ପୁରୀ,୨୮/୦୬: ଜନ୍ମବେଦି ମୋହରେ ମହାବାହୁ । ଏପଟେ ଆକୁଳ ହେଲେଣି ଅସଂଖ୍ୟ ଭକ୍ତ । ଶ୍ରୀଗୁଣ୍ଡିଚାରେ ବଡ଼ଦେଉଳ ନୀତି ମଠେଇ ଥିଲା । ହେଲେ ମହାପ୍ରଭୁଙ୍କ ମନ ଚଞ୍ଚଳ । ସବୁକୁ ପଛ କରି ଭାଇ-ଭଉଣୀଙ୍କ ସାଙ୍ଗରେ ଭକ୍ତଙ୍କ ଗହଣକୁ ଧାଇଁ ଆସିଲେ କାଳିଆ ସାଆନ୍ତ । ବଡ଼ଦାଣ୍ଡରେ ରଥାରୂଢ଼ ହେଲେ ସପ୍ତ ମୂର୍ତ୍ତି । ଭକ୍ତ ସମୁଦ୍ରରେ ବିରାଜମାନ ଦାରୁବ୍ରହ୍ମ । ଧାର୍ଯ୍ୟ ସମୟରେ ରଥ ଟଣା ଆରମ୍ଭ ବି ହେଲା । ହେଲେ ଶରଧାବାଲିରେ ପହଞ୍ଚି ପାରିଲେନି ତିନିରଥ । ମାଉସୀ ମା’ଙ୍କ ମନ୍ଦିର ନିକଟରେ ଅଟକିଲେ ବଡ଼ଠାକୁରେ ଏବଂ ମରିଚିକୋଟ ପାଖରେ ରହିଲେ ଭଉଣୀ ସୁଭଦ୍ରା । କେବଳ ବିଧି ରକ୍ଷା କରି ରାତିରେ ନନ୍ଦିଘୋଷ ଟାଣିଲେ । ମାତ୍ର ୧୦ ହାତ ଯାଇ ଶ୍ରୀମନ୍ଦିର ସମ୍ମୁଖରେ ରଥଚକଡ଼ାରେ ଅଟକିଲା ନନ୍ଦିଘୋଷ । ରାତି ୭ଟା ୫୦ ମିନିଟ୍ରେ ରଥଟଣା ବନ୍ଦ ଘୋଷଣା କରିଥିଲା ପ୍ରଶାସନ । ଶନିବାର ଠାକୁରଙ୍କ ଅବକାଶ ସରିଲେ ସକାଳ ପ୍ରାୟ ସାଢ଼େ ୯ଟାରେ ରଥ ଟଣା ଆରମ୍ଭ ହେବ ବୋଲି ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ କହିଛନ୍ତି ।
ଭଗବାନ ଓ ଭକ୍ତଙ୍କ ଅପୂର୍ବ ଲୀଳାରେ କିଂକର୍ତ୍ତବ୍ୟ ପ୍ରଶାସକ ଓ ସେବକ । ରଥ ଟଣାରେ ଅହେତୁକ ବିଳମ୍ବ ଲକ୍ଷ ଲକ୍ଷ ଭକ୍ତଙ୍କୁ ନିରାଶ କଲା। ବଡ଼ଦାଣ୍ଡରେ ରଥ ଟାଣିବାକୁ ଅପେକ୍ଷା କରି ଫେରିଗଲେ ଅସଂଖ୍ୟ ଭକ୍ତ । ଅପରାହ୍ନ ୪ଟା ୧୦ ମିନିଟ୍ରେ ତାଳଧ୍ୱଜ ଟଣା ହେଲା । ଧୀରମନ୍ଥର ଗତିରେ ଆଗେଇ ବାରବା ମୋଡ଼ ନେଲା । ସେହି ଅନୁରୂପ ଦେବଦଳନ ରଥ ଟଣାରେ ଯଥେଷ୍ଟ ବିଳମ୍ବ ହେଲା । ଶେଷରେ ନନ୍ଦିଘୋଷ ମାତ୍ର ୧୦ ହାତ ଘୁଞ୍ଚିଲା ।
ଜନ୍ମବେଦି ଅଭିମୁଖେ ନବଦିନ ଯାତ୍ରାରେ ବାହାରିଛନ୍ତି ଚତୁର୍ଦ୍ଧାମୂର୍ତ୍ତି । ଶ୍ରୀମନ୍ଦିରରୁ ଶରଧାବାଲି ଥିଲା ଜନସମୁଦ୍ର । ଭକ୍ତଙ୍କ ତରଙ୍ଗ ଭେଦି ଆଗଉଥିଲା ରଥ । ପାଣିପାଗ ବି ବେଶ୍ ଅନୁକୂଳ ଥିଲା । ରଥାରୂଢ ଠାକୁରଙ୍କୁ ଦେଖି ଭାବବିହ୍ୱଳ ହେଉଥାନ୍ତି ଅସଂଖ୍ୟ ଭକ୍ତ । ଅପଲକ ନୟନରେ ବାହୁ ପ୍ରସାରି ଆଗଉଥାନ୍ତି ବଡ଼ଠାକୁରେ । ଭକ୍ତ ଆଖିରୁ ଧାର ଧାର ଆନନ୍ଦାଶ୍ରୁ ବୋହି ଯାଉଥାଏ । ଭାବାବେଗରେ ଉବୁଟୁବୁ ହେଉଥିଲେ ଭଗବାନ ଓ ଅଗଣିତ ଭକ୍ତ । ଦାରୁବ୍ରହ୍ମଙ୍କ ମାନବୀୟ ଲୀଳା ଦେଖି ବିଭୋର ହେଉଥିଲେ ବିଶ୍ୱବାସୀ । ଜୟ ଜଗନ୍ନାଥ ଓ ହରିବୋଲ ଧ୍ୱନିରେ କମ୍ପୁଥାଏ ଶ୍ରୀକ୍ଷେତ୍ର । ଚଳିତ ବର୍ଷ ରଥ ଯାତ୍ରାରେ ଶ୍ରଦ୍ଧାଳୁଙ୍କ ଅସମ୍ଭାଳ ଭିଡ଼ ହୋଇଥିଲା । ବଡ଼ଦାଣ୍ଡରେ ପ୍ରାୟ ୮ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଥିଲା ।
