ପୁରୀ, ୯/୬ : ରଥଯାତ୍ରାରେ ହିଟ୍ ଷ୍ଟ୍ରୋକ୍ ବା ଅଂଶୁଘାତ ମୁକାବିଲା ପାଇଁ ସ୍ଵତନ୍ତ୍ର ବ୍ୟବସ୍ଥା। ସବୁ ସିଏଚ୍ସି ଓ ପିଏଚ୍ସିରେ ହିଟ୍ ଷ୍ଟ୍ରୋକ୍ ପାଇଁ ଫ୍ୟାନ୍ ଏସି ବ୍ୟବସ୍ଥା କରାଯାଇଛି। ଯେଉଁ ସ୍ଥାନରେ ଏସି ନାହିଁ ସେଠାରେ କୁଲର ବ୍ୟବସ୍ଥା କରାଯାଇଛି। ସବୁ ଗୁରୁତ୍ଵପୂର୍ଣ୍ଣ ସ୍ଥାନରେ ଓଆରଏସ୍ କର୍ଣ୍ଣର କରାଯାଇଛି। ରଥଯାତ୍ରା ସମନ୍ଵୟ କମିଟି ବୈଠକ ପରେ ଏନେଇ ସୂଚନା ଦିଆଯାଇଛି।
ସେହିପରି ପୁରୀ ମୁଖ୍ୟ ଚିକିତ୍ସାଳୟରେ ୬ଟି ବେଡ୍, ଉତ୍କଳ ହିନ୍ଦୀ ବିଦ୍ୟାପୀଠରେ ୬ଟି ବେଡ୍, ଜଗନ୍ନାଥ ବଲ୍ଲଭ ପାର୍କିଂରେ ୧୦ଟି ବେଡ୍, ଅବକାଶ ପୁଲିସ ହଲିଡେ ଠାରେ ୬ଟି ବେଡ୍, ଉତ୍ତର ଦ୍ଵାରରେ ହାଇଟେକ୍ ତରଫରୁ ୨୫ଟି ବେଡ୍ର ବ୍ୟବସ୍ଥା କରାଯାଇଛି। ଅନବସର ଦର୍ଶନ ପାଇଁ ବ୍ରହ୍ମଗିରି ଓ ରେବଣା ନୂଆଗାଁରେ ମଧ୍ୟ ବ୍ୟବସ୍ଥା କରାଯାଇଛି। ସ୍ନାନ ପୂର୍ଣ୍ଣିମା ପାଇଁ କାକୁଡ଼ି ଖାଇ, ସିଂହଦ୍ଵାର ପ୍ରବେଶ ଦ୍ଵାର ଆଦି ସ୍ଥାନରେ ହିଟ୍ ଷ୍ଟ୍ରୋକ୍ ପାଇଁ ବ୍ୟବସ୍ଥା, ମାର୍କେଟ୍ ଛକ ଠାରୁ ସିଂହଦ୍ଵାର ପର୍ଯ୍ୟନ୍ତ ଓଆରଏସ୍ କର୍ଣ୍ଣର ବ୍ୟବସ୍ଥା କରାଯାଇଛି।
ଜୁନ୍ ୨୭ରେ ବିଶ୍ଵ ପ୍ରସିଦ୍ଧ ଘୋଷଯାତ୍ରା। ଆଉ ଦିନକ ପରେ ମହାପ୍ରଭୁଙ୍କ ଦେବସ୍ନାନ ପୂର୍ଣ୍ଣିମା। ରଥଯାତ୍ରାର ସୁପରିଚାଳନା ପାଇଁ ଆଜି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଅଧ୍ୟକ୍ଷତାରେ ବସିଥିଲା ଦ୍ଵିତୀୟ ସମନ୍ଵୟ କମିଟି ବୈଠକ। ଏହି ବୈଠକରେ ବିଭିନ୍ନ ବିଭାଗର କାର୍ଯ୍ୟ ଉପରେ ତଦାରଖ କରାଯାଇଛି। ଠାକୁରଙ୍କ ନୀତିକାନ୍ତିକୁ କିଭଳି ଶୃଙ୍ଖଳିତ କରାଯିବ ସେଉପରେ ବିଶେଷ ଗୁରୁତ୍ଵ ଦିଆଯାଇଛି। ଚଳିତ ବର୍ଷ ରଥଯାତ୍ରାରେ ପ୍ରବଳ ଭକ୍ତଙ୍କ ସମାଙ୍ଗମ ହେବାର ଆଶଙ୍କା କରାଯାଉଛି। ଏଣୁ ଭକ୍ତଙ୍କ ରହଣୀ, ସୁବିଧା, ସୁରକ୍ଷା ଓ ଶୃଙ୍ଖଳିତ ଦର୍ଶନ ସହିତ ନୀତିକାନ୍ତି ଉପରେ ବିସ୍ତୃତ ଆଲୋଚନା କରାଯାଇଛି।
