ବ୍ରହ୍ମପୁର, ୧୭/୫(ବ୍ୟୁରୋ): ଟ୍ରେଡିଂ ନାଁରେ ଜଣେ ଅବସରପ୍ରାପ୍ତ ବ୍ୟାଙ୍କ କର୍ମଚାରୀଙ୍କ ଠାରୁ ୧୫ ଲକ୍ଷ ଟଙ୍କା ସାଇବର ଲୁଟେରା ଠକେଇ କରିଛନ୍ତି। ଏ ନେଇ ବ୍ରହ୍ମପୁର ସାଇବର ଥାନାରେ ଅଭିଯୋଗ ହୋଇଛି।
ହିଲପାଟଣା ଅଞ୍ଚଳର ଜଣେ ଅବସରପ୍ରାପ୍ତ ବ୍ୟାଙ୍କ କର୍ମଚାରୀ ଅନଲାଇନ୍ ଟ୍ରେଡିଂ ବିଷୟରେ ସାଙ୍ଗଙ୍କ ଠାରୁ ଶୁଣିଥିଲେ। ଏ ନେଇ ଅନଲାଇନ୍ରେ ବିଭିନ୍ନ ବିଜ୍ଞପ୍ତି ଦେଖୁଥିଲେ। ଏହାପରେ ଗତ ଏପ୍ରିଲ ମାସରେ ସେ ଅନଲାଇନ୍ ଟ୍ରେଡିଂ ଆରମ୍ଭ କରିଥିଲେ। ମାସକ ମଧ୍ଯରେ ପର୍ଯ୍ୟାୟକ୍ରମେ ସେ ୧୫ ଲକ୍ଷ ଟଙ୍କା ଟ୍ରେଡିଂରେ ନିବେଶ କରିଥିଲେ । ବର୍ତ୍ତମାନ ଉକ୍ତ ଟ୍ରେଡିଂ ସାଇଟ୍ ବନ୍ଦ ରହିଛି। ସେ ନିବେଶ କରିଥିବା ଟଙ୍କା ନେଇ କୌଣସି ସୂଚନା ମିଳୁ ନାହିଁ। ଏପରିକି ଟ୍ରେଡିଂ ଆକାଉଣ୍ଟ ଖୋଲିବା ସମୟରେ କମ୍ପାନୀ ପକ୍ଷରୁ ଏକ ହେଲ୍ପ ଲାଇନ ନମ୍ବର ଦିଆ ଯାଇଥିଲା। ତାହାକୁ ଯୋଗାଯୋଗ କଲେ କୌଣସି ଉତ୍ତର ର ମିଳୁ ନାହିଁ। ଫଳରେ ଠକେଇର ଶିକାର ହୋଇଥିବା ସନ୍ଦେହରେ ଅବସରପ୍ରାପ୍ତ ବ୍ୟାଙ୍କ କର୍ମଚାରୀ ଜଣଙ୍କ ବ୍ରହ୍ମପୁର ସାଇବର ଥାନାରେ ଅଭିଯୋଗ କରିଛନ୍ତି। ପୁଲିସ ମାମଲା ରୁଜୁ କରି ଘଟଣାର ତଦନ୍ତ କରୁଛି।
