ନୂଆଦିଲ୍ଲୀ,୦୬/୦୨: ପ୍ରତ୍ୟେକ ବର୍ଷ ଲାଗିବାକୁ ଥିବା ଚନ୍ଦ୍ର ଗ୍ରହଣ ଏବଂ ସୂର୍ଯ୍ୟ ପରାଗ ବିଷୟରେ ଜ୍ୟୋଜିର୍ବିଦ୍ ମାନେ ବର୍ଷ ଆରମ୍ଭ ହେବା ପୂର୍ବରୁ ଆକଳନ କରିଥାନ୍ତି । ତେବେ ଚଳିତ ବର୍ଷ ମାର୍ଚ୍ଚ ୧୪ ତାରିଖ ଅର୍ଥାତ ଦୋଳ ପୂର୍ଣ୍ଣିମାରେ ଚନ୍ଦ୍ର ଗ୍ରହଣ ଲାଗିବାକୁ ଯାଉଛି । ଯାହା ଚଳିତ ବର୍ଷର ପ୍ରଥମ ଚନ୍ଦ୍ର ଗ୍ରହଣ । ଏହି ଦିନ ବ୍ଲଡ୍ ରେଡ୍ ବା ଗାଢ ନାଲି ରଙ୍ଗର ଚନ୍ଦ୍ର ଦେଖିବାକୁ ମିଳିବ । ତେବେ ଜାଣନ୍ତୁ, କ'ଣ ରହିବ ଏହି ଚନ୍ଦ୍ର ଗ୍ରହଣର ପ୍ରଭାବ ?
ଦୋଳ ପୂର୍ଣ୍ଣିମାରେ ଚନ୍ଦ୍ର ଗ୍ରହଣର ପ୍ରଭାବ:-
ଆପଣଙ୍କୁ କହି ରଖୁଛୁ ଯେ, ସାଧାରଣତଃ ଚନ୍ଦ୍ର ଗ୍ରହଣ ଲାଗିବାର ୯ ଘଣ୍ଟା ପୂର୍ବରୁ ପୂଜା କରିବାକୁ ବାରଣ କରାଯାଇଥାଏ । ହେଲେ ଦୋଳ ପୂର୍ଣ୍ଣିମାରେ ହେବାକୁ ଥିବା ଚନ୍ଦ୍ର ଗ୍ରହଣ ଭାରତରେ ଦୃଶ୍ୟମାନ ହେବ ନାହିଁ । ଏହା କେବଳ ଆମେରିକା, ୟୁରୋପ ଏବଂ ଆଟଲାଣ୍ଟିକ ମାହାସାଗରରେ ଦେଖିବାକୁ ମିଳିବ । ସେଥିଲାଗି ଭାରତରେ ଏହାର କୌଣସି ପ୍ରଭାବ ଦେଖିବାକୁ ମିଳିବ ନାହିଁ । ଗ୍ରହଣ ସମୟରେ ଭାରତରେ ପୂଜା ଇତ୍ୟାଦି ଉପରେ ମଧ୍ୟ କୌଣସି ବାରଣ ରହିବ ନାହିଁ । ଗ୍ରହଣ ଲାଗିବା ସମୟରେ ଭାରତରେ ଦିନ ହୋଇଥିବ । ଏହି ଦିନ ସମସ୍ତ ପ୍ରକାରର ଧାର୍ମିକ କାର୍ଯ୍ୟ ପୂର୍ବପରି କରାଯିବ । କାରଣ ଭାରତରେ ଚନ୍ଦ୍ର ଗ୍ରହଣର ପ୍ରଭାବ ପଡ଼ିବ ନାହିଁ । ଏହି କାରଣରୁ ଦୋଳ ପୂର୍ଣ୍ଣିମାର ସମସ୍ତ ପୂଜା ବିଧି ସଠିକ ମୁହୂର୍ତ୍ତରେ ହେବ । ଦୋଳ ପୂର୍ଣ୍ଣିମାର ପୂଜା ବିଧି ଉପରେ ଚନ୍ଦ୍ର ଗ୍ରହଣର କୌଣସି ପ୍ରଭାବ ପଡ଼ିବ ନାହିଁ ।
ଦୋଳ ପୂର୍ଣ୍ଣିମାରେ କେଉଁ ସମୟରେ ଲାଗିବ ଭଦ୍ରକାଳ:-
ଚଳିତ ବର୍ଷ ମାର୍ଚ୍ଚ ୧୪ ତାରିଖରେ ଦୋଳ ପୂର୍ଣ୍ଣିମା ପାଳନ ହେବ । କିନ୍ତୁ ଏହି ଦିନ ଭଦ୍ରକାଳ ଦେଖିବାକୁ ମିଳିବ । ଦୋଳ ପୂର୍ଣ୍ଣିମା ଦିନ ସକାଳ ୧୦ଟା ୧୫ ମିନିଟରୁ ଆରମ୍ଭ କରି ରାତି ୧୧ଟା ୨୬ ମିନିଟ ଯାଏଁ ଭଦ୍ରକାଳ ଲାଗି ରହିବ । ଏହି ସମୟ ଅବଧି ମଧ୍ୟରେ ଦୋଳ ପୂର୍ଣ୍ଣିମା ପାଳିତ ହେବ ନାହିଁ । ଭଦ୍ରକାଳ ସମାପ୍ତ ହେବା ପରେ ଦୋଳ ପୂର୍ଣ୍ଣିମା ପାଳନ କରାଯିବ । ରାତି ୧୧ଟା ୨୬ ମିନିଟ ପରେ ଦୋଳ ପୂର୍ଣ୍ଣିମା ପାଳନ କରାଯାଇ ପାରିବ ।
