ମୁମ୍ବାଇ ୦୯/୦୬: ୨୦୨୧ରେ ‘ତଡ଼ପ୍’ ଫିଲ୍ମ ମାଧ୍ୟମରେ ବଲିଉଡ୍ ଡେବ୍ୟୁ କରିଥିଲେ ଅଭିନେତା ସୁନୀଲ ସେଟ୍ଟୀଙ୍କ ପୁଅ ଆହାନ ସେଟ୍ଟୀ । ସେହି ଫିଲ୍ମରେ ତାଙ୍କ ବିପକ୍ଷରେ ତାରା ସୁତାରିଆ ସ୍କ୍ରିନ୍ ସେୟାର କରିଥିଲେ । ଯଦିଓ ଫିଲ୍ମଟି ବକ୍ସ ଅଫିସ୍ରେ ସେଭଳି କିଛି ଯାଦୁ ଦେଖାଇ ପାରିନଥିଲା ତେବେ ସେଥିରେ ଆହାନଙ୍କର ଅଭିନୟକୁ ସମାଲୋଚକମାନେ ପ୍ରଶଂସା କରିଥିଲେ । ଏପରିକି ଶ୍ରେଷ୍ଠ ନବାଗତ ଭାବେ ସେ ଦୁଇଟି ପୁରସ୍କାର ବି ପାଇଥିଲେ । ତାର ଦୀର୍ଘ ୪ ବର୍ଷ ପରେ ଆହାନ ପୁଣି ବଲିଉଡ୍କୁ କମ୍ବ୍ୟାକ୍ କରିବାକୁ ଯାଉଛନ୍ତି ।
ଆଗକୁ ତାଙ୍କୁ ଏକ ଆକ୍ସନ୍ ଥ୍ରିଲରରେ ଦେଖିବାକୁ ମିଳିବ । ଲୋକପ୍ରିୟ ବଙ୍ଗଳା ଫିଲ୍ମନିର୍ମାତା ବିର୍ସା ଦାସଗୁପ୍ତା ତାର ନିର୍ଦ୍ଦେଶନା ଦେବେ ବୋଲି ଖବର ମିଳିଛି । ଶିବାଶିଷ ସରକାର ଓ ରିଭୁ ଦାସଗୁପ୍ତା ପ୍ରଯୋଜନାରେ ରହିବେ । ଅକ୍ଟୋବରରୁ ଫିଲ୍ମର ସୁଟିଂ ଆରମ୍ଭ ହୋଇପାରେ । ଏଥିରେ ଆହାନଙ୍କର ଦମଦାର୍ ଆକ୍ସନ୍ ତାଙ୍କ କ୍ୟାରିୟରକୁ ଏକ ନୂଆ ଦିଗ ଦେବ ବୋଲି କୁହାଯାଉଛି । ଏହି ଫିଲ୍ମ ବ୍ୟତୀତ ଆହାନଙ୍କ ନିକଟରେ ବହୁଚର୍ଚ୍ଚିତ ଫିଲ୍ମ ‘ବର୍ଡର’ର ସିକ୍ୱେଲ ରହିଛି ।
