ବେଙ୍ଗାଲୁରୁ,୧୪/୧୨: ଚଳିତ ସୟଦ ମୁସ୍ତାକ ଅଲି ଟି-ଟ୍ୱେଣ୍ଟି କ୍ରିକେଟ ଟୁର୍ଣ୍ଣାମେଣ୍ଟରେ ରଣଜୀ ଟ୍ରଫି ଚାମ୍ପିଅନ ମୁମ୍ବାଇ ଓ ମଧ୍ୟ ପ୍ରଦେଶ ମଧ୍ୟରେ ଟାଇଟଲ ଲଢେଇ ହେବ । ରବିବାର ଅପରାହ୍ନ ୪ଟାରେ ବେଙ୍ଗାଲୁରୁ ଏମ୍ ଚିନ୍ନାସ୍ବାମୀ ଷ୍ଟାଡିମୟରେ ଖେଳାଯିବ ମ୍ୟାଚ୍।
ଶୁକ୍ରବାର ଅନୁଷ୍ଠିତ ସେମି ଫାଇନାଲ୍ ମୁକାବିଲାରେ ମୁମ୍ବାଇ ୬ ୱିକେଟ୍ରେ ବରୋଦାକୁ ପରାସ୍ତ କରିଥିଲା । ସେହିପରି ଅନ୍ୟ ସେମି ଫାଇନାଲ୍ରେ ମଧ୍ୟ ପ୍ରଦେଶ ୭ ୱିକେଟ୍ରେ ଦିଲ୍ଲୀକୁ ହରାଇଥିଲା । ପ୍ରଥମ ସେମି ଫାଇନାଲ୍ରେ ବ୍ୟାଟିଂ ଆମନ୍ତ୍ରଣ ପାଇ ବରୋଦା ୭ ୱିକେଟ୍ ବିନିମୟରେ ୧୫୮ ରନ୍ ସଂଗ୍ରହ କରିଥିଲା । ଦଳ ପକ୍ଷରୁ ଶାଶ୍ୱସ ରାୱତ ୩୩, କୃନାଲ ପାଣ୍ଡ୍ୟ ୩୦, ଶିବଲିକ ଶର୍ମା ଅପରାଜିତ ୩୬ ଓ ଅତିତ ସେଠ ୨୨ ରନ କରିଥିଲେ । ମୁମ୍ବାଇ ପକ୍ଷରୁ ସୂର୍ୟାଂଶ ସେଗେ ସର୍ବାଧିକ ୨ଟି ୱିକେଟ୍ ଅକ୍ତିଆର କରିଥିଲେ ।
ଜବାବରେ ମୁମ୍ବାଇ ୧୭.୨ ଓଭରରେ ୪ ୱିକେଟ୍ ହରାଇ ଆବଶ୍ୟକ ରନ୍ ସଂଗ୍ରହ କରି ନେଇଥିଲା । ଦଳ ପକ୍ଷରୁ ଭେଟେରାନ ବ୍ୟାଟର ଅଜିଙ୍କ୍ୟ ରାହାଣେ ୫୬ଟି ବଲ୍ରୁ ୯୮ ରନ୍ର ଦମ୍ଦାର ଇନିଂସ ଖେଳିଥିଲେ । ଏହି ଇନିଂସରେ ସେ ୧୧ଟି ଚୌକା ଓ ୫ଟି ଛକା ମାରିଥିଲେ । ସେହିପରି ଶ୍ରେୟାସ ଆୟର ୩୦ଟି ବଲ୍ରୁ ୪୬ ରନ୍ର ପାଳି ଖେଳିଥିଲେ । ଉଭୟଙ୍କ ୮୮ ରନ୍ର ଭାଗିଦାରୀ ବଳରେ ମୁମ୍ବାଇର ବିଜୟ ସହଜ ହୋଇଥିଲା ।
ଦ୍ୱିତୀୟ ସେମି ଫାଇନାଲ୍ରେ ବ୍ୟାଟିଂ ଆମନ୍ତ୍ରଣ ପାଇ ଦିଲ୍ଲୀ ନିର୍ଦ୍ଧାରିତ ଓଭରରେ ୫ ୱିକେଟ୍ ହରାଇ ୧୪୬ ରନ୍ ସଂଗ୍ରହ କରିଥିଲା । ଦଳ ପକ୍ଷରୁ ଅନୁଜ ରାୱତ ୨୪ଟି ବଲ୍ରୁ ଅପରାଜିତ ୩୩ ରନ୍ କରିଥିବାବେଳ ପିୟୂଷ ଆର୍ୟ ୨୯, ମୟଙ୍କ ରାୱତ ୨୪ ରନ୍ କରିଥିଲେ । ମଧ୍ୟ ପ୍ରଦେଶ ପକ୍ଷରୁ ଭେଙ୍କଟେଶ ଆୟର ସର୍ବାଧିକ ୨ଟି ୱିକେଟ୍ ନେଇଥିଲେ ।
ଜବାବରେ ମଧ୍ୟ ପ୍ରଦେଶ ପ୍ରଥମ ବଲ୍ରେ ଅର୍ପିତ ଗୌଡ଼ଙ୍କ ୱିକେଟ୍ ହରାଇଥିଲା । ପରେ ପରେ ଶୁଭ୍ରାଂଶୁ ସେନାପତି ମଧ୍ୟ ୭ ରନ୍ କରି ପାଭିଲିୟନ ଫେରିଥିଲେ । ଅନ୍ୟ ଓପନ ହର୍ଷ ଗାଓଲି ୧୮ଟି ବଲ୍ରୁ ୩୦ ରନ୍ର ଉପଯୋଗୀ ପାଳି ଖେଳିଥିଲେ । ୪୬ ରନ୍ରେ ଦଳ ୩ଟି ୱିକେଟ୍ ହରାଇ ସାରିଥିଲା । ମାତ୍ର ଏହାପରେ ହରପ୍ରୀତ ସିଂହ ଓ ରଜତ ପାତିଦାର ବିସ୍ଫୋରକ ବ୍ୟାଟିଂ କରିବା ଫଳରେ ମଧ୍ୟ ପ୍ରଦେଶ ୨୬ଟି ବଲ୍ ବାକି ଥାଇ ବିଜୟ ହାସଲ କରିଥିଲା । ପାତିଦାର ୨୯ଟି ବଲ୍ର ସାମ୍ନା କରି ଚୌକା ଓ ୬ ଛକା ବଳରେ ଅପରାଜିତ ୬୬ ରନ୍ କରିଥିଲେ । ସେହିପରି ହରପ୍ରୀତ ୩୮ଟି ବଲ୍ରୁ ୪୬(୪ଚୌକା, ୨ଛକା) ରନ୍ କରିଥିଲେ ।
