ପୁରୀ, ୨୨/୧୦ : ବାତ୍ୟା ‘ଦାନା’ର ମୁକାବିଲା କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଥିବାବେଳେ ପୁରୀ ଅଗ୍ନିଶମ ସେବା କେନ୍ଦ୍ର ପକ୍ଷରୁ ସମସ୍ତ ପ୍ରସ୍ତୁତି କରାଯାଇଛି । ବିଶେଷ କରି ବାତ୍ୟା ପରବର୍ତ୍ତୀ ସମୟରେ ରାସ୍ତା ଉପରେ ଗଛ କିମ୍ବା ଇଲେକ୍ଟ୍ରି ପୋଲ୍ ଉପୁଡି ପଡିବାର ସମ୍ଭାବନା ଥିବାରୁ ସେଗୁଡ଼ିକ କିଭଳି ତୁରନ୍ତ ସଫା କରାଯାଇ ପାରିବ ସେ ନେଇ କଟର ମେସିନ୍ ମଧ୍ୟ ମହଜୁଦ ରଖାଯାଇଛି । ଆସ୍କା ଲାଇଟ ସାଙ୍ଗକୁ, ଡାକବାଜି ଯନ୍ତ୍ର ମଧ୍ୟ ମହଜୁଦ ରଖାଯାଇଛି । 

ସେହିପରି ପୁରୀ ସମୁଦ୍ର କୂଳରେ ପର୍ଯ୍ୟଟକମାନେ ଯେଭଳି ସ୍ନାନ ନ କରିବେ ସେ ନେଇ ସଚେତନ କରାଯାଉଛି । ଆଜି ପୁରୀ ଅଗ୍ନିଶମ ସେବା କେନ୍ଦ୍ରରେ ଅଗ୍ନିଶମ ବିଭାଗର ଅଧିକାରୀ ପ୍ରଭାତ ରାଉତଙ୍କ ତତ୍ତ୍ୱାବଧାନରେ ଏକ ମକଡ୍ରିଲ୍ କରାଯାଇଛି । ବାତ୍ୟା ପରବର୍ତ୍ତୀ ସମୟରେ ତୁରନ୍ତ କିଭଳି ରାସ୍ତା କ୍ଲିଅର ହୋଇପାରିବ ଏବଂ ପ୍ରବଳ ବର୍ଷା ହେବାର ସମ୍ଭାବନା ଥିବାରୁ ତଳିଆ ଅଞ୍ଚଳରୁ ଜଳ ନିଷ୍କାସନ କିଭଳି ତୁରନ୍ତ ହୋଇପାରିବ ସେ ନେଇ ମକଡ୍ରିଲ୍ କରାଯାଇଛି। ସେହିପରି ଜଳ ନିଷ୍କାସନ ପାଇଁ ମୋଟର ପମ୍ପ ମଧ୍ୟ ରଖାଯାଇଛ । ସମୁଦ୍ର ଭିତରକୁ କେହି ନ ଯିବା ପାଇଁ ଲାଇଫ ଗାର୍ଡ ଓ ଅଗ୍ନିଶମ ବିଭାଗ ପକ୍ଷରୁ ସଚେତନ କରାଯାଉଛି । ତେବେ ଜିଲ୍ଲାରେ ସମୁଦାୟ ୧୨ ଟି ଫାୟାର ଷ୍ଟେସନ ଥିବାବେଳେ ସମୁଦାୟ ୧୫ ଟି ଟିମ୍ ଗଠନ ହୋଇଛି । 

ବାତ୍ୟାକୁ ମୁକାବିଲା କରିବା ପାଇଁ ୨୮ ଟି ଆସ୍କା ଲାଇଟ, ୬୮ଟି କଟର ମେସିନ୍, ଗୋଟିଏ ପ୍ଲାଜମା କଟର ସହ ଲୁହା କାଟିବା ପାଇଁ ଚାରୋଟି କମ୍ବି ଟୁଲ୍ସ ରହିଛି। ତେବେ ବାତ୍ୟା ଦାନା କୁ ମୁକାବିଲା କରିବା ନେଇ ଅଗ୍ନିଶମ ବିଭାଗ କେତେ ପ୍ରସ୍ତୁତ ରହିଛି ସେନେଇ ଅଗ୍ନିଶମ ବିଭାଗ ଅଧିକାରୀ ପ୍ରଭାତ କୁମାର ରାଉତଙ୍କ ସହ ଅଧିକ ଆଲୋଚନା କରିଛନ୍ତି ଆମ ପ୍ରତିନିଧି ଚନ୍ଦ୍ରଶେଖର ପାତ୍ର।