ଜଳେଶ୍ବର ୨୫/୦୧ : ବାଲେଶ୍ବର ଜିଲ୍ଲା ଜଳେଶ୍ବର ତହସିଲ ଅନ୍ତର୍ଗତ ସୁବର୍ଣ୍ଣରେଖା ନଦୀର ରାଜନଗର ଏବଂ ମଥୁରାନାଥ ଗ୍ରାମରେ ଥିବା ୨ଟି ବେଆଇନ ବାଲି ଘାଟରେ ଜିଲ୍ଲା ଲଘୁ ଖଣିଜ ସମ୍ପଦ ବିଭାଗ ଏବଂ ଜଳେଶ୍ବର ପୋଲିସ ମିଳିତ ଭାବେ ଚଢାଉ କରିଛି।ବାଲେଶ୍ବର ଜିଲ୍ଲା ମାଇନିଂ ଅଫିସର ଅନୀଲ କୁମାର ଦାସଙ୍କ ନେତୃତ୍ବରେ ଏକ ସ୍ବତନ୍ତ୍ର ଟିମ୍ ଦୁଇଟି ବେଆଇନ ବାଲି ଘାଟରେ ଚଢାଉ କରିଥିଲେ ।ଏଥି ସହ ବେଆଇନ ବାଲି ପରିବହନ ଉପରେ ରୋକ ଲଗାଇବା ପାଇଁ ଦୁଇଟି ବାଲି ଘାଟର ମୁଖ୍ୟ ରାସ୍ତାକୁ ଜେସିବି ସାହାଯରେ ଖୋଳି ଦେଇଛନ୍ତି।
ଦୀର୍ଘ ଦିନ ଧରି ଏହି ଅଞ୍ଚଳରେ ବେଆଇନ ଭାବରେ ଜେସିବି ଲଗାଇ ନଦୀ ଗର୍ଭରୁ ବାଲି ଉତ୍ତୋଳନ କରାଯାଉଛି। ଡମ୍ପର ଏବଂ ଟ୍ରାକ୍ଟର ସାହାଯରେ ପଶ୍ଚିମବଙ୍ଗ ସମେତ ଜିଲ୍ଲାର ବିଭିନ୍ନ ସ୍ଥାନକୁ ବାଲି ଚାଲାଣ କରା ଯାଉଛି। ଫଳରେ ନଦୀ କୂଳ ଖାଇ କ୍ରମଶଃ ଗାଁ ଆଡକୁ ମାଡି ଆସୁଥିବାରୁ ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ରହୁଛନ୍ତି। ବେଆଇନ ବାଲି ଉତ୍ତୋଳନ ବନ୍ଦ ପାଇଁ ବାରମ୍ବାର ତହସିଲଦାର ଏବଂ ଜିଲ୍ଲା ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ଯାନୁଷ୍ଠାନ ଗ୍ରହଣ କରା ଯାଉ ନଥିଲା। କେବଳ ଏହି ଦୁଇଟି ସ୍ଥାନରେ ନୁହେଁ ଜଳେଶ୍ବର ତହସିଲ ଅନ୍ତର୍ଗତ ବିଭିନ୍ନ ସ୍ଥାନରେ ବାଲି ମାଫିଆ ମାନେ ବେଆଇନ ବାଲି ଉତ୍ତୋଳନ କରି ମାଲେମାଲ ହେଉଥିବା ବେଳେ କୋଟି କୋଟି ଟଙ୍କା ରାଜସ୍ବ ହରାଉଛନ୍ତି ସରକାର। ତେଣୁ ରାଜସ୍ବ ବିଭାଗ ଏବଂ ଖଣିଜ ସମ୍ପଦ ବିଭାଗ ଏଥିପ୍ରତି ଦୃଷ୍ଟି ଦେଇ ବେଆଇନ ବାଲି ଉତ୍ତୋଳନ ବନ୍ଦ କରିବା ପାଇଁ ଗ୍ରାମବାସୀ ଦାବି କରିଛନ୍ତି।
