ଭୁବନେଶ୍ୱର,୧୩/୧୨: ମଶାର ସାନ୍ଦ୍ରତା ୮୦ ପାର କଲାଣି । ଏହି ହାର ବଢ଼ି ଚାଲିଛି । ଏପଟେ କେନ୍ଦ୍ର ସରକାର ପ୍ରବାସୀ ଭାରତୀୟ ସମ୍ମିଳନୀ ଭୁବନେଶ୍ୱରରେ କରିବାକୁ ପସନ୍ଦ କରିଛନ୍ତି । ଯଦି ମଶାର ସାନ୍ଦ୍ରତା ଏହି ହାରରେ ବଢ଼େ, ତେବେ ପ୍ରବାସୀ ଭାରତୀୟଙ୍କୁ ମଶା କାମୁଡ଼ି କଲବଲ କରିବା ଥୟ । ଏମିତି ଆଶଙ୍କା ପ୍ରକାଶ ପାଇଲାଣି । ସ୍ୱାସ୍ଥ୍ୟ ବିଭାଗ ପକ୍ଷରୁ ବିଏମ୍ସିକୁ ଏ ନେଇ ଅବଗତ କରାଯାଇଛି ।
ବିଏମ୍ସି ଓ ସ୍ୱାସ୍ଥ୍ୟ ବିଭାଗ ମିଳିତ ଭାବେ ମଶାର ସାନ୍ଦ୍ରତା ମାପିଥିଲେ । ୟୁନିଟ୍-୧ ଅଞ୍ଚଳରେ ସର୍ବାଧିକ ସାନ୍ଦ୍ରତା ୮୦ ରହିଛି । ସେହିପରି ସତ୍ୟନଗଗରେ ୬୦, ପୁରୁଣା ଭୁବନେଶ୍ୱରରେ ୬୮ ଏବଂ ୟୁନିଟ୍-୩ ଅଞ୍ଚଳରେ ମଶାର ସାନ୍ଦ୍ରତା ୪୦ ରହିଛି । ସ୍ୱାସ୍ଥ୍ୟ ବିଭାଗ ପକ୍ଷରୁ ଟେନ୍ ମେନ୍ ପର ଆୱାର ହିସାବରେ ମଶାର ସାନ୍ଦ୍ରତା ମପା ହୋଇଥିଲା । ପ୍ରତି ୪ଟି ୱାର୍ଡରୁ ଫିକ୍ସ ଷ୍ଟେସନ ଏବଂ ର୍ୟାଣ୍ଡମ ଭାବେ ମଶାର ସାନ୍ଦ୍ରତାକୁ ନିଆଯାଇଛି । ଏଥିରୁ ସାନ୍ଦ୍ରତା ୮୦ ଛୁଇଁଥିବା ନେଇ ସ୍ପଷ୍ଟ ହୋଇଛି ।
ବସ୍ତିରୁ ଆପାର୍ଟମେଣ୍ଟ, ସରକାରୀ ଅଫିସ ସବୁଠି ଏବେ ମଶା ଭୟ ପଶିଲାଣି । ସନ୍ଧ୍ୟା ହେବା କ୍ଷଣି ମଶା ଉତ୍ପାତ ବଢୁଛି । ଆଗକୁ ଭୁବନେଶ୍ୱରରେ ପ୍ରବାସୀ ଭାରତୀୟ ସମ୍ମିଳନୀ ଅନୁଷ୍ଠିତ ହେବ । ଏଥିପାଇଁ ସଜବାଜ ଆରମ୍ଭ ହୋଇଛି । ବିଦେଶୀ ମାନେ ବିଭିନ୍ନ ଦାମୀ ହୋଟେଲରେ ରହିବେ । ହେଲେ ମଶାର ସାନ୍ଦ୍ରତା ଏବେ ବିଏମ୍ସି ପାଇଁ ଚ୍ୟାଲେଞ୍ଜ୍ ସୃଷ୍ଟି କରିଛି । ମଶା କାମୁଡ଼ାରେ ପ୍ରବାସୀ ଭାରତୀୟ ଘାଇଲା ହେଲେ ବିଏମ୍ସିର ଇଜ୍ଜତ ଯିବ । ତେଣୁ ନିକଟରେ ଏକ ବୈଠକ ହୋଇଥିଲା । ଏଥିରେ ମଶା ଦମନ ପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ନିର୍ଦ୍ଦେଶ ଦିଆଯାଇଛି ।
ବିଏମ୍ସି ୬୭ ୱାର୍ଡକୁ ମାତ୍ର ୨୦ ମଶା ଧୂଆଁ ଗାଡ଼ି ରହିଛି । ସେଥିରୁ ୨-୩ଟି ଭିଭିଆଇପିଙ୍କ ସେବାରେ ନିୟୋଜିତ ହେଉଛି । ବାକି ୱାର୍ଡରେ ବୁଲୁଛି । ଫଳରେ ଗୋଟିଏ ୱାର୍ଡ ସମ୍ପୂର୍ଣ୍ଣ କରିବା ସମ୍ଭବ ହୋଇପାରୁନି । ଦିନେ ମଶା ଧୂଆଁ ବୁଲିଲେ ୪ ଦିନ ଅପେକ୍ଷା କରିବାକୁ ପଡୁଛି । ଏମିତି ଚାଲିଲେ ମଶା ଦମନ କରି ପାରିବ ତ ବିଏମସି? କେବଳ ମନ୍ତ୍ରୀ, ଆଇଏଏସ୍ ଅଧିକାରୀ ଓ ଭିଭିଆଇପିଙ୍କ ଘର ଚାରିପାଖେ ଧୂଆଁ ବୁଲାଇ ଗାଡ଼ି ଛୁ ମାରୁଛି । ମଶା ମରିବେ କ’ଣ ଓଲଟି ଘରେ ପଶୁଛନ୍ତି ।
ଡେଙ୍ଗୁ ମଶା କାମୁଡାରେ ଲୋକେ ଘାଇଲା ହୋଇ ହସ୍ପିଟାଲରେ ପଡିଲେ । ଡେଙ୍ଗୁ ଯାଇନି ଏବେ ପୁଣି ନ୍ୟୁସେନ୍ସ ମଶାଙ୍କ ଉତ୍ପାତ ବଢିଲାଣି । ସ୍ୱାସ୍ଥ୍ୟ ବିଶେଷଜ୍ଞଙ୍କ କହିବା କଥା ଏହି ପ୍ରଜାତିର ମଶା ଶୀତ ଦିନେ ଦେଖାଦିଅନ୍ତି। ଏ ମଶା କାମୁଡ଼ିବା ଦ୍ୱାରା କୌଣସି ରୋଗ ବ୍ୟାପେ ନାହିଁ । କିନ୍ତୁ ଏହି ମଶା କଲବଲ କରାଇବ । କାମୁଡ଼ିବା ସ୍ଥାନ ନାଲି ପଡ଼ି କୁଣ୍ଡେଇ ହେବ । ବର୍ତ୍ତମାନ ଶୀତ ବଢୁଥିବାରୁ ଏଭଳି ମଶାଙ୍କ ସଂଖ୍ୟା ବୃଦ୍ଧି ପାଇବ । ବିଏମ୍ସି ଓ ସ୍ୱାସ୍ଥ୍ୟ ବିଭାଗ ପକ୍ଷକୁ ସତର୍କତା ଅବଲମ୍ବନ କରାଯାଉନି । ଠିକ୍ ସ୍ଥାନରେ ସଫେଇ କରାଯାଉନି । ବିଏମ୍ସି ପକ୍ଷରୁ ସବୁ କନଜରଭେନ୍ସି ଲେନ୍ ସଫା ହୋଇଥିଲା । ହେଲେ ଏବେ ସେ ସବୁରେ ଅଳିଆ ଭର୍ତ୍ତି । ତେଣୁ ମଶା ସଂଖ୍ୟା ବଢିଚାଲିଛି।
