ଆସିକା, ୮।୧୨: ଆସିକା ବସଷ୍ଟାଣ୍ଡରୁ ଚୋରି ହୋଇଥିବା ସାଇ କ୍ରିଷ୍ଣା ବସ୍ ଗଞ୍ଜାମରେ ଦୁର୍ଘଟଣାଗ୍ରସ୍ତ ହୋଇଥିବା ଦେଖିବାକୁ ମିଳିଛି । ଗାଡ଼ି ଭିତରେ କେହି ଯାତ୍ରୀ ନଥିବା ବେଳେ କିଏ କାହିଁକି ଗାଡ଼ି ଚୋରି କରିଛି ତାହା ପ୍ରଶ୍ନବାଚୀ ସୃଷ୍ଟି ହୋଇଛି । ଏପରିକି ଆସିକାରୁ ଚୋରି ହେଉଥିବା ବେଳେ ଭିଡିଓ ମଧ୍ୟ ସିସିଟିଭିରେ କଏଦ୍ ହୋଇଛି । ରାତି ୨ଟା ୧୧ରେ ଏହି ବସ୍ ଚୋରି ହୋଇଥିବା ଜଣାପଡ଼ିଛି ।
ଖବର ପାଇ ଗଞ୍ଜାମ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଉକ୍ତ ବସକୁ ଜବତ କରି ତଦନ୍ତ ଚଳାଇଥିବା ଜଣାପଡ଼ିଛି । ବସଟି ଭୁବନେଶ୍ୱର ପଟୁ ଦ୍ରୁତ ଗତିରେ ଆସି ଡିଭାଇଡର ଡେଇଁ ଅପରପାର୍ଶ୍ଵର ଏକ ଢାବା ନିକଟସ୍ଥ ରୋଡ୍ ତଳକୁ ପଶିଯାଇଛି । ବସ ମାଲିକ ଖବର ଜାଣିବା ପରେ ଘଟଣାସ୍ଥଳରେ ପହଞ୍ଚିଛନ୍ତି । କିଛି ଦିନ ତଳେ ଭଞ୍ଜନଗର ବସଷ୍ଟାଣ୍ଡରୁ ମଧ୍ୟ ଏକ ବସ୍ ଚୋରି ହୋଇ ଗଞ୍ଜାମରେ ଉଦ୍ଧାର ହୋଇଥିଲା ।
