ବ୍ରହ୍ମପୁର,୩୦/୧୦: ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲରେ ରାଗିଂ ଘଟଣା ମୁହଁ ଖୋଲିଲେ ଦ୍ଵିତୀୟ ବର୍ଷ ଛାତ୍ର । କଲେଜରେ ଥିବା ୨ ନମ୍ୱର ହଷ୍ଟେଲରେ ଦ୍ଵିତୀୟ ବର୍ଷ ଛାତ୍ରଙ୍କ ପକ୍ଷରୁ ମେଡିକାଲ କର୍ତୁପକ୍ଷଙ୍କ ଠାରେ ଲିଖିତ ଅଭିଯୋଗ କରିଥିଲେ । ପୂର୍ବରୁ ଭୟରେ ଦ୍ଵିତୀୟ ବର୍ଷ ଛାତ୍ର ମାନେ ରାଗିଙ୍ଗ କମିଟି ଆଗରେ ପାଟି ଖୋଲି ନଥିଲେ । ତେବେ ମଙ୍ଗଳବାର ଏନେଇ ମୁହଁ ଖୋଲିବା ସହ ଅଭିଯୋଗ କରିଛନ୍ତି ଜଣେ ଦ୍ଵିତୀୟ ବର୍ଷ ଛାତ୍ର ଓ ତାଙ୍କ ପରିବାର । ନିଜ ପୁଅକୁ ଅସୁରକ୍ଷିତ ମନେ କରି ତାଙ୍କ ଅବିଭାବକ ହଷ୍ଟେଲରୁ ନେଇ ଯାଇଥିବା ଜଣାପଡିଛି ।
ପୂର୍ବରୁ ଅଭିଭାବକମାନେ ଅନଲାଇନ୍ ଜରିଆରେ ଏନଏମସି ବା ଜାତୀୟ ମେଡିକାଲ କାଉନସିଲକୁ ଅଭିଯୋଗ କରିଥିଲେ । ଏହା ପରେ ଘଟଣା ପଦାକୁ ଆସିଥିଲା । ମେଡିକାଲ କର୍ତ୍ତୃପକ୍ଷଙ୍କ ତଦନ୍ତ ଓ ଆଣ୍ଟି ରାଗିଂ ସେଲର ବୈଠକ ଡାକି ରାଗିଂ ଶିକାର ହୋଇଥିବା ଦ୍ଵିତୀୟ ବର୍ଷର ଛାତ୍ରମାନଙ୍କର ବୟାନ ନେଇଥିଲେ । ସେଠାରେ କେହି ଘଟଣା ସମ୍ପର୍କରେ ଅଭିଯୋଗ ବା ମୁହଁ ଖୋଲିବାକୁ ସାହାସ କରିନଥିଲେ । ଫଳରେ ଅଭିଯୋଗର ସତ୍ୟତା ନଥାଇପାରେ ବୋଲି ସନ୍ଦେହ ହୋଇଥିଲା । ବର୍ତ୍ତମାନ ଅଭିଯୋଗ ପରେ ମେଡିକାଲ କର୍ତ୍ତୃପକ୍ଷ କଲେଜ କର୍ତ୍ତୃପକ୍ଷ କଠୋର ମନୋଭାବ ପୋଷଣ କରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଆଶା କରାଯାଉଛି । ପ୍ରଥମେ ଆଭ୍ୟନ୍ତରୀଣ କମିଟି ବୈଠକ ଓ ପରେ ଆବଶ୍ୟକସ୍ଥଳେ ଜାତୀୟ ମେଡିକାଲ କାଉନସିଲ ନିର୍ଦ୍ଦେଶ ମୁତାବକ ଥାନା ବା ପୁଲିସ ନିକଟରେ ଅଭିଯୋଗ ହେବାର ଯଥେଷ୍ଟ ସମ୍ଭାବନା ଥିବା ଜଣାପଡିଛି ।
