ନୂଆଦିଲ୍ଲୀ,୧୨/୧୦ : ଦେଶର ଶ୍ରେଷ୍ଠ-୧୦୦ ଧନୀଙ୍କ ମୋଟ ସମ୍ପତ୍ତି ଏ ବର୍ଷ ପ୍ରଥମ ଥର ପାଇଁ ୯୦ ଲକ୍ଷ କୋଟି ଟଙ୍କା ପାର୍ କରିଛି । ବର୍ଷକରେ ଏମାନଙ୍କ ସମ୍ପତ୍ତି ୪୦%ରୁ ଅଧିକ ବଢ଼ି ୯୩.୬୪ ଲକ୍ଷ କୋଟି ଟଙ୍କା ହୋଇଛି । ୨୦୨୦ ତୁଳନାରେ ଏମାନଙ୍କ ସମ୍ପତ୍ତି ଦୁଇ ଗୁଣାରୁ ଅଧିକ ବଢ଼ିଛି । ୨୦୨୩ ତୁଳନାରେ ଏମାନଙ୍କ ମୋଟ ସମ୍ପତ୍ତିରେ ୨୬.୫୦ ଲକ୍ଷ କୋଟି ଟଙ୍କା ବୃଦ୍ଧି ଘଟିଥିବା ଜଣାପଡ଼ିଛି । ତେବେ ସେୟାର ମୂଲ୍ୟରେ ବୃଦ୍ଧି ଯୋଗୁ ଏହି ଧନକୁବେରମାନଙ୍କ ସମ୍ପତ୍ତିରେ ବୃହତ୍ ବୃଦ୍ଧି ଦେଖାଦେଇଛି । ବର୍ଷକରେ ସେନ୍ସେକ୍ସରେ ପ୍ରାୟ ୩୦% ବୃଦ୍ଧି ଘଟିଛି ।
ଫୋର୍ବସ ରିପୋର୍ଟ ‘ଭାରତର ୧୦୦ ଧନୀ-୨୦୨୪’ ଅନୁସାରେ, ଶ୍ରେଷ୍ଠ-୧୦୦ରୁ ୮୦%ରୁ ଅଧିକ ଧନୀ ଭାରତୀୟ ପୂର୍ବ ତୁଳନାରେ ଅଧିକ ଧନୀ ପାଲଟିଛନ୍ତି । ଏଥିମଧ୍ୟରେ ୫୮ ଜଣ ବ୍ୟକ୍ତିଙ୍କ ସମ୍ପତ୍ତିରେ ୧୦୦ କୋଟି ଡଲାର ଅର୍ଥାତ୍ ୮,୩୯୭ କୋଟି ଟଙ୍କାରୁ ଅଧିକ ବୃଦ୍ଧି ଘଟିଛି । ଆଦାନି ଗ୍ରୁପ୍ ଅଧ୍ୟକ୍ଷ ଗୌତମ ଆଦାନି ଦେଶର ଦ୍ୱିତୀୟ ବୃହତ୍ ଧନୀ ବ୍ୟକ୍ତି ରହିଛନ୍ତି । ବର୍ଷକରେ ତାଙ୍କ ସମ୍ପତ୍ତି ୪ ଲକ୍ଷ କୋଟି ଟଙ୍କା ବଢ଼ି ୯.୭୪ ଲକ୍ଷ କୋଟି ଟଙ୍କା ହୋଇଛି । ମୁକେଶ ଅମ୍ବାନିଙ୍କ ନେଟ୍ ସମ୍ପତ୍ତି ୧୦.୦୩ ଲକ୍ଷ କୋଟି ଏବଂ ସେ ଭାରତର ସବୁଠାରୁ ଧନୀ ବ୍ୟକ୍ତି ରହିଛନ୍ତି । ତେବେ ମୁକେଶଙ୍କ ତୁଳନାରେ ଆଦାନିଙ୍କ ସମ୍ପତ୍ତି ଅଧିକ ବଢ଼ିଛି । ଓପି ଜିନ୍ଦଲ ଗ୍ରୁପ୍ର ମୁଖ୍ୟ ସାବିତ୍ରୀ ଜିନ୍ଦଲ ତୃତୀୟ ସ୍ଥାନରେ ପହଞ୍ଚିଯାଇଛନ୍ତି । ବର୍ଷକରେ ତାଙ୍କ ସମ୍ପତ୍ତି ୮୨% ବଢ଼ି ୩.୬୭ ଲକ୍ଷ କୋଟି ଟଙ୍କା ହୋଇଯାଇଛି । ରିଲାଏନ୍ସ ଇଣ୍ଡଷ୍ଟ୍ରିଜ୍ର ଅଧ୍ୟକ୍ଷ ତଥା ଏମ୍ଡି ମୁକେଶ ଅମ୍ବାନି ଏ ବର୍ଷ ବି ଦେଶର ସବୁଠାରୁ ଧନୀ ବ୍ୟକ୍ତି ରହିଛନ୍ତି । ବର୍ଷକରେ ତାଙ୍କ ସମ୍ପତ୍ତି ୨.୩ ଲକ୍ଷ କୋଟି ଟଙ୍କା ବଢ଼ି ୧୦ ଲକ୍ଷ କୋଟି ଟଙ୍କା ପାର୍ କରିଛି । ସେ ବିଶ୍ୱ ଧନୀ ତାଲିକାରେ ୧୩ ନମ୍ବର ସ୍ଥାନରେ ଥିବା ଜରାପଡ଼ିଛି ।
