ଭୁବନେଶ୍ବର, ୨୬/୧୨ : ୨୭ ବର୍ଷ ପୂରଣ କରି ୨୮ ବର୍ଷରେ ପାଦ ଥାପିଛି ବିଜୁ ଜନତା ଦଳ। ଆଜି ୨୮ତମ ପ୍ରତିଷ୍ଠା ଦିବସ ପାଳିବାକୁ ଯାଉଛି ବିଜେଡି। ଏଥିପାଇଁ ଶଙ୍ଖ ଭବନରେ କାର୍ଯ୍ୟକ୍ରମ ଆୟୋଜନ ହୋଇଛି। ଏହି କାର୍ଯ୍ୟକ୍ରମରେ ବିଜେଡି ସଭାପତି ନବୀନ ପଟ୍ଟନାୟକ ସକାଳ ୧୧ଟାରେ ଯୋଗ ଦେଇ ଦଳୀୟ ନେତା ଓ କର୍ମୀଙ୍କୁ ଉଦବୋଧନ ଦେବେ। ଶଙ୍ଖ ଭବନ ସହ ରାଜ୍ୟର ସମସ୍ତ ନିର୍ବାଚନ ମଣ୍ଡଳୀରେ ବି ପ୍ରତିଷ୍ଠା ଦିବସ ପାଳନ କରାଯିବ। ଏହି ପ୍ରତିଷ୍ଠା ଦିବସ ଅବସରରେ ବିଜେଡିକୁ ଆହୁରି ଶକ୍ତିଶାଳୀ କରି ଆହୁରି ଲୋକଙ୍କ ପାଇଁ ସମର୍ପିତ ହେବାକୁ ଶପଥ ନେବେ ଦଳୀୟ ନେତା ଓ କର୍ମୀ ।
ଆଜି ବିଜେଡି ପାଳିବ ୨୮ତମ ପ୍ରତିଷ୍ଠା ଦିବସ । ପ୍ରଥମ ପ୍ରତିଷ୍ଠା ଦିବସରୁ ଏଯାବତ୍ ୨୭ ବର୍ଷର ଲମ୍ବା ରାଜନୈତିକ ଯାତ୍ରା ଭିତରେ ସବୁଠାରୁ ବଡ଼ ଆହ୍ୱାନର ସାମ୍ନା କରୁଛନ୍ତି ସୁପ୍ରିମୋ ନବୀନ ପଟ୍ଟନାୟକ। ତାଙ୍କ ଆଗରେ ଏବେ ବଡ଼ ଆହ୍ୱାନ-କେମିତି ଦଳକୁ ସଂଗଠିତ କରି ପୁଣି ଥରେ ଛିଡ଼ା କରିବେ? କର୍ମୀ, ନେତାଙ୍କ ଭିତରେ କିଭଳି ଫେରାଇ ଆଣିବେ ଆତ୍ମବିଶ୍ୱାସ? ବିଜେଡିକୁ ନେଇ ଯେଉଁ ଅନିଶ୍ଚିତତା ଓ ଆଶଙ୍କା ନେତା, କର୍ମୀଙ୍କ ଭିତରେ ପଶିଗଲାଣି, କେମିତି ତାହାକୁ ଦୂର କରିବେ? ପ୍ରତିଷ୍ଠା ଦିବସରେ ଏଥର କୌଣସି ରାଜ୍ୟସ୍ତରୀୟ କାର୍ଯ୍ୟକ୍ରମ କରିବ ନାହିଁ ବିଜେଡି । ପ୍ରତି ନିର୍ବାଚନମଣ୍ଡଳୀ ସ୍ତରରେ ସଭା/ସମିତି ହେବ । ହେଲେ ଟିକଟକୁ ନେଇ ନିର୍ବାଚନ ପୂର୍ବରୁ ବିଜେଡିରେ ଯେଉଁଭଳି ଟଣାଓଟରା ସ୍ଥିତି ଦେଖିବାକୁ ମିଳିଥିଲା, ପ୍ରତିଷ୍ଠା ଦିବସ ଆୟୋଜନରେ ତା’ର ପ୍ରଭାବ ପଡ଼ିପାରେ । ଏମିତିକି ଗୋଟିଏ ଗୋଷ୍ଠୀ ଆୟୋଜନର ମଙ୍ଗ ଧରିଲେ, ଆଉ କିଛି ଗୋଷ୍ଠୀ ଏଥିରୁ ଦୂରେଇ ଯାଇପାରନ୍ତି । ସଙ୍କଟ ସମୟରେ ଦଳକୁ ଏକାଠି ରଖିବାକୁ ନବୀନ ଅଣ୍ଟା ଭିଡ଼ିଛନ୍ତି ।
