ନୂଆଦିଲ୍ଲୀ,୦୪/୦୭:ତାଲିବାନ ଶାସନକୁ ନେଇ ଋଷିଆ ବଡ଼ ନିଷ୍ପତ୍ତି । ଆଫଗାନିସ୍ତାନର ତାଲିବାନ ଶାସନକୁ ସରକାରୀ ଭାବେ ସ୍ବୀକୃତି ଦେଇଛି ଋଷ। ତାଲିବାନ ସରକାରକୁ ସ୍ବୀକୃତି ଦେବାରେ ଋଷ ହେଉଛି ପ୍ରଥମ ରାଷ୍ଟ୍ର। ଆଫଗାନିସ୍ତାନ ବୈଦେଶିକ ମନ୍ତ୍ରୀ ଆମରି ଖାଁ ମୁତ୍ତାକି ଓ ଋଷର ରାଷ୍ଟ୍ରଦୂତ ଦିମିତ୍ରି ଝିରନୋଙ୍କ ମଧ୍ୟରେ ଆଲୋଚନା ପରେ ତାଲିବାନ ସରକାରକୁ ରୁଷ ସ୍ବୀକୃତି ଦେଇଛି।
ସୋସିଆଲ ମିଡିଆ ୱେବ୍ସାଇଟ୍ ଏକ୍ସରେ ତାଲିବାନ୍ ପକ୍ଷରୁ କୁହାଯାଇଛି ଯେ, ଏହା ଅନ୍ୟ ଦେଶଗୁଡ଼ିକ ପାଇଁ ଏକ ଉଦାହରଣ । ବର୍ତ୍ତମାନ ତାଲିବାନୀ ସରକାରକୁ ସ୍ୱୀକୃତି ଦେବା ପ୍ରକ୍ରିୟା ଆରମ୍ଭ ହେଲା । ଯେତେବେଳେ ଏହି ପ୍ରକ୍ରିୟା ଆରମ୍ଭ ହେଲା ଏ କ୍ଷେତ୍ରରେ ଋଷିଆ ପ୍ରଥମ ଦେଶ ଭାବରେ ଆଗକୁ ଆସିଥିଲା । ତାଲିବାନ ବୈଦେଶିକ ମନ୍ତ୍ରାଳୟ ପ୍ରବକ୍ତା ଜିଆ ଅହମ୍ମଦ ତକାଲ କହିଛନ୍ତି ଯେ,ଋଷିଆ ପ୍ରଥମ ଦେଶରେ ତାଲିବାନକୁ ଆନୁଷ୍ଠାନିକ ଭାବରେ ସ୍ୱୀକୃତି ଦେଇଛି । ଆଫଗାନିସ୍ତାନରେ ତାଲିବାନ ସରକାର ଗଠନ ହେବା ପରଠାରୁ ବିଭିନ୍ନ ପ୍ରସଙ୍ଗରେ ଏହି ସରକାରକୁ ବିଶ୍ବସ୍ତରରେ ସମାଲୋଚନା କରାଯାଇଥିଲା। ବିଶେଷ କରି ତାଲିବାନୀ ନୀତିକୁ ସମାଲୋଚନା କରାଯାଉଥିଲା। ଆଫଗାନିସ୍ତାନରେ ଚୀନ ଓ ପାକିସ୍ତାନ ସମେତ ବିଭିନ୍ନ ରାଷ୍ଟ୍ରର ରାଷ୍ଟ୍ରଦୂତ ଥିଲେ ବି ତାଲିବାନ ସରକାରକୁ ସେହି ଦେଶମାନେ ସ୍ବୀକୃତି ଦେଇନାହାନ୍ତି। ଆଫଗାନିସ୍ତାନରେ ୧୯୯୬ରୁ ୨୦୦୧ ଯାଏ ତାଲିବାନ ଶାସନ ଚାଲିଥିଲା। ପରେ ୨୦୨୧ରେ ସେମାନେ ପୁଣି ଶାସନକୁ ଆସିଥିଲେ ।ତାଲିବାନ ଶାସନକୁ ମାନ୍ୟତା ଦେବା ପୁଟିନ୍ଙ୍କ ମାଷ୍ଟରଷ୍ଟ୍ରୋକ୍ ବୋଲି କୁହାଯାଉଛି । କାରଣ ଏହାଦ୍ୱାରା ଆମେରିକାକୁ ଅନେକ ରଣନୀତି ଚ୍ୟାଲେଞ୍ଜ୍ର ସାମ୍ନା କରିବାକୁ ପଡ଼ିପାରେ । ଅପରେସନ ସିନ୍ଦୂର ସମୟରେ ନିଜକୁ ନିରପେକ୍ଷ ଦେଖାଇବାକୁ ଯାଇ ଭାରତର ସପକ୍ଷରେ ରହିନଥିଲା ଟ୍ରମ୍ପ୍ ସରକାର । ବର୍ତ୍ତମାନ ଋଷିଆ ସରକାରଙ୍କ ଜରିଆରେ ଆଫଗାନିସ୍ତାନ ସାରା ବିଶ୍ୱର ଦେଶଗୁଡ଼ିକ ସହ ବାଣିଜ୍ୟିକ କିମ୍ବା କୂଟନୈତିକ ସମ୍ପର୍କ ସ୍ଥାପନ କରିପାରେ ।
