ବାରିପଦା, ୦୬/୧୨ : ନିଜ ଜନ୍ମମାଟି ତଥା ବାଲ୍ୟ ବିଦ୍ୟାଳୟରେ ପାଦ ଦେଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ଉପରବେଡ଼ା ପ୍ରାଥମିକ ବିଦ୍ୟାଳୟରେ ଆୟୋଜିତ ସଭାରେ ରାଷ୍ଟ୍ରପତି ଯୋଗ ଦେଇଛନ୍ତି। ତାଙ୍କ ପିଲାଦିନର ସ୍ମୃତିକୁ ମନେ ପକାଇଛନ୍ତି। ଏହା ସହ ବିଦ୍ୟାଳୟର ପରିବର୍ତ୍ତିତ ଚିତ୍ର ଦେଖି ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସେତେବେଳର ମତିଝାଟି ସ୍କୁଲ ବଦଳି ଏବେ ପକ୍କା ଓ ସୁନ୍ଦର ହୋଇଛି।
ରାଷ୍ଟ୍ରପତି ତାଙ୍କ ଅଭିଭାଷଣରେ ପିଲାଦିନର ସ୍ମୃତି ବଖାଣିଛନ୍ତି। ସେ ତାଙ୍କ ସହପାଠୀଙ୍କ ସହିତ ପ୍ରତି ଶନିବାର ଦିନ ଶ୍ରେଣୀ କକ୍ଷକୁ କିଭଳି ଗୋବର ଦେଇ ଲିପାପୋଛା କରୁଥିଲେ ସେହି ବିଷୟରେ କହିଛନ୍ତି। ୩ୟ ଶ୍ରେଣୀରେ ମେଧାବୃତ୍ତି ପାଇବା ବେଳେ ତାଙ୍କ ପାଖରେ କଲମଟିଏ ନଥିଲା, ତାଙ୍କ ବାପା ଜଣେ ଲୋକଠୁ କଲମ ମାଗିଆଣି ଗୋଟିଏ ପୁରୁଣା କଲମ ଆଣି ଦେଇଥିଲେ। ସେହି କଲମରୁ କାଳୀ ଝରି କିଭଳି ତାଙ୍କ ପୋଷାକ ଖରାପ ହୋଇଥିଲା, ସେହି ବିଷୟରେ କହିଛନ୍ତି। ତାଙ୍କ ବାଲ୍ୟବେଳର ଶିକ୍ଷକମାନଙ୍କୁ ମଧ୍ୟ ମନେ ପକାଇଛନ୍ତି। ସାରା ଗାଁ ତାଙ୍କୁ କିଭଳି ଭଲ ପାଉଥିଲା ସେହି ବିଷୟରେ କହିଛନ୍ତି।
ସୂଚନାନୁଯାୟୀ, ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କ ଜନ୍ମ ସ୍ଥାନ ଉପରବେଡା ସହିତ ରାଇରଙ୍ଗପୁର ଓ ବାଙ୍ଗିରୀପୋଷିରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବେ। ସେ ତାଙ୍କ ନିଜ ଘରେ ରାତ୍ରିଯାପନ କରିବେ। ରାଷ୍ଟ୍ରପତିଙ୍କ ଗସ୍ତକୁ ନେଇ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ରାଷ୍ଟ୍ରପତି ହେବ ପରେ ସେ ପ୍ରଥମ ଥର ନିଜ ଗାଁ ଉପରବେଡ଼ାକୁ ଆସିଛନ୍ତି। ପୁରା ଗାଁ ଆଜି ତାଙ୍କ ସ୍ଵାଗତରେ ସଜେଇ ହୋଇଛି।
