ନୂଆଦିଲ୍ଲୀ,୨୮/୦୧: ଚୀନ୍ର ନୂଆ ଏଆଇ ମଡେଲ୍ ‘ଡିପ୍ସିକ୍’ ବର୍ତ୍ତମାନ ବିଶ୍ୱ ବଜାରରେ ଚହଳ ପକାଇଛି । ଆମେରିକା ସମେତ ବିଶ୍ୱବ୍ୟାପୀ ଷ୍ଟକ୍ ବଜାର ଦୋହଲି ଯାଇଛି । ସୋମବାର ଆମେରିକୀୟ ବଜାର ଖୋଲିବା କ୍ଷଣି ଏନ୍ଭିଡିଆ କର୍ପୋରେସନର ସେୟାରରେ ମୋଟା ଅଙ୍କର ହ୍ରାସ ଦେଖିବାକୁ ମିଳିଥିଲା । ଏହାର ସେୟାର ମୂଲ୍ୟ ୧୩% ପର୍ଯ୍ୟନ୍ତ ଖସିଥିଲା ଏବଂ ବଜାର ପୁଞ୍ଜି ପ୍ରାୟ ୪୬୫ ବିଲିୟନ ଡଲାର କମିଥିଲା ।
ଉଲ୍ଲେଖଯୋଗ୍ୟ, ଚୀନ୍ର ଷ୍ଟାର୍ଟଅପ୍ ‘ଡିପ୍ସିକ୍’ ଏକ ମାଗଣା ଏଆଇ ଆସିଷ୍ଟାଣ୍ଟ ଆଣିଛି । ଏହା ସବୁଠୁ ଶସ୍ତା ଚିପ୍ସ ଓ କମ୍ ଡାଟା ବ୍ୟବହାର କରୁଛି । ଡିପ୍ସିକ୍-ଭି୩ ମଡେଲକୁ କେବଳ ୫୬ ଲକ୍ଷ ଡଲାର ନିବେଶରେ ବିକାଶ କରାଯାଇଥିଲା । ଆମେରିକାର ଓପନ୍ଏଆଇ, ଗୁଗୁଲ୍, ମେଟା ଭଳି ଟେକ୍ କମ୍ପାନି ଦ୍ୱାରା ଏଆଇ ବାବଦରେ ହେଉଥିବା ଖର୍ଚ୍ଚ ତୁଳନାରେ ଏହା ନଗଣ୍ୟ । ଡିପ୍ସିକ୍ର ଏଆଇ ଆସିଷ୍ଟାଣ୍ଟ ଆମେରିକାରେ ଆପଲ୍ର ଆପ୍ ଷ୍ଟୋରରେ ଚାଟ୍ଜିପିଟିକୁ ପଛରେ ପକାଇ ପ୍ରଥମ ସ୍ଥାନ ହାସଲ କରିଛି । ଡିପ୍ସିକ୍ ଯୋଗୁ ବିଶ୍ୱବ୍ୟାପୀ ଏଆଇ ଶିଳ୍ପ ଉପରେ କି ପ୍ରଭାବ ପଡ଼ିବ, ତାହାକୁ ନେଇ ନିବେଶକଙ୍କ ମଧ୍ୟରେ ଚିନ୍ତା ବଢ଼ିଯାଇଛି । କୁହାଯାଉଛି ଯେ ଚାଟ୍ ଜିପିଟି, ଜେମିନି ଓ କ୍ଲାଉଡ୍ ଏଆଇକୁ ଏହା ପଛରେ ପକାଇ ଦେଇଛି । ଏଆଇ ଆପ୍ ପାଇଁ ଅଗ୍ରଣୀ ଚିପ୍ ନିର୍ମାତା ଏନ୍ଭିଡିଆର ସେୟାର ମୂଲ୍ୟ ୧୩% ହ୍ରାସ ପାଇଛି ।
ସେହିଭଳି ସେମିକଣ୍ଡକ୍ଟର ସୂଚକାଙ୍କରେ ୬.୫% ହ୍ରାସ ଘଟିଛି । ଚୀନ୍ର ଡିପ୍ସିକ୍କୁ ଏଭଳି ଏକ ଏଆଇ ମଡେଲ୍ କୁହାଯାଉଛି ଯାହା କେବଳ ପ୍ରଶ୍ନର ଜବାବ ଦେବନାହିଁ, ବରଂ ଲୋକଙ୍କ ବିଭିନ୍ନ ଭଳି ସମସ୍ୟାର ସମାଧାନ କରିପାରିବ । ଏହି ଡିପ୍ସିକ୍ ଚାଟ୍ଜିପିଟିର ଚିନ୍ତା ବଢ଼ାଇ ଦେଇଛି । ଉକ୍ତ ଚାଇନା ଏଆଇ ଏକ ଷ୍ଟେଟ-ଅଫ୍-ଦି ଆର୍ଟ ରିଜନିଙ୍ଗ୍ ମଡେଲ । ଏଆଇ ସିଷ୍ଟମ୍ର ସମସ୍ୟା ସମାଧାନକାରୀ ତଥା ବିଶ୍ଳେଷଣାତ୍ମକ ଦକ୍ଷତାକୁ ବଢ଼ାଇବା ସକାଶେ ଏହାକୁ ଡିଜାଇନ୍ କରାଯାଇଛି । ଡିପ୍ସିକ୍ର ଦୁଇଟି ଭର୍ସନ ରହିଛି । ପ୍ରଥମଟି ହେଉଛି ଡିପ୍ସିକ୍ ଆର୍୧୦ ଓ ଦ୍ୱିତୀୟଟି ହେଉଛି ଡିପ୍ସିକ୍ ଆର୍୧ । କିଛି ସମୟ ପାଇଁ କମ୍ପାନି ଡିପ୍ସିକ୍ ଭି୩ ବି ଲଞ୍ଚ୍ କରିଥିଲା ।
