ଚଣ୍ଡିଖୋଲ,୨୩/୦୮: ବିବାହିତ ମହିଳାଙ୍କ ସନ୍ଦେହ ଜନକ ମୃତ୍ୟୁ । ମହିଳାଙ୍କ ହତ୍ୟା ହୋଇଥିବା ନେଇ ଅଭିଯୋଗ କରିଲେ ପରିବାର ଲୋକେ । ମୃତ ମହିଳା ଜଣକ ବରୀ ବ୍ଲକ ସ୍ୱାଇଁଖଣ୍ଡ ଗ୍ରାମର ଅକ୍ଷୟ ମଲିକଙ୍କ ଝିଅ ରଶ୍ମିତା ମଲିକ ବୋଲି ଜଣା ପଡ଼ିଛି । ପାରିବାରିକ କଳହରୁ ଏହି ମୃତ୍ୟୁ ହୋଇଥିବା ନେଇ ସନ୍ଦେହ କରାଯାଉଛି ।
ସୂଚନା ଅନୁଯାୟୀ, ରଶ୍ମିତା ମଲିକ ଦୀର୍ଘ ୧୦ ବର୍ଷ ହେବ ବାଲିଚନ୍ଦ୍ରପୁର ଥାନା ଅଧିନ ସାଉଡ଼ିଆ ଗ୍ରାମର ମନ୍ମଥ ମଲିକଙ୍କୁ ବିବାହ କରିଥିଲେ । ବିବାହ ପରେ ସବୁବେଳେ ଉଭୟ ସ୍ୱାମୀ-ସ୍ତ୍ରୀ ଏବଂ ଶାଶୁଘର ଲୋକଙ୍କ ମଧ୍ୟରେ ଝଗଡ଼ା ଲାଗି ରହୁଥିଲା । ଅନେକ ଥର ବାପଘର ଲୋକେ ଏହି କଳହର ସମାଧାନ କରିଥିଲେ । ଏଭଳି ସ୍ଥିତିରେ ଗୁରୁବାର ରାତିରେ ରଶ୍ମିତାଙ୍କ ମୃତଦେହ ଉଦ୍ଧାର କରାଯାଇଛି । ଏନେଇ ପରିବାର ଲୋକେ ଝିଅକୁ ହତ୍ୟା କରାଯାଇଥିବା ବାଲିଚନ୍ଦ୍ରପୁର ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ଘଟଣା ସ୍ଥଳରେ ବାଲିଚନ୍ଦ୍ରପୁର ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପାଠାଇଛି । ଏଥି ସହିତ ଏକ ସାଇଣ୍ଟିଫିକ ଟିମ୍ ଘଟଣା ସ୍ଥଳରେ ପହଞ୍ଚି ତଦନ୍ତ କରିଛି । ତେବେ ମହିଳାଙ୍କ ମୃତ୍ୟୁ ପଛର କାରଣ କ'ଣ ତାହା ଜାଣିବାକୁ ତଦନ୍ତ ଆରମ୍ଭ କରିଛି ପୋଲିସ ।