ପୁରୀ, ୦୫/୧୧: ବଡ଼ଦାଣ୍ଡର ଗହଳି ଭିତରେ ଘଣ୍ଟା ପ୍ରତି ବାଇକ୍ର ବେଗ ଥିଲା ସତୁରିରୁ ଅଶି । କେତେବେଳେ ବାଇକଟି ବାମ ପାର୍ଶ୍ୱକୁ ଝୁଲି ପଡ଼ୁଥିଲା ତ ଆଉ କେତେବେଳେ ଡାହାଣକୁ ଝୁଲି ବିକଟାଳ ଶବ୍ଦ ଛାଡ଼ୁଥିଲା । ଜଣେ ଚଳାଉଥିଲା । ଆଉ ଜଣେ ବାଇକ୍ର ପଛରେ ବସି ଥିଲା ଆଉ ଜଣେ । ବଡ଼ଦାଣ୍ଡରେ ଲୋକେ କିଲ୍ବିଲ୍ ହୋଇ ଦ୍ରୁତଗାମୀ ବାଇକକୁ ସାଇଡ୍ ଦେଉଥିଲେ । ଦୁଇ ରୋମିଓଙ୍କୁ ଦୀର୍ଘ ୧ କିମି ଗୋଡ଼ାଇବା ପରେ ଦୁହିଁଙ୍କୁ କାବୁ କଲେ କୁମ୍ଭାରପଡ଼ା ଥାନା ଏଏସ୍ଆଇ ଜୟକୃଷ୍ଣ ମାଳି ।
ସୂଚନା ଅନୁସାରେ ଶନିବାର ରାତିରେ ବାଇକ୍(ଓଡି୧୩ୟୁ-୫୭୧୬) ଯୋଗେ ଦୁଇ ଯୁବକ ଶ୍ରୀମନ୍ଦିର ପାର୍ଶ୍ୱରୁ ଗୁଣ୍ଡିଚା ମନ୍ଦିର ଆଡ଼କୁ ଦ୍ରୁତ ଗତିରେ ଆସୁଥିଲେ । ମାର୍କେଟ୍ ଛକଠାରେ ଛିଡ଼ା ହୋଇଥିଲେ କୁମ୍ଭାରପଡ଼ା ଥାନାର ଏଏସ୍ଆଇ ଶ୍ରୀ ମାଳି । ଉଭୟଙ୍କ ଉତ୍ପାତ ଦେଖି ସେ ପିଛା କରିଥିଲେ । ଶ୍ରୀ ମାଳି ବଡ଼ଶଙ୍ଖଠାରେ ଉଭୟଙ୍କୁ ଫିଲ୍ମ ଷ୍ଟାଇଲ୍ରେ ଅଟକାଇଥିଲେ । ଦୁହିଁଙ୍କ ଚାଲି ଓ ବୋଲି ନିଶାସେବନ କରିବା ଭଳି ହେଉଥିଲା । ଜନ୍ମଦିନ ପାର୍ଟିରୁ ଉଭୟ ଫେରୁଥିବା କହି ଏଏସ୍ଆଇଙ୍କ ୨ ଗୋଡ଼କୁ ଜାବୁଡ଼ି ଧରି ପ୍ଲିଜ୍ ସାର୍ ଛାଡ଼ି ଦିଅନ୍ତୁ, ନହେଲେ ବାପା ମାରିବ ବୋଲି କହି କାନ୍ଦିଥିଲେ । କିନ୍ତୁ ବାବୁ ନ ଛୋଡ଼ବନ୍ଧା । ଥାନାକୁ ଚାଲ ବୋଲି କହିବା ବେଳେ ରୋମିଓ ତାଙ୍କୁ କୁଣ୍ଢାଇ ପକାଇ ନେହୁରା ହୋଇଥିଲା । ଥାନାରୁ ଏକ ଟିମ୍ ସେଠାରେ ପହଞ୍ଚି ବାଇକକୁ ନେଇଯାଇଥିଲା । ପୁଲିସ ବାବୁଙ୍କୁ ଜାବୁଡ଼ି ଧରି କାନ୍ଦିବା ସହ ନାକେଦମ୍ କରିଥିଲେ ରୋମିଓ । ସେମାନଙ୍କଠାରୁ ଏନେଇ ଜରିମାନା ନିଆଯାଇଛି ବୋଲି କହିଛନ୍ତି ଆଇଆଇସି ଜୟଦୀପ ମହାନ୍ତି ।
