିଲେଡ୍ରେ ସର୍ବାଧିକ ଶତକ ହାସଲକାରୀ ବ୍ୟାଟର ହୋଇପାରିବେ ।
ବିଜୟ ସୂତ୍ର: ପ୍ରଥମେ ବ୍ୟାଟିଂ ପିଙ୍କ୍ ବଲ୍ ଟେଷ୍ଟ ପାଇଁ କ୍ୟୁରେଟର ଡାମିଏନ ହଗ୍ ଏକ ପେସ୍ ବୋଲରଙ୍କୁ ସୁହାଇବା ଭଳି ପିଚ୍ ପ୍ରସ୍ତୁତ କରିଛନ୍ତି । ବ୍ୟାଟରମାନେ ମଧ୍ୟ ଏହି ପିଚ୍ର ଫାଇଦା ଉଠାଇ ପାରିବେ । ଏଥିପାଇଁ ଧୈର୍ଯ୍ୟର ସହ କ୍ରିଜ୍ରେ ଜମିବାକୁ ହେବ । ପିଚ୍ ଉପରେ ୬ମିଲି ମିଟର ଘାସ ରହିଥିଲେ ହେଁ ନିମ୍ନ ଭାଗ ବେଶ ଶକ୍ତ । ତେଣୁ ସ୍ପିନରମାନେ ଅତିରିକ୍ତ ବାଉନ୍ସ ପାଇବେ ।
ସମ୍ଭାବ୍ୟ ଦଳ
ଅଷ୍ଟ୍ରେଲିଆ: ଉସମାନ ଖୱାଜା, ନାଥାନ ମ୍ୟାକସ୍ୱିନି, ମାର୍ନସ ଲାବୁସାନ, ଷ୍ଟିଭେନ ସ୍ମିଥ୍, ଟ୍ରେଭିସ୍ ହେଡ୍, ମିଚେଲ ମାର୍ଶ, ଆଲେକ୍ସ କ୍ୟାରୀ, ପ୍ୟାଟ୍ କମିନ୍ସ (ଅଧିନାୟକ), ମିଚେଲ ଷ୍ଟାର୍କ, ନାଥାନ ଲାୟନ, ସ୍କଟ୍ ବୋଲାଣ୍ଡ ।
ଭାରତ: ଯଶସ୍ୱୀ ଜୈସ୍ୱାଲ୍, କେଏଲ ରାହୁଲ, ଶୁଭମନ ଗିଲ୍, ବିରାଟ କୋହଲି, ରୋହିତ ଶର୍ମା (ଅଧିନାୟକ), ରିଷଭ ପନ୍ତ, ୱାସିଂଟନ ସୁନ୍ଦର, ନୀତିଶ କୁମାର ରେଡ୍ଡୀ, ହର୍ଷିତ ରାଣା, ଯଶପ୍ରୀତ ବୁମରା, ମହମ୍ମଦ ସିରାଜ ।
