ଚଣ୍ଡିଖୋଲ,୦୫/୦୯: ଶଗଡ଼ିଆ ନାଳରୁ ଉଦ୍ଧାର ହେଲା କଲେଜ ଛାତ୍ରଙ୍କ ମୃତଦେହ । ମୃତକ ଜଣକ ଅଭୟପୁର ଗ୍ରାମର ରୁଦ୍ର ପ୍ରସାଦ ବେହେରା ବୋଲି ଜଣାପଡ଼ିଛି । ଗୁରୁବାର ସକାଳୁ ଧର୍ମଶାଳା ଥାନା ଅଧୀନ ରଥିଆ ନିକଟରେ ଯାଇଥିବା ଶଗଡ଼ିଆ ନାଳରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି ।

ସୂଚନା ମୁତାବକ, ରୁଦ୍ର ଦୁଇ ଦିନ ତଳେ ନିଖୋଜ ହୋଇଥିଲେ । ଏନେଇ ପରିବାର ଲୋକେ ବହୁ ଖୋଜାଖୋଜି କରିବା ପରେ ପୁଅକୁ ପାଇ ନଥିଲେ । ପୁଅକୁ ନପାଇବାରୁ ନିରାଶ ହୋଇ ଧର୍ମଶାଳା ଥାନାରେ ଏକ ଲିଖିତ ଅଭିଯୋଗ କରିଥିଲେ ପରିବାର ଲୋକେ । ତେବେ ଗୁରୁବାର ସକାଳୁ ରଥିଆ ଠାରେ ଥିବା ଏକ କ୍ରସର ନିକଟରେ ଯାଇଥିବା ଶଗଡ଼ିଆ ନାଳରେ ଯୁବକଙ୍କ ମୃତଦେହ ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏହା ଦେଖି ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଧର୍ମଶାଳା ପୋଲିସ ପହଞ୍ଚି ରୁଦ୍ରଙ୍କ ମୃତଦେହ ଉଦ୍ଧାର କରିଛି । ରୁଦ୍ର କଲେଜରେ ପାଠ ପଢୁଥିଲେ । ତେବେ ପ୍ରେମ ବ୍ୟାପାରକୁ ନେଇ ପୁଅକୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ଘଟଣାର ତଦନ୍ତ କରୁଛି ଧର୍ମଶାଳା ପୋଲିସ ।