ମୁମ୍ବାଇ ୦୯/୦୬: ଅପେକ୍ଷାର ଅନ୍ତ। ବର୍ଷ ବର୍ଷର ଅପେକ୍ଷା ପରେ, ବଲିଉଡର ପାୱାର କପଲ୍ ରଣବୀର କପୁର ଏବଂ ଆଲିଆ ଭଟ୍ଟଙ୍କ ଡ୍ରିମ୍ ହାଉସର ନିର୍ମାଣ ଶେଷ ହୋଇଛି । ରଣବୀରଙ୍କ ସ୍ୱର୍ଗତ ଜେଜେମାଆ କୃଷ୍ଣା ରାଜ କପୁରଙ୍କ ନାମରେ ନିର୍ମିତ ଏହି ଛଅ ମହଲା ବିଶିଷ୍ଟ କୋଠାର ନିର୍ମାଣ କାର୍ଯ୍ୟ ସରିଥିବା ଜଣାପଡ଼ିଛି । ନିକଟରେ ସୋସିଆଲ ମିଡିଆରେ ଭାଇରାଲ୍ ହେଉଥିବା ଏକ ଭିଡିଓରୁ ଏହା ସ୍ପଷ୍ଟ ହେଉଛି।
ରଣବୀର କପୁର ଏବଂ ଆଲିଆ ଭଟ୍ଟ ଖୁବ୍ ଶୀଘ୍ର ସେମାନଙ୍କର ନୂଆ ଘରକୁ ସିଫ୍ଟ ହେବାକୁ ଯାଉଛନ୍ତି। ଉଭୟେ ବର୍ତ୍ତମାନ ମୁମ୍ବାଇର ବାସ୍ତୁ ବିଲଡିଂରେ ରହୁଛନ୍ତି। ସେମାନେ ଏହି ଘରେ ବିବାହ ମଧ୍ୟ କରିଛନ୍ତି। କିନ୍ତୁ ଏବେ ଦୁହେଁ ସେମାନଙ୍କର ନୂଆ ଘରକୁ ସିଫ୍ଟ ହୋଇଯିବେ। ଗତ କିଛି ବର୍ଷ ଧରି, ରଣବୀର ଏବଂ ଆଲିଆ ସେମାନଙ୍କ ସ୍ୱପ୍ନର ଘରକୁ ଡିଜାଇନ୍ କରୁଥିଲେ । ନୀତୁ କପୁରଙ୍କ ସହିତ, ଦୁହେଁ ସେମାନଙ୍କର ଘର ନିର୍ମାଣରେ କୌଣସି କସରତ ଛାଡ଼ି ନଥିଲେ। ଦୁହେଁ ଯେତେ ବ୍ୟସ୍ତ ଥାଆନ୍ତୁ ନା କାହିଁକି, ସମୟ ସମୟରେ ଘର ନିର୍ମାଣର ପ୍ରତ୍ୟେକ କାର୍ଯ୍ୟ ଦେଖିବାକୁ ଆସୁଥିଲେ।
ରଣବୀର ଏବଂ ଆଲିଆଙ୍କ ନୂଆ ଘରର ଏକ ଝଲକ ସୋସିଆଲ ମିଡିଆରେ ସାମ୍ନାକୁ ଆସିଛି। ଭାଇରାଲ୍ ହେଉଥିବା ଭିଡିଓରେ ଦେଖିବାକୁ ମିଳୁଛି ଯେ ଦମ୍ପତିଙ୍କ ନୂତନ ଘର ସମ୍ପୂର୍ଣ୍ଣ ପ୍ରସ୍ତୁତ। ସବୁଜିମା ଭିତରେ ରହିବାକୁ ସେମାନେ କେତେ ପସନ୍ଦ କରନ୍ତି ତାହା ସେମାନଙ୍କର ଟେରାସ୍, ବାଲକୋନିରେ ଏବଂ ବଗିଚାରେ ଲଗାଯାଇଥିବା ଗଛରୁ ସ୍ପଷ୍ଟ ହେଉଛି। ଏହି ବଙ୍ଗଳାର ମୂଲ୍ୟ ୨୫୦ କୋଟି ଟଙ୍କା ବୋଲି କୁହାଯାଉଛି।
