ନୂଆଦିଲ୍ଲୀ,୦୭/୦୨:  ୫ ବର୍ଷ ପରେ ଆରବିଆଇ କମାଇଛି ରେପୋ ରେଟ । ଆଜି ଆରବିଆଇ ଏମପିସି ୩ ଦିନର ବୈଠକ ପରେ ୦.୨୫ ରେପୋ ରେଟ୍ କମିଛି । ଶେଷଥର ପାଇଁ ରେପୋ ରେଟ୍ ୨୦୨୦ରେ କମିଥିଲା । ସେହିପରି ୨୦୨୨ରୁ ୨୦୨୩ ଫେବୃଆରୀ ପର୍ଯ୍ୟନ୍ତ ୨.୫୦ ବଢିଥିଲା ରେପୋରେଟ୍ । ଏହାର ଦୁଇବର୍ଷ ପର୍ଯ୍ୟନ୍ତ କୌଣସି ପରିବର୍ତ୍ତନ ହୋଇନଥିଲା । 

ରେପୋ ରେଟ୍ ପରିବର୍ତ୍ତନ ପରେ ସାଧାରଣ ଲୋକଙ୍କ ଇଏମଆଇରେ ଆଶ୍ବସ୍ତି ମିଳିବ ।ଏଥିସହ ବର୍ତ୍ତମାନ ସମୟରେ ଏସବିଆଇ ଗୃହଋଣର ସୁଧ ହାରରେ ମଧ୍ୟ ହ୍ରାସ ହେବ । ଯେଉଁ କାରଣରୁ ସାଧାରଣ ଲୋକଙ୍କର ଇଏମଆଇ କମ୍ ହୋଇଯିବ । ଯାହାର ଅପେକ୍ଷା କରିଥିଲେ ଲୋକେ । ତେବେ ସବୁଠୁ ବଡ଼ ପ୍ରଶ୍ନ ହେଲା କିପରି ସାଧାରଣ ଲୋକଙ୍କ ଗୃହଋଣର ଇଏମଆଇ କମ୍ ହେବ ।  ବର୍ତ୍ତମାନ ଏସବିଆଇ ଗୃହଋଣ ଉପରେ ସର୍ବାଧିକ ୯.୬୫ ପ୍ରତିଶତ ସୁଧ ହାର ଆଦାୟ କରୁଛି। ଏବେ ଯେତେବେଳେ ସୁଧ ହାର ୨୫ ବେସିସ୍ ପଏଣ୍ଟ ହ୍ରାସ କରାଯାଇଛି। ତେଣୁ ଏସବିଆଇ ଗୃହ ଋଣ ସୁଧ ହାର ୯.୪୦ ପ୍ରତିଶତରେ ଦେଖାଯାଇପାରେ। ଏଥିପାଇଁ, ୨୫ ଲକ୍ଷ, ୪୦ ଲକ୍ଷ ଏବଂ ୫୦ ଲକ୍ଷ ଟଙ୍କାର ଗୃହ ଋଣର ତଥ୍ୟ ନିଆଯାଇଛି। 

୨୫ ଲକ୍ଷ ଟଙ୍କାର ଗୃହଋଣ ଉପରେ ଇଏମଆଇ କେତେ କମ୍ ହେବ?

ଧରାଯାଉ ଆପଣ SBIରୁ ୨୦ ବର୍ଷ ପାଇଁ ୨୫ଲକ୍ଷ ଟଙ୍କାର ଗୃହଋଣ ନେଇଛନ୍ତି । ଯାହାର ସୁଧ ହାର ୯.୬୫ ପ୍ରତିଶତ ଏବଂ ଇଏମଆଇ ୨୩,୫୪୯ ଟଙ୍କା। ଏବେ ରେପୋ ରେଟରେ ୨୫ ବେସିସ୍ ପଏଣ୍ଟ ହ୍ରାସ ପରେ ସୁଧ ହାର ୯.୪୦ ପ୍ରତିଶତକୁ ହ୍ରାସ ପାଇବ। ଯାହା ଉପରେ ଆପଣଙ୍କୁ ଏବେ ୨୩,୧୪୦ ଟଙ୍କା EMI ଦେବାକୁ ପଡିବ। ଏହାର ଅର୍ଥ ହେଉଛି ଆପଣଙ୍କର ଇେମଆଇ ୪୦୯ ଟଙ୍କା ହ୍ରାସ ପାଇବ।

୪୦ ଲକ୍ଷ ଟଙ୍କାର ଗୃହଋଣ ଉପରେ କେତେ ରିହାତି ମିଳିବ?

୨୦ ବର୍ଷ ପାଇଁ ୪୦ ଲକ୍ଷ ଟଙ୍କାର ଗୃହଋଣ ଉପରେ ୯.୬୫ ପ୍ରତିଶତ ସୁଧ ହାରରେ ବର୍ତ୍ତମାନ ୩୭,୬୭୮ ଟଙ୍କା ଦେବାକୁ ପଡ଼ିବ । କିନ୍ତୁ ରେପୋ ହାରରେ ୦.୨୫ ପ୍ରତିଶତ ହ୍ରାସ ପରେ, ୯.୪୦ ପ୍ରତିଶତ ହାରରେ ସୁଧ ଦେବାକୁ ପଡିବ। ଯାହା ଉପରେ ୩୭,୦୨୪ ଟଙ୍କା EMI ଦେବାକୁ ପଡିବ। ଏହାର ଅର୍ଥ ହେଉଛି ପ୍ରତି ମାସରେ ଆପଣଙ୍କ ପକେଟରୁ ୬୫୪ ଟଙ୍କା ବୋଝ କମିଯିବ।

୫୦ ଲକ୍ଷର ଗୃହଋଣରେ କେତେ ହେବ ଇଏମଆଇ?

୨୦ ବର୍ଷ ପାଇଁ ୫୦ ଲକ୍ଷ ଟଙ୍କାର ଗୃହଋଣ ଉପରେ ୯.୬୫ ପ୍ରତିଶତ ହିସାବରେ ୪୭,୦୯୭ଟଙ୍କା ଇଏମଆଇ ଦିଆଯାଉଥିଲା । କିନ୍ତୁ ରେପୋ ରେଟରେ ହ୍ରାସ ପରେ ଆପଣଙ୍କ ଲୋନ ଇଏମଆଇ ୪୬,୨୮୧ ହୋଇଯିବ । ଏହାର ଅର୍ଥ ଆପଣଙ୍କୁ ୮୧୬ ଟଙ୍କାର ଫାଇଦା ହେବ ।