କ.ନୂଆଗାଁ,୧୭/୦୩: ଚାରି ମାସରୁ ଉର୍ଦ୍ଧ୍ୱ ଦିନ ହେଲାଣି ବଂଡଗୁଡା ଗାଁର ବିନ୍ଧାଣି ସାହି ଏବଂ କୋଠଦଳେଇ ସାହିରେ ପହଞ୍ଚି ପାରୁନି ପିଇବା ପାଣି। ପିଇବା ପାଇଁ ପାଣି ନ ମିଳିବାରୁ ପଞ୍ଚାୟତ କାର୍ଯ୍ୟାଳୟ ଘେରାଉ କରିଛନ୍ତି ଶତାଧିକ ମହିଳା ଏବଂ ପୁରୁଷ । କନ୍ଧମାଳ ଜିଲ୍ଲା ବଂଡଗୁଡା ଗ୍ରାମରେ ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, ଆଜକୁ ଚାରି ମାସରୁ ଉର୍ଦ୍ଧ୍ୱ ଦିନ ହେଲାଣି ବଂଡଗୁଡା ଗ୍ରାମର ବିନ୍ଧାଣି ସାହି ଏବଂ କୋଠଦଳେଇ ସାହିରେ ପିଇବା ପାଣି ପହଞ୍ଚି ପାରୁନାହିଁ । ବସୁଧା ଯୋଜନାରେ ଚାରିଆଡେ ପାଇପ୍ ବିଛାଇ ଘରକୁ ଘର ଟ୍ୟାପ୍ ଦିଆଯାଇଛି କିନ୍ତୁ ପାଣି ଆସୁନାହିଁ । ବର୍ତ୍ତମାନ ହେଉଥିବା କାମ ଯନ୍ତ୍ରୀ ଏବଂ ଠିକାଦାରର ମଧୁଚନ୍ଦ୍ରିକାରେ ନିମ୍ନ ମାନର କାମ ଏବଂ ମନଇଚ୍ଛା ପାଇପ୍ ବିଛାଇବା ଯୋଗୁଁ ପାଣି ଆସୁନାହିଁ ବୋଲି ସାହିର ବାସିନ୍ଦା ଅଭିଯୋଗ କରିଛନ୍ତି । ପିଇବା ପାଣି ପାଇଁ ସରକାରଙ୍କ ତରଫରୁ କୋଟି କୋଟି ଟଙ୍କା ଖର୍ଚ୍ଚ କରା ମଧ୍ୟ ନିମ୍ନ ମାନର କାମ ପାଇଁ ଲୋକେ ଅସୁବିଧା ଭୋଗୁଛନ୍ତି । ଆଗାମୀ ତିନିଦିନ ମଧ୍ୟରେ ପାଣିର ସମସ୍ୟା ଦୂର ନହେଲେ, ରାଜ ରାସ୍ତାକୁ ଓହ୍ଲାଇବେ ବୋଲି ସମସ୍ତ ସାହି ବାସିନ୍ଦା କହିଛନ୍ତି । ବସୁଧା ଯୋଜନାରେ ହୋଇଥିବା କାମ ଅତି ନିମ୍ନ ମାନର ଏବଂ ଟ୍ୟାପ୍, ପାଇପ୍ ମଧ୍ୟ ନିମ୍ନ ମାନର ପକାଇଥିବା ନେଇ ସାହିର ସନାତନ ପ୍ରଧାନ, ପ୍ରମୋଦ ବିନ୍ଧାଣି, ପରମେଶ୍ୱର ପ୍ରଧାନ, ସତ୍ୟ ବିନ୍ଧାଣି, ମିନାକ୍ଷୀ ଦଳବେହେରା, ନମିତା ନାୟକ, ସୁଭଦ୍ରା ନାୟକ ଅଭିଯୋଗ କରିଛନ୍ତି । ସରପଞ୍ଚଙ୍କୁ ପଚାରିବାରୁ ଅତିଶୀଘ୍ର ଏହାର ସମାଧାନ କରିବା ନିମନ୍ତେ ପ୍ରତିଶୃତି ଦେଇଛନ୍ତି ।
