କଟକ,୦୭/୧୨: କଟକରୁ ବାଂଲାଦେଶୀ ନାବାଳିକା ଉଦ୍ଧାର ଘଟଣାରେ ଆଉ ଜଣେ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ବାରିପଦାରୁ ଜଣେ ମହିଳାଙ୍କୁ ଗିରଫ କରାଯାଇଛି । ମହିଳା ଜଣକ ନାବାଳିକାଙ୍କୁ ଦେହ ବ୍ୟବସାୟ ପାଇଁ ବାଧ୍ୟ କରିଥିବାର ପ୍ରମାଣ ପାଇଛି ପୋଲିସ । ତେବେ ଏହି ମାମଲା ସମ୍ପର୍କିତ ଅଧିକ ପ୍ରମାଣ ଯୋଗାଡ଼ କରିବା ଲାଗି ଟିଆଇ ପରେଡ କରାଯିବ ବୋଲି କଟକ ଡିସିପି କହିଛନ୍ତି । ଆବଶ୍ୟକ ପଡିଲେ ଅଧିକ ତଦନ୍ତ ପାଇଁ କଲିକତା ପୋଲିସର ସହାୟତା ମଧ୍ୟ ନିଆଯିବ । କାରଣ ଗିରଫ ମହିଳାଙ୍କ ମୋବାଇଲରୁ ଅନେକ ଆପତ୍ତିଜନକ ତଥ୍ୟ ମିଳିଛି । ତେବେ ଏହି ଦେହ ବ୍ୟବସାୟ ନେଟୱାର୍କରେ ଆଉ କେଉଁମାନେ ସମ୍ପୃକ୍ତ ଅଛନ୍ତି, ସେମାନଙ୍କୁ ଗିରଫ କରିବା ଲାଗି ପୋଲିସ ଚେଷ୍ଟା ଜାରି ରଖିଛି । ପୀଡିତା ନାବାଳିକାଙ୍କ ପ୍ରତ୍ୟାର୍ପଣ ଲାଗି ମଧ୍ୟ ପଦକ୍ଷେପ ନିଆଯାଉଛି । ସେଥିଲାଗି ବାଂଲାଦେଶ ହାଇକମିଶନରଙ୍କୁ ଚିଠି ଲେଖିଛି କମିସନରେଟ୍ ପୋଲିସ । ଏହି ଘଟଣାର ଅଧିକ ତଦନ୍ତ ଜାରି ରହିଛି । ଆଗକୁ ଆହୁରି କିଛି ଅଭିଯୁକ୍ତ ଗିରଫ ହେବାର ସମ୍ଭାବନା ମଧ୍ୟ ରହିଛି ।
ତେବେ ନଭେମ୍ୱର ମାସ ୧୦ ତାରିଖ ଦିନ, କଟକ ମଧୁପଟଣା ଥାନା ଅଞ୍ଚଳରୁ ଜଣେ ବାଙ୍ଗଲାଦେଶୀ ନାବାଳିକାଙ୍କୁ ଉଦ୍ଧାର କରିଥିଲା ପୋଲିସ। ପୀଡ଼ିତାଙ୍କ ଅବସ୍ଥା ଏବଂ ତାଙ୍କ ବୟାନକୁ ଆଧାର କରି ପୋଲିସ ପ୍ରଥମେ ତନାଘନା ଆରମ୍ଭ କରିଥିଲା । ଏହି ମାମଲାରେ ଏକାଧିକ ବ୍ୟକ୍ତି ସମ୍ପୃକ୍ତ ଥିବା ଧିରେ ଧିରେ ସ୍ପଷ୍ଟ ହେବାରେ ଲାଗିଛି ।
