ସମ୍ବଲପୁର,୨୫/୦୬: ସମ୍ବଲପୁର ସହରରେ ସୃଷ୍ଟି ହୋଇଥିବା ଜଣ୍ଡିସ୍ ସମସ୍ୟା ବାବଦରେ ସ୍ଥିତି ଅନୁଧ୍ୟାନ କରିବା ପାଇଁ ଭୁବନେଶ୍ୱରରୁ ଜନସ୍ୱାସ୍ଥ୍ୟ ବିଭାଗ ରାପିଡ୍ ରେସ୍ପନ୍ସ ଟିମ୍ର ଦୁଇ ଜଣ ସଦସ୍ୟ ସମ୍ବଲପୁରରେ ପହଞ୍ଚିଥିଲେ । ଟିମ୍ର ସଦସ୍ୟ ଡା. ସୁରଜିତ ଗରାବଡୁ ଏବଂ ଏପିଡୋମୋଲିଜିଷ୍ଟ ସୁନିତା ଜେନା ଜିଲ୍ଲା ସ୍ୱାସ୍ଥ୍ୟ ବିଭାଗ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି ।
ଡା. ସୁରଜିତଙ୍କ ସୂଚନା ଅନୁଯାୟୀ ସ୍ୱାସ୍ଥ୍ୟବିଭାଗ ଅଧିକାରୀଙ୍କ ସହ ଆଲୋଚନା ପରେ ସ୍ଥିତି ଗମ୍ଭୀର ନଥିବା ଜଣପଡ଼ିଛି । ରକ୍ତ ପରୀକ୍ଷା ପରେ ଏହା ହେପାଟାଇଟିସ୍ -ଏ ଅନ୍ତର୍ଗତ ବୋଲି ଜଣାପଡ଼ିଛି । ସମସ୍ତ ଆକ୍ରାନ୍ତ ଘରେ ରହି ଚିକିତ୍ସିତ ହେଉଛନ୍ତି ବୋଲି ସୂଚନା ଦେଇଛନ୍ତି ।
ଆଜି ସକାଳୁ ଜନସ୍ୱାସ୍ଥ୍ୟ ବିଭାଗ ଟିମ୍ ସଂକ୍ରମିତ ଅଞ୍ଚଳ ପରିଦର୍ଶନ କରି ସ୍ଥିତି ପରିଖିଛନ୍ତି। । ଘର ଘର ବୁଲି ଯାଞ୍ଚ ଆରମ୍ଭ କରିଛନ୍ତି l ପିଇବା ପାଣିରୁ ଏହି ଜଣ୍ଡିସ ହେଇଥିବା ନେଇ ଆସିଥିବା ଟିମ କହିଛି l ତେବେ ଲୋକେ ଭୟକରିବାର ନାହିଁ ବୋଲି ଆରଆରଟି ଟିମ ସଦସ୍ୟ କହିଛନ୍ତି । ସଚେତନ ରହିବା ସହ ଔଷଧ ସେବନ, ଫୁଟା ପାଣି ପିଇବା ଓ ସ୍ବଚ୍ଛତା ଉପରେ ଟିମ୍ ଗୁରୁତ୍ବ ଦେଇଛି ।
ସ୍ୱାସ୍ଥ୍ୟ ବିଭାଗ ସୂଚନା ଅନୁଯାୟୀ ବର୍ତ୍ତମାନ ଜଣ୍ଡିସ୍ ଆକ୍ରାନ୍ତଙ୍କ ସଂଖ୍ୟା ୮୨ରେ ପହଞ୍ଚିଛି । ଚିହ୍ନଟ ହୋଇଥିବା ସମସ୍ତ ଆକ୍ରାନ୍ତ କୁମ୍ଭାରପଡ଼ା, ଶାଲିଆବଗିଚା, ପେନ୍ସନ୍ପଡ଼ା ଓ ଧୋବାପଡ଼ା ଅଞ୍ଚଳର । ସମସ୍ତ ସଂକ୍ରମିତ ୨୦ ବର୍ଷ ମଧ୍ୟରେ ରହିଛନ୍ତି । ସେମାନଙ୍କ ମଧ୍ୟରୁ ଚିକିତ୍ସା ପାଇଁ ୩ ଜଣ ନର୍ସିଂହୋମ୍ରେ ଭର୍ତ୍ତି ହୋଇଛନ୍ତି ।
