ଭୁବନେଶ୍ୱର ୨୨/୧୧: ବିଶ୍ୱରେ ବଢିଚାଲିଛି ମଧୁମେହ ଚିନ୍ତା । ଦେଶର ଅର୍ଦ୍ଧାଧିକ ଲୋକ ମଧୁମେହରେ ପୀଡିତ । ଏହି ରୋଗର ନିରାକରଣ ସମ୍ଭବ ନୁହେଁ । କେବଳ ନିୟନ୍ତ୍ରଣ କରାଯାଇପାରିବ । ଏହି ରୋଗ ହେବା ପରେ ରକ୍ତରେ ଶର୍କରା ସ୍ତର ବଢିଯାଇଥାଏ, ଯାହାକୁ ନିୟନ୍ତ୍ରଣ କରା ନଗଲେ ଶରୀରର ଅନ୍ୟ ଅଙ୍ଗ ନଷ୍ଟ ହୋଇପାରେ । ଏହାର କିଛି ଲକ୍ଷଣ ପାଦରେ ଦେଖିବାକୁ ମିଳିଥାଏ, ଏହାକୁ ଅଣଦେଖା କରିବା ହାନିକାରକ ହୋଇପାରେ । ମଧୁମେହ ହେବା ଦ୍ୱାରା ବ୍ୟକ୍ତି ଶରୀରରେ ଇନ୍ସୁଲିନ୍ କମିଯାଏ କିମ୍ବା ଠିକ୍ ଭାବେ ଉପଯୋଗ ହୋଇପାରେନା । ଫଳରେ ରକ୍ତରେ ଶର୍କରା ସ୍ତର ବଢିଥାଏ । ରକ୍ତରେ ଶର୍କରା ସ୍ତର ବଢିବା କ୍ଷତିକାରକ ହୋଇପାରେ । ଏହା ଶରୀରର ଅନ୍ୟ ଅଙ୍ଗକୁ ମଧ୍ୟ କ୍ଷତି ପହଞ୍ଚାଇଥାଏ ।
ମଧୁମେହ କାରଣରୁ ଡାଇବେଟିକ୍ ନ୍ୟୁରୋପାଥି ହୋଇଥାଏ, ଯାହାଦ୍ୱାରା ସ୍ନାୟୁ ନଷ୍ଟ ହୋଇଚାଲେ । ସେହିପରି ରୋଟିନୋପାଥି, ଯାହା ଆଖିର ସ୍ନାୟୁକୁ କ୍ଷତି ପହଞ୍ଚାଇଥାଏ । ଏହାବ୍ୟତୀତ କିଡ୍ନୀ ରୋଗ, ହାର୍ଟ ଆଟାକ୍, ଗଲ୍ ବ୍ଲାଡର୍ ଆଦି ସମସ୍ୟା ଆସିପାରେ । କେବଳ ସେତିକି ନୁହେଁ ମଧୁମେହ କାରଣରୁ ଚିନ୍ତା, ଆଙ୍ଗ୍ଜାଇଟି, ଦୁର୍ବଳ ରୋଗ ପ୍ରତରୋଧକ ଶକ୍ତି, ଅଷ୍ଟିଓ ପୋରସିସ୍ ପରି ରୋଗର ଆଶଙ୍କା ମଧ୍ୟ ବଢିଥାଏ । ମଧୁମେହରେ ହେଉଥିବ ସମସ୍ୟାରୁ ରକ୍ଷା ପାଇବା ପାଇଁ ରୋଗ ଉପରେ ନିୟନ୍ତ୍ରଣ ରଖିବା ଜରୁରି । ବିଶେଷଜ୍ଞଙ୍କ ମତରେ ମଧୁମେହର କିଛି ଲକ୍ଷଣ ପାଦରେ ମଧ୍ୟ ଦେଖିବାକୁ ମିଳିଥାଏ ।
ପାଦରେ ଦେଖା ଦେଉଥିବା ସଙ୍କେତ :
ଶୋଷ ଲାଗିବା ଓ ଥକ୍କା ଲାଗିବା ମଧୁମେହର ଖୁବ୍ ସାଧାରଣ ଲକ୍ଷଣ । କିନ୍ତୁ ଏହା ଅନେକ ସମୟରେ ଜଣାପଡି ନଥାଏ । କିଛି ଲକ୍ଷଣ ପାଦରେ ଦେଖା ଦେଇଥାଏ, କିନ୍ତୁ ମଧୁମେହ ସହ ଏହାର ସମ୍ପର୍କ ଥିବା କଥା କେହି ଚିନ୍ତା କରି ନ ଥାନ୍ତି । ମଧୁମେହ ରୋଗୀଙ୍କ ପାଦରେ କୌଣସି ଖଣ୍ଡିଆ ବା ଘା’ ହେଲେ ତାହା ସହଜରେ ଶୁଖି ନଥାଏ । ବରଂ ଧିରେ ଧିରେ ବଢିଚାଲେ । ପାଦରେ ରଙ୍ଗରେ ପରିବର୍ତ୍ତନ, ଯାହା ରକ୍ତ ପ୍ରବାହ ନ ହେବା କାରଣରୁ ହୋଇଥାଏ । ଫଙ୍ଗାଲ୍ ଇନ୍ଫେକ୍ସନ, ଏହା ମଧ୍ୟ ମଧୁମେହ ରୋଗୀଙ୍କ ପାଦରେ ଦେଖା ଦେଇଥାଏ । ଏହା ସ୍ନାୟୁ ନଷ୍ଟ ହେବା କାରଣରୁ ହୋଇଥାଏ । କାରଣ ପାଦକୁ ଠିକ୍ ଭାବେ ରକ୍ତ ସଂଞ୍ଚାଳନ ହେଇପାରି ନଥାଏ ।
ଏହାବ୍ୟତୀତ ମଧୁମେହ ରୋଗୀଙ୍କ ପାଦରେ ପ୍ରାୟତଃ ଝିମ୍ଝିମ୍ ହେବା କିମ୍ବା ସଲସଲ୍ ଅନୁଭବ ହୋଇଥାଏ । ଏହା ସ୍ନାୟୁ ନଷ୍ଟ ହେବାର କାରଣ ହୋଇପାରେ । ଏହି ରୋଗୀର ପାଦରେ ଆଘାତ ଲାଗିଲେ ମଧ୍ୟ ଜଣାପଡି ନଥାଏ । ଯାହାଦ୍ୱାରା ଅଜଣତାରେ ସଂକ୍ରମଣର ଆଶଙ୍କା ବଢିଥାଏ । ସେହିପରି ମଧୁମେହ ରୋଗୀର ପାଦର ରଙ୍ଗ ଓ ଟେକ୍ସଚର ମଧ୍ୟ ବଦଳି ଯାଇଥାଏ । ଏମାନଙ୍କ ପାଦ ଅଧିକ ରୁକ୍ଷ ହେବା ସହ ଫାଟିଥାଏ ।
ଠିକ୍ ଭାବେ ରକ୍ତ ସଞ୍ଚାଳନ ନ ହେବା କାରଣରୁ ଏପରି ହେଇଥାଏ । ତେଣୁ ମଧୁମେହ ରୋଗୀ ନିଜ ପାଦର ଅଧିକ ଯତ୍ନ ନେବା ସହ ମଝିରେ ମଝିରେ ଡାକ୍ତର ପରୀକ୍ଷା କରାଇନେବା ଉଚିତ୍ । ମଧୁମେହ ରୋଗୀ ନିୟମିତ ବ୍ୟାୟାମ କରିବା, ସନ୍ତୁଳିତ ଆହାର ଖାଇବା, ଓଜନରେ ନିୟନ୍ତ୍ରଣ ରଖିବା ସହ ପାଦର ଖାସ୍ ଯତ୍ନ ନେବା ଜରୁରି । ପାଦରେ କିଛି ସମସ୍ୟା ଅନୁଭବ ହେଲେ ତୁରନ୍ତ ଡାକ୍ତରଙ୍କ ପରାମର୍ଶ କରାଇ ନେବା ଉଚିତ୍ । ସମସ୍ୟା ଜଣାପଡିଲେ ଡେରି ନ କରି ଚିକିତ୍ସା ଆରମ୍ଭ କରନ୍ତୁ ।
