ଭୁବନେଶ୍ୱର,୨୮/୦୧: ଆଜିି ଭୁବନେଶ୍ୱରରେ ପହଞ୍ଚିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରୁ ସିଧା ଜନତା ମଇଦାନ ସମ୍ମିଳନୀ ସ୍ଥଳକୁ ଯିବେ । ସେଠାରେ ଉର୍ତ୍କଷ ଓଡ଼ିଶାର ଉଦ୍ଘାଟନ କରିବେ । ପ୍ରାୟ ଦେଢ଼ ଘଣ୍ଟାର ରହଣି ପରେ ବିମାନବନ୍ଦରରେ ପହଞ୍ଚି ଡେରାଡୁନ ଅଭିମୁଖେ ବାହାରିବେ ।
ପ୍ରଧାନମନ୍ତ୍ରୀଙ୍କ ଗସ୍ତକୁ ନଜରରେ ରଖି ପୁଲିସ ପକ୍ଷରୁ ଟ୍ରାଫିକ କଟକଣା ଜାରି ହୋଇଛି । ସକାଳ ୧୦ଟା ୨୫ ମିନିଟ୍ରୁ ୧୧ଟା ୧୦ ମିନିଟ୍ ଯାଏ ଏୟାରପୋର୍ଟରୁ କ୍ୟାପିଟାଲ ହସ୍ପିଟାଲ, ଏଜି, ରାଜଭବନ ଗୋଲେଇ, ପାୱାର ହାଉସ୍, ୧୨୦ ବାଟାଲିୟନ, ବେହେରା ସାହି, ଜୟଦେବବିହାର, ଜାଭିୟର ଓ ନାଲ୍କୋ ଛକ ଯାଏ ଗାଡି ମୋଟର ଯା’ଆସ କରିପାରିବନି ।
ମଙ୍ଗଳବାର ସକାଳ ୧୦ଟା ୩୫ ମିନିଟ୍ରେ ବାୟୁସେନାର ସ୍ୱତନ୍ତ୍ର ବିମାନ ଯୋଗେ ବିମାନବନ୍ଦରରେ ପହଞ୍ଚିବେ ମୋଦି । ବିମାନବନ୍ଦରରୁ ସ୍ୱତନ୍ତ୍ର କାର୍କେଡ୍ ଯୋଗେ ସିଧା ଜନତା ମଇଦାନକୁ ଯିବେ । ସେଠାରେ ପୂର୍ବାହ୍ଣ ୧୧ଟାରେ ସମ୍ମିଳନୀକୁ ଉଦ୍ଘାଟନ କରିବେ । ଜନତା ମଇଦାନରୁ ବିମାନବନ୍ଦରକୁ ଫେରିବା ପାଇଁ ଉପରୋକ୍ତ ରୁଟ୍କୁ ଅପରାହ୍ଣ ୧୨ଟା ୨୦ ମିନିଟ୍ରୁ ୧ଟା ୫ ମିନିଟ୍ ଯାଏ ବନ୍ଦ ରଖାଯିବ । ମୋଦି ବିମାନବନ୍ଦରରେ ପହଞ୍ଚିବା ପରେ ୧୨ଟା ୫୫ ମିନିଟ୍ରେ ସ୍ୱତନ୍ତ୍ର ବିମାନ ଯୋଗେ ଡେରାଡୁନ୍ ଅଭିମୁଖେ ଯିବେ ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ସୋମବାର ପୁଲିସ ପକ୍ଷରୁ କାରକେଡ୍ ରିହର୍ସାଲ ସରିଯାଇଛି । ମଧ୍ୟାହ୍ନ ୧୨ଟା ୩୦ରେ ବିମାନବନ୍ଦର କାର୍ଗୋ ଗେଟ୍ ସାମ୍ନାରୁ କାରକେଡ୍ ବାହାରିଥିଲା । କାରକେଡ୍ରେ ସାମିଲ୍ ସମସ୍ତ ଭ୍ୟାନ୍ ଉପରୋକ୍ତ ରୁଟ୍ ଦେଇ ଜନତା ମଇଦାନ ଅଭିମୁଖେ ଯାଇଥିଲା । ସେଠାରେ କିଛି ସମୟ ରହଣି ପରେ ପୁଣି ବିମାନବନ୍ଦରକୁ ଫେରିଥିଲା । ପ୍ରଧାନମନ୍ତ୍ରୀଙ୍କ ସୁରକ୍ଷା ପାଇଁ ନିୟୋଜିତ ସ୍ପେଶାଲ ପ୍ରୋଟେକ୍ସନ ଗ୍ରୁପ୍ (ଏସ୍ପିଜି) କାରକେଡ୍ ରିହର୍ସାଲରେ ଉପସ୍ଥିତ ଥିଲେ । ସେମାନେ ଉପରୋକ୍ତ ରୁଟ୍ ଓ ସମ୍ମିଳନୀ ସ୍ଥଳର ସୁରକ୍ଷା ବ୍ୟବସ୍ଥା ତଦାରଖ କରିଥିଲେ ।
ଜଗିବେ ୪୦୦ ପୁଲିସ ଅଧିକାରୀ
ଡିସିପି ପିନାକ ମିଶ୍ର କହିଛନ୍ତି, ଉତ୍କର୍ଷ ଓଡିଶାର ସୁରକ୍ଷା ପାଇଁ ସହରରେ ମୋଟ ୬୦ ପ୍ଲାଟୁନ୍ ପୁଲିସ ଫୋର୍ସ ମୁତୟନ କରାଯାଇଛି । ପାଖାପାଖି ୪୦୦ରୁ ଅଧିକ ପୁଲିସ ଅଧିକାରୀଙ୍କ ମୁଣ୍ଡରେ ସୁରକ୍ଷା ବ୍ୟବସ୍ଥା ନ୍ୟସ୍ତ ରହିବ । ସମ୍ମିଳନୀକୁ ଆସିଥିବା ଶିଳ୍ପପତି ଓ ଅନ୍ୟ ବ୍ୟକ୍ତିବିଶେଷମାନେ ଯେଉଁ ତାରକା ହୋଟେଲରେ ରହୁଛନ୍ତି, ସେଠାରେ ବ୍ୟାପକ ମାତ୍ରାରେ ପୁଲିସ ଜଗିବେ ।
ସମ୍ମିଳନୀ ସ୍ଥଳ ନୋ ଫ୍ଲାଇଂ ଜୋନ୍
ବିମାନବନ୍ଦରରୁ ରାଜଭବନ ଦେଇ ଜନତା ମଇଦାନ ଯାଏଁ ରାସ୍ତାକୁ ନୋ ଫ୍ଲାଇଂ ଜୋନ୍ ଘୋଷଣା କରାଯାଇଛି । ଏହାସହ ସମ୍ମିଳନୀସ୍ଥଳରେ କୌଣସି ଡ୍ରୋନ୍ ଉଡି଼ପାରିବନି ବୋଲି ପୁଲିସ ଚେତାଇଛି । ଉପରୋକ୍ତ ରୁଟ୍ରେ ପ୍ରଧାନମନ୍ତ୍ରୀଙ୍କ କାର୍କେଡ୍ ଯିବା ବେଳେ ଗଣମାଧ୍ୟମ ପ୍ରତିନିଧି ଲାଇଭ୍ କଭରେଜ୍ କରିପାରିବେନି ବୋଲି ପୁଲିସ ସୂଚାଇଛି ।
